العاشقى تۋردا ماجارستان حوككەيشىلەرىن 3:0 ەسەبىمەن تىزە بۇكتىرگەن جەرلەستەرىمىز ەكىنشى تۋردا «ا» توبىندا قازاقستانمەن بىرگە تۋرنير كەستەسىندە كوش باستاعان جاپونيا جاسوسپىرىمدەرىن قاپى قالدىردى. ەسەپ – 5:0. ماتچتىڭ ءبىرىنشى كەزەڭىندە قازاقستان قۇراماسىنان ارتۋر گروسس ويىننىڭ ەسەبىن اشسا, ۇزىلىستەن كەيىن كيريلل لياپۋنوۆ جاپونيا قاقپاسىنا ەكىنشى شايبانى سوقتى.
ءۇشىنشى كەزەڭدە دە بۇل ەسەپ قازاقستان حوككەيشىلەرىن قاناعاتتاندىرعان جوق. 44-مينۋتتا الەكساندر كيم تابلوداعى كورسەتكىشتى 3:0-گە جەتكىزسە, ارادا ءتورت سەكۋند وتكەندە كيريلل لياپۋنوۆ ءدۋبلدىڭ اۆتورى اتاندى. ال ماتچتىڭ اياقتالۋىنا ءبىر مينۋت قالعاندا ءادىل بەيسەمباەۆ مەرگەندىگىمەن كوزگە ءتۇسىپ, ماتچتىڭ سوڭعى نۇكتەسىن قويدى – 5:0. جەرلەستەرىمىز چەمپيوناتتاعى كەيىنگى ويىنىن بۇگىن دانيا حوككەيشىلەرىمەن وتكىزەدى. ولار العاشقى تۋردا جاپونيادان 5:3 ەسەبىمەن جەڭىلگەن بولسا, ەكىنشى تۋردا ۋكراينا قۇراماسىن جەڭدى – 5:1. ەكىنشى تۋر ويىندارىنان كەيىن تۋرنير كەستەسىندە قازاقستان قۇراماسى التى ۇپايمەن جەكە-دارا كوش باستادى.
