تيان-شان قوڭىر ايۋى بارلىق ازىق تۇرىمەن قورەكتەنەدى. ول ءارتۇرلى تامىرلار, جيدەكتەر ء(تىپتى قۇرعاق بولسا دا), ءتۇرلى شوپتەر جانە وسىمدىك پيازدارىن جەيدى. ال جازدا جەمىس-جيدەك جەگەندى ۇناتادى. كەيدە ونىڭ جەمىنە سۋىرلار, ۇساق كەمىرگىشتەر, ءتىپتى جاندىكتەر دە اينالادى. قوڭىر تيان-شان ايۋى اقۋىز تاعامىنان گورى وسىمدىك تاعامدارىن جاقسى كورەدى.
تيان-شان ايۋىنىڭ باستى ەرەكشەلىگى - الدىڭعى تابانىنىڭ ۇزىن اقشىل تىرناقتارى. ونىڭ ارتقى تاباندارىنىڭ تىرناعى قويۋ قوڭىر كەلەدى. ول ايۋلار اراسىندا ەڭ سابىرلى تۇرلەردىڭ بىرىنە جاتادى, بىراق ايتسە دە جاقىن قارىم-قاتىناستان اۋلاق بولعان ءجون. اسىرەسە قازىر, قىسقى ۇيقىدان ويانىپ, قورەك ىزدەگەن كەزدە. ال انا ايۋ بالاسىن جالعىز الىسقا جىبەرمەيدى. ەگەر ول قونجىعىنا قاۋىپ تونەتىنىن سەزسە, قاۋىپ-قاتەرگە باسىن تىگۋى مۇمكىن.
