جەزقازعان – ەلباسى نازارىنداعى ايماق

جەزقازعان, ساتباەۆ جانە ۇلىتاۋ اۋداندارىن الەۋمەتتىك-ەكونوميكالىق دامىتۋدىڭ 2012-2020 جىلدارعا ارنالعان كەشەندى جوسپارى وڭىرگە جاڭا سەرپىن بەرەدى. بۇل تۋرالى قاراعاندى وبلىسىنىڭ اكىمى نۇرمۇحامبەت ابدىبەكوۆ جەزقازعانعا جۇمىس ساپارى بارىسىندا مالىمدەدى. وبلىس باسشىسى جۇمىس ساپارىنىڭ باستى ماقساتى – جەزقازعان, ساتباەۆ قالالارى مەن ۇلىتاۋ اۋدانىن الەۋمەتتىك-ەكونوميكالىق دامىتۋدىڭ 2012-2020 جىلدارعا ارنالعان كەشەندى جوسپارىنىڭ جۇزەگە اسىرىلۋ جايىمەن تانىسۋ بولدى. اتالعان جوسپاردا «قازاقمىس» كورپوراتسياسىنىڭ مينەرالدى-شيكىزات بازاسىن كەڭەيتۋ, شاعىن جانە ورتا بيزنەستى دامىتۋ, تۇرعىن ۇيلەر مەن تۇرعىن ءۇي-كوممۋنالدىق شارۋاشىلىعى نىساندارى قۇرىلىسىن سالۋ, الەۋمەتتىك جانە كولىكتىك ينفراقۇرىلىمداردى دامىتۋ, تابيعاتتى پايدالانۋ مەن قورشاعان ورتانى قورعاۋ, اۋىل شارۋاشىلىعى اۋماقتارىن دامىتۋ ماسەلەلەرى قامتىلعان بولاتىن. جۇمىس ساپارى بارىسىندا وبلىس اكىمى وڭىردەگى ەڭ ءىرى ءوندىرىستىڭ ءبىرى – وڭتۇستىك جەزقازعان كەنىشىندە بولدى. مۇندا ءتورت ءىرى شاحتا بار. تاۋلىگىنە جوسپار بويىنشا 22800 توننا كەن, سونداي-اق, 148 توننا مىس وندىرەدى. كەنىشتە 2200 ادام جۇمىس ىستەيدى. شاحتاعا ءتۇسىپ, كەنشىلەردىڭ جۇمىس جاعدايىن ءوز كوزىمەن كورگەن نۇرمۇحامبەت قاناپيا ۇلى جەر استىنداعى ەڭبەكتى ۇيىمداستىرۋ بارىسىنا ءوز ريزاشىلىعىن ءبىل­دىردى. كورپوراتسيا باسشىلارىمەن بولاشاقتا كەن ءوندىرۋدىڭ كوكجيەگىن كەڭەيتۋگە باعىتتالعان ءىس-شارالاردى ورتاعا سالدى. كەندى ءوڭىردى دامىتۋدىڭ كەشەندى جوس­پارىندا بەلگىلەنگەن جەزقازعان كەنتىن, ۆەسوۆايا, كرەستوۆسكي جانە گرپ ەلدى مەكەندەرىن كوشىرۋگە قاتىستى ماسەلەلەردى تالقىلاپ, ول جەرلەردى ارالاپ كوردى. وبلىس اكىمى جەزقازعان قالا­سىندا جۇرتشىلىقپەن كەزدەسۋدە كوتەرىلگەن بارلىق ماسەلەلەردى نازارعا الىپ, ولاردى شەشۋگە بايلانىستى شارالاردى قاراس­تىرۋ ءۇشىن ورىنباسارلارىنا تاپسىرمالار جۇكتەدى. ناقتى جاعدايلارعا بايلانىستى تۇشىمدى تۇسىنىكتەر بەردى. سونىمەن قوسا, ساپار بارىسىندا ن.ابدىبەكوۆ جەزقازعان مىس قورىتۋ زاۋىتىنا بارىپ, قازىرگى جاعدايىمەن جانە جوندەۋ جۇمىستارىنىڭ كەستەسىمەن تانىستى. ايماقتاعى يندۋستريالاندىرۋ كارتاسىنا ەنگىزىلگەن «كازتەحفيلتر» جشس كاسىپورنىنىڭ جۇمىسىن كوردى. وبلىس باسشىسى قالالىق اكىمدىكتىڭ ءماجىلىس زالىندا جەزقازعان, ساتباەۆ قالالارىنىڭ جانە ۇلىتاۋ اۋدانىنىڭ الەۋ­مەتتىك-ەكونوميكالىق دامۋ بارى­سىن تالقىلاعان اكتيۆ جينالىسىن وتكىزدى. ونىڭ جۇمىسىنا پار­لا­مەنت ءماجىلىسىنىڭ دەپۋتاتتارى نۇرلان جازىلبەكوۆ پەن ار­مان قوجاحمەتوۆ, سونداي-اق, «قازاق­مىس» كورپوراتسياسىنىڭ باسشى­لارى قاتىستى. جينالىستا ءۇستى­مىزدەگى جىلدىڭ بەس ايىنىڭ قورى­تىندىسىنا جانە ۇكىمەت قابىل­داعان ءوڭىردى دامىتۋدىڭ 2012-2020 جىلدارعا ارنالعان كەشەن­دى جوسپارىندا بەلگىلەنگەن ءمىن­دەتتەرگە باسا نازار اۋدارىلدى. اكىمدەردىڭ ەسەبىن تىڭداپ, اكتيۆ جينالىسىن قورىتىندىلاعان وبلىس باسشىسى ءوڭىردى دامىتۋدىڭ وزەكتى مىندەتتەرىن اتاپ كورسەتتى. – جەزقازعان – كەلەشەگى كەمەل ايماق. ەلباسىمىز نۇرسۇلتان نازارباەۆ ءوڭىردىڭ الەۋمەتتىك-ەكونوميكالىق دامۋىن اركەز ءوزىنىڭ ءجىتى نازارىندا ۇستاپ كەلەدى. ءوڭىردى دامىتۋدىڭ مۇمكىندىگى دە مول. تەك ونىڭ كوزىن تاۋىپ, ەرەكشە ىسكەرلىكپەن جۇمىس ىستەي ءبىلۋ كەرەك. اۋقىمدى شارالاردى قامتيتىن كەشەندى جوسپار ەكونوميكالىق جانە الەۋمەتتىك باعىتتا ودان ءارى دامۋدىڭ داڭعىل جولىنا تۇسۋدە ەرەكشە سەرپىن بەرەرى انىق. سوندىقتان, ول ءمىنسىز, مۇلتىكسىز ورىندالۋى ءتيىس. جۇمىلعان جۇدىرىقتاي بولىپ ارەكەت ەتسەك, جەزقازعاننىڭ كەلەشەگى كەمەلدەنە تۇسەدى, – دەپ ءتۇيدى ءسوزىن ن.ابدىبەكوۆ. اماندىق راح ۇلى, جۋرناليست, ايقىن نەسىپباي, «ەگەمەن قازاقستان». جەزقازعان.