سپورتتى دامىتۋ ديرەكتسياسىنىڭ مالىمەتى بويىنشا, جاس دارىندى سپورتشىلار اراسىندا ۇيىمداستىرىلعان باسەكەدە استانا قالاسىنىڭ ق.مۇڭايتپاسوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ وقۋشىلارى ۇزدىك شىقتى. ولار فينالدا جەتىسۋ وبلىسىنىڭ جاقسىلىق ۇشكەمپىروۆ اتىنداعى وليمپيادا رەزەرۆىنىڭ وبلىستىق مەكتەپ-ينتەرنات-كوللەدجى تاربيەلەنۋشىلەرىمەن سپورتتىڭ بەس ءتۇرى بويىنشا سايىستى. باس جۇلدە ءۇشىن وتكەن باسەكەدە ەلوردادان كەلگەن سپورتشىلار دزيۋدو, گرەك-ريم, تاەكۆوندو جانە بوكستان باسىم تۇسسە, جەتىسۋلىقتار تەك ەركىن كۇرەستەن عانا الدا بولدى. وسىلايشا, ق.مۇڭايتپاسوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ كومانداسى بيىلعى «مينيستر كۋبوگىندە» توپ جارىپ قانا قويماي, قاتارىنان ەكىنشى مارتە ۇزدىك شىقتى.
ال قولا جۇلدە جامبىل وبلىسىنىڭ مەكتەپ-ينتەرنات-كوللەدجى كومانداسىنىڭ سپورتشىلارىنا بۇيىردى. ولار ءۇشىنشى ورىن ءۇشىن وتكەن جارىستا داڭقتى بوكسشى, وليمپيادا چەمپيونى بەكزات ساتتارحانوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى تاربيەلەنۋشىلەرىن قاپى قالدىردى. اتاپ ايتقاندا, جامبىلدىق ورەندەر سپورتتىڭ بوكس, تاەكۆوندو جانە ەركىن كۇرەس تۇرلەرىنەن جەڭىسكە جەتسە, گرەك-ريم كۇرەسى مەن دزيۋدو سپورتىندا تۇركىستاندىقتاردىڭ مەرەيى ۇستەم بولدى.
جارىستىڭ جەڭىمپاز بەن جۇلدەگەرلەرىن مسم سپورت جانە دەنە شىنىقتىرۋ ىستەرى كوميتەتى سپورت رەزەرۆى باسقارماسىنىڭ باسشىسى امانباي نۇرمۇحانبەتوۆ, سپورتتى دامىتۋ ديرەكتسياسى ديرەكتورىنىڭ ورىنباسارى ازامات يماشەۆ, اتلانتا وليمپياداسىنىڭ قولا جۇلدەگەرى ماۋلەن مامىروۆ, جەتىسۋ وبلىسى دەنە شىنىقتىرۋ جانە سپورت باسقارماسىنىڭ باسشىسى ۇلان رىسقۇل ماراپاتتادى.
«بۇل باسەكەنىڭ دىتتەگەنى – دارىندى بالالاردىڭ كوزگە تۇسۋىنە جاعداي جاساپ, سپورت مەكتەپ-ينتەرنات-كوللەدجدەر اراسىنداعى باسەكەلەستىكتى ارتتىرۋ. بۇل سپورتشىلار ەرتەڭگى ۇلتتىق قۇراما وكىلدەرى ەكەنىن ۇمىتپاۋىمىز كەرەك. سوندىقتان ءبىز جاستارىمىزعا زور سەنىم ارتامىز. حالىقارالىق جارىستاردا جۇلدەلى بولىپ, جانكۇيەرلەردى تەك جەڭىسپەن قۋانتقاندارىن قالايمىز. وسى جارىس اتالعان داڭعىل جولدا تاجىريبە جيناۋعا زور سەپتىگىن تيگىزەدى دەپ ويلايمىن», دەدى ا.نۇرمۇحانبەتوۆ.
وسىمەن ەكىنشى رەت ۇيىمداستىرىلعان جارىستا ەلىمىزدىڭ 17 سپورت وقۋ ورداسىنان 2007-2008 جىلدارى دۇنيەگە كەلگەن 450-دەن استام ءجاسوسپىرىم سپورتتىڭ دزيۋدو, بوكس, تاەكۆوندو, گرەك-ريم جانە ەركىن كۇرەس تۇرلەرىنەن سىنعا ءتۇستى. بيىلعى جارىس باعدارلاماسىنا تاەكۆوندو سپورتى جاڭادان قوسىلعانىن ايتا كەتكەن ءجون. جەڭىمپازدار بوكستان 7 سالماقتا, قالعان سپورت تۇرلەرىنەن 5 سالماقتا انىقتالدى.
جارىس ەرەجەسىنە سايكەس, 17 كوماندا ءبىرىنشى ىرىكتەۋ سايىسىندا 4 توپقا ءبولىنىپ, ءبىر-بىرىمەن اينالمالى جۇيە بويىنشا كەزدەستى. ءار توپتا 1-ورىن العان وقۋ ورداسى عانا جارتىلاي فينالعا جولداما العان. سوسىن, ا مەن س توبىنىڭ, تاعى ۆ مەن D توبىنىڭ ۇزدىگى فينالعا شىعۋ ءۇشىن تالاستى.
كەشەندى جارىس بىلتىردان بەرى مادەنيەت جانە سپورت مينيسترلىگىنىڭ قولداۋىمەن ۇيىمداستىرىلىپ كەلەدى. بىلتىر ىرىكتەۋ سايىستارى ەلىمىزدىڭ 4 قالاسىندا ءوتىپ, العاشقى جەڭىمپاز بەن جۇلدەگەرلەر استانادا انىقتالعان بولاتىن.
ۇيىمداستىرۋشىلار تاراپىنان «مينيستر كۋبوگىن» يەلەنگەن كوماندا وكىلدەرىنە بەس ميلليون, ەكىنشى ورىن يەلەرىنە ءۇش جانە قولا جۇلدەگەرلەرگە ەكى ميلليون تەڭگە كولەمىندە قارجىلاي سىياقى تابىستالدى.
