«وزەنمۇنايگاز» اق جانە «بەرالي ماڭعىستاۋ Company» جشس لاۋازىمدى تۇلعالارى اسا ىرى كولەمدە قاراجات جىمقىردى دەگەن كۇدىككە ءىلىندى.
جاڭاوزەن قالاسى تۇرعىندارىنىڭ «قازمۇنايگاز» اق (وزەنمۇنايگاز) جۇيەسىندەگى سىبايلاس جەمقورلىق جانە جىمقىرۋ فاكتىلەرى بويىنشا وتىنىشتەردىڭ نەگىزىندە قارجى مونيتورينگ اگەنتتىگىنىڭ ماڭعىستاۋ وبلىسى بويىنشا ەكونوميكا تەرگەپ-تەكسەرۋ دەپارتامەنتى سوتقا دەيىنگى بىرنەشە تەرگەۋدى باستادى. اتاپ ايتقاندا, كاسىپورىننىڭ ەسەپشوتتارى مەن وزگە دە رەسمي قۇجاتتاماسىندا بۇرمالانعان مالىمەتتەردى كورسەتە وتىرىپ, جاڭاسورعى-كومپرەسسورلىق قۇبىرلاردى جالعان ورناتۋ ارقىلى ۇرلاۋ فاكتىسى بويىنشا «وزەنمۇنايگاز» اق لاۋازىمدى تۇلعالارىنا قاتىستى تەرگەۋ جۇرگىزىلۋدە.
سونداي-اق, «وزەنمۇنايگاز» اق لاۋازىمدى تۇلعالارى مەن «بەرالي ماڭعىستاۋ Company» جشس باسشىلىعىنا قاتىستى 2022 جىلى ءمۇناي وندىرۋ ۇڭعىمالارىن جوندەۋ بويىنشا جۇمىستاردى ورىنداۋعا ارنالعان اسا ىرى كولەمدەگى قاراجاتتى جىمقىردى دەگەن كۇدىك بويىنشا تەرگەۋ ءجۇرىپ جاتىر.
«بەرالي ماڭعىستاۋ Company» جشس باسشىسى ءوزىنىڭ جاقىن تۋىستارىمەن ارنايى تەحنيكانى جالعا الۋ تۋرالى شارتتار جاساعانى انىقتالدى. ءىس جۇزىندە 248 ملن تەڭگە كولەمىندە الىنعان قاراجات قولما-قول اقشاعا اينالدىرىلىپ ۇرلانعان.
دەپارتامەنت «بەرالي ماڭعىستاۋ Company» جشس باسشىلىعى مەملەكەتكە عانا ەمەس, كومپانيا قىزمەتكەرلەرىنە دە زيان كەلتىرگەنىن ءاتاپ وتتى.
ۇرلانعان اقشا كومپانيانى دامىتۋعا, جۇمىسشىلاردىڭ ەڭبەك جاعدايلارىن جاقسارتۋعا, سونىڭ ىشىندە جالاقىنى كوتەرۋگە جۇمسالۋى ءتيىس ەدى. بۇل جاعدايلار كومپانيانىڭ قاراپايىم قىزمەتكەرلەرى اراسىندا نارازىلىق تۋدىردى.
تەرگەۋ بارىسىندا اتالعان فاكتىلەر تەكسەرىلىپ جاتىر.
قارجى مونيتورينگ اگەنتتىگىنىڭ ماڭعىستاۋ وبلىسى بويىنشا تەرگەپ-تەكسەرۋ دەپارتامەنتى قپك 201-بابىنا سايكەس وزگە اقپارات جاريا ەتۋگە جاتپايتىنىن ايتتى.
