- بەكارىستان مىرزا, وتادان كەيىنگى جاعدايىڭىز قالاي؟
- قازىر وتادان كەيىنگى ءۇش كۇنگە قاراعاندا جاعدايىم الدەقايدا جاقسى. ول كەزدە ۋاقىت وتپەيتىندەي بولىپ كورىنەتىن. ءجۇرىپ-تۇرۋىمنىڭ ءوزى قيىن بولدى. اللاعا شۇكىر, دارىگەرلەر, دوسىم مەن جۇبايىم ماعان جاقسى كۇتىم كورسەتتى, سونىڭ ارقاسىندا توسەكتەن تەز تۇرىپ كەتتىم. ايتسە دە, كەيدە ءوزىمدى جايسىز سەزىنەمىن.
- ءاسيانىڭ دياگنوزىن قالاي بىلدىڭىزدەر؟
- ءسابيدىڭ دياگنوزىن انىقتاۋ قيىن بولدى. باسىندا وعان قاتە دياگنوزدار قويىلدى. ءاسيا قاراشا ايىندا دۇنيەگە كەلدى. ارادا 10 كۇن وتكەننەن كەيىن, بالانىڭ اۋىرىپ, قينالىپ جاتقانىن بايقادىق. ناۋرىز ايىنان باستاپ ءاسيانى ەلىمىزدىڭ مىقتى دارىگەرلەرىنە قاراتا باستادىق. اقىرى, ولار باۋىر تسيرروزى دياگنوزىن قويدى. ودان كەيىن ءبىزدى تۇركياعا جىبەرىپ, سول جاقتا وتا جاسالاتىنى ايتىلدى.
- دونور بولۋعا قالاي كەلىستىڭىز؟
- باسىندا ءۇش ادام كەلىسكەن, كەيىن ەكەۋى دەنساۋلىعىنا بايلانىستى باس تارتۋعا ءماجبۇر بولدى. سول مەزەتتە مەن بارلىق كەرەكتى اناليزدەردى تاپسىرىپ, كىشەنە سالماق تاستاپ, تالداۋ ناتيجەلەرى جاقسى بولعاننان كەيىن وتاعا كىرىپ كەتتىم.
- وتا جاسالاتىنىن بىلگەندە بويىڭىزعا ۇرەي, قورقىنىش سەزىمى ۇيالادى ما؟
- ارينە, قورقىنىش بولدى. جالپى, ماعان جاسالعان وتا بەس جارىم ساعاتقا سوزىلدى. مەنىڭ ويىمشا, پىشاق استىنا جاتار الدىندا تەك ەسسىزدەر عانا قورىقپايتىن سياقتى. سول كەزدە دە جاقىن جاندارىما ايتىپ ەدىم: بۇرىن ادامدار سوعىسقا اتتانعاندا وزدەرىنىڭ امان قالۋىنىڭ ەكى تالاي ەكەندىگىن تۇسىنەتىن, ال سەن بىلە تۇرا قارنىڭدى جارۋعا, ىشىنەن باۋىرىڭدى كەسىپ الۋعا رۇقسات بەرەسىڭ. مۇنى ويلاسام, ءالى كۇنگە دەيىن بويىما قورقىنىش ۇيالايدى. بىراق باۋىرىمدى اسياعا بەرۋدەن باس تارتپايتىن ەدىم. بالانىڭ ءومىرى قىل ۇستىندە تۇرعاندا, مەنىڭ قورقىنىشىم تۇك تە ەمەس. وتاعا كىرىپ بارا جاتقاندا دا, وتادان شىققاننان كەيىن دە قورقىنىش سەزىمى سەيىلە قويمادى. ء«ارى قاراي نە بولادى؟» دەگەن سۇراقتار ءجيى مازالادى.
- ءاسيانىڭ قازىرگى جاعدايى قالاي؟
- قازىر اسيا دارىگەرلەردىڭ باقىلاۋىندا جاتىر. وعان جاسالعان وتا التى جارىم ساعاتقا سوزىلدى. الدىمەن جانساقتاۋ بولىمىندە جاتىپ, كەيىن جەكە پالاتاعا اۋىستى, ەندى جاعدايى اقىرىنداپ جاقسارىپ كەلە جاتىر. دەسە دە, 3 اپتا بويى اۋرۋحانادا جاتادى. ءۇش اپتانىڭ ىشىندە بارلىق اناليزدەرى مەن ساراپتاما ناتيجەلەرى جاقسى بولسا, امان-ەسەن شىعارىلادى. بىراق تاعى ەكى اي بويى تۇركيالىق دارىگەرلەردىڭ قاداعالاۋىندا بولادى. كەيىن قوسىمشا تاعى ءۇش اي ۇلكەن باقىلاۋدا جاتادى. جالپى ايتقاندا, بارلىعى جارتى جىلدىڭ ىشىندە بەلگىلى بولادى.
- وتا جاساۋ ءۇشىن قاراجات جينالعانىن ەستىدىك. كەرەكتى سوما جينالدى ما؟
- كەرەكتى قاراجات جينالدى. ونىڭ ءوزى قىزىق بولدى. 7 ءساۋىر كۇنى دارىگەرمەن كەزدەسىپ, وتا 17 ساۋىردە جاسالاتىنىن بىلدىك. سول كۇنى تۇنگى ساعات بىردە دارىگەر حابارلاسىپ, 8 ءساۋىر كۇنى بولاتىن وتادان ءبىر وتباسى باس تارتىپ, ءبىر ورىن بوساعانىن ايتتى. «ەگەر كەلىسسەڭىزدەر, ءدال قازىر ەمحاناعا كەلىڭىزدەر» دەدى. سول ۋاقىتتا بىزگە ون ميلليون تەڭگە جەتپەي تۇرعان, ءسويتىپ بلوگەر باتىرجان يبراگيمگە حابارلاسىپ, وقيعانىڭ ءمان-جايىن تۇسىندىردىك. ول ءبىر كۇننىڭ ىشىندە 10 ميلليون تەڭگەنى جيناپ بەردى. بۇل قاراجات تەك وتاعا جۇمسالدى. ەندى بىزگە قازىر شامامەن 7 ميلليونداي جەتپەي تۇر. ءاسيانىڭ ەمدەلۋىنە, دارىسىنە, ءارى قاراي قارالاۋىنا قاراجات كەرەك. ونى ءوزىمىز اقىرىنداپ جيناپ, رەتىن كەلتىرۋگە تىرىسىپ جاتىرمىز. قولىۇشىن سوزامىن دەگەن ازاماتتار بولسا مىنا نومىرگە
8-775-396-18-46 اقشالارىن جىبەرە الادى.
- اسەرلى سۇحباتىڭىزعا راحمەت! وزىڭىزگە جانە اسياعا زور دەنساۋلىق تىلەيمىز!
