14-22 ءساۋىر ارالىعىندا وتكەن الامانعا 7-17 جاس ارالىعىنداعى 500-دەن استام الەمنىڭ ەڭ تاڭداۋلى شاحمات شەبەرلەرى قاتىستى. بۇل باسەكەدە قازاقستان ۇلتتىق قۇراماسىنىڭ مۇشەلەرى جۇلدە سانى جاعىنان الدىنا جان سالعان جوق. ماسەلەن, G09 (9 جاسقا دەيىنگى ويىنشىلار) اراسىندا كلاسسيكالىق شاحماتتان الاننا بەرىكقىزى تابىستى ناتيجە كورسەتىپ, التىن تۇعىردان قول بۇلعادى. ول شۆەيتساريالىق جۇيە بويىنشا ۇيىمداستىرىلعان 9 پارتيانىڭ سەگىزىندە جەڭىس تويىن تويلادى. وتانداسىمىز شەشۋشى ماتچتا وسى دوداداعى ءوزىنىڭ نەگىزگى قارسىلاسى موڭعوليالىق تسەلمۋن يدەردەن (8 ۇپاي) باسىم ءتۇسىپ, جارىس جەڭىمپازى اتاندى. جالپى, بۇل جاس ساناتىندا 41 ويىنشى سىنعا تۇسكەنىن ايتا كەتكەن ءجون. وتانداسىمىز وسى جەڭىسىنىڭ ارقاسىندا G09 ساناتى بويىنشا FIDE رەيتينگىندە 1-ورىنعا كوتەرىلدى.
سونىمەن قاتار 17 جاسقا دەيىنگى شاحماتشىلار اراسىنداعى دودادا سىنعا تۇسكەن تاعى ءبىر وتانداسىمىز – ءامينا قايىربەكوۆا دا گرەكياداعى الەم چەمپيوناتىندا التىننان القا تاقتى. ول باسەكە بارىسىندا 8 كەزدەسۋدە جەڭىسكە جەتىپ, ءوزىنىڭ ەڭ باستى قارسىلاسى – تۇركيالىق زەينەپ ءچيفتيندى (7,5 ۇپاي) باسىپ وزدى.
سونداي-اق گرەكياداعى الەمدىك جارىستا ءنۇرالى نۇرشين (U07 جاس ساناتى, 7,5 ۇپاي) مەن ايسۇلتان بيساليەۆ (U09, 7) باس جۇلدەگە سىنىق سۇيەم جەتپەي, كۇمىس مەدال ولجالاسا, ريزات ۇلان (U07, 7 ۇپاي), ءالىمجان جاۋىنباي (U09, 7), دانيس قۋاندىق ۇلى (U11, 6,5), ەدگار مامەدوۆ (U13, 7) جانە داليا دياسقىزى (G11, 6,5) قولا جۇلدەگەر اتاندى.
مەكتەپ وقۋشىلارى اراسىنداعى جاھاندىق دودانىڭ قورىتىندىسى بويىنشا, جوعارىدا ايتقانىمىزداي, جەرلەستەرىمىز جالپىكوماندالىق ەسەپتە توپ جارسا, كەيىنگى ورىندارعا تۇركيا (3 التىن, 2 كۇمىس, 2 قولا) جانە موڭعوليا (2 التىن, 3 كۇمىس, 1 قولا) شاحماتشىلارى جايعاستى.
