شاحماتتان الەمنىڭ «التىن ءتاجى» ءۇشىن ءوتىپ جاتقان باسەكەنىڭ كەز كەلگەن پارتياسى گروسسمەيستەرلەر ءۇشىن اسا ماڭىزدى ەكەنى بەلگىلى. بىراق, استاناداعى باسەكەنىڭ سەگىزىنشى پارتياسى ەكى شاحماتشى ءۇشىن شەشۋشى كەزەڭ ەدى. سەبەبى ەگەر بۇل پارتيادا يان نەپومنياششي جەڭىسكە جەتەر بولسا, ەكى ۇپاي باسىمدىعىمەن جالپى ەسەپتە العا ۇزاپ, چەمپيوندىققا تاعى ءبىر ماڭىزدى قادام جاسايدى. ال دين ليجەن قارسىلاسىنان باسىم تۇسكەن جاعدايدا تارازى باسى قايتا تەڭەسىپ, جارىس ودان ءارى قىزا تۇسپەك. سوندىقتان بۇل باسەكەدە قىتايلىق شاحماتشى جەڭىسكە جەتۋگە, رەسەيلىك گروسسمەيستەر بارىنشا جەڭىلمەۋگە تىرىسىپ باقتى.
دەسە دە, سەگىزىنشى پارتيادا اق تاستارمەن ويناعان دين ماتچتى جاقسى باستاعانىمەن, كەزدەسۋدىڭ بەل ورتاسىنان اسقاندا قاتەلىككە بوي الدىرىپ, ماڭىزدى ءبىر ۇپايىنان قاعىلدى. ال يان قارسىلاسىنىڭ مۇنداي «سىيلىعىن» ءوز پايداسىنا جاراتىپ, كەزەكتى جارتى ۇپايىن قورجىنعا سالدى. ءتورت جارىم ساعاتقا جالعاسقان سەگىزىنشى پارتيا 45-جۇرىستەن كەيىن تەڭ ەسەپپەن ءوز مارەسىنە جەتتى.
سەگىزىنشى راۋندتاعى تارتىستى باسەكەدەن كەيىن ەكى ويىنشى دا توعىزىنشى پارتيادا قارقىنىن باسەڭدەتىپ, اسقان ساقتىقپەن وينادى. ەكى شاحماتشى دا بۇل كەزەڭدە تاۋەكەلگە بارعان جوق. نەپومنياششي اق تاستارمەن ويناپ, جالپى ەسەپتە الدا تۇرسا دا توسىن قادام جاسامادى. دين دە ءار ءجۇرىسىن ۇزاق ويلاپ, قارسىلاسىنا لايىقتى جاۋاپ قايتارىپ وتىردى. ناتيجەسىندە, شاحماتشىلار بۇل پارتيانى التى ساعاتقا جۋىق وينادى. بۇل – ازىرشە استاناداعى باسەكەدە تىركەلگەن ەڭ ۇزاق پارتيا. ماماندار پىكىرى بويىنشا, ويىن تاعدىرى 50-جۇرىستە-اق شەشىلىپ قويعان بولسا دا, شاحماتشىلار ءبىر-بىرىنە بەرىلگىسى كەلگەن جوق. ءسويتىپ, ماتچ 82 جۇرىسكە دەيىن جالعاسىپ, گروسسمەيستەرلەر بۇل جولى دا ۇپاي بولىسۋگە ءماجبۇر بولدى.
توعىزىنشى پارتيادان كەيىن نەپومنياششي جالپى ەسەپتەگى باسىمدىعىن ساقتاپ قالدى – 5:4. كەشە الەم چەمپيونى اتاعىنان ۇمىتكەرلەر 10-پارتياسىن وتكىزسە, بۇگىن 11-راۋندتا باق سىنايدى.
