ساۋالدى دەپۋتات ماقسات تولىقباەۆ وقىپ بەردى. ول ءوزىنىڭ ساۋالى ۇلتتىق رۋحانيات پەن كەلەشەك ۇرپاقتىڭ تاريحىنان اجىراماۋى ءۇشىن ماڭىزى زور دەپ ەسەپتەيدى.
«اتاپ ايتساق, كەسەنە قابىرعالارى ىلعال تارتىپ, كۇمبەزدىڭ بەتكى قاباتى قوپسىپ, تۇزى شىعىپ جاتىر. تۇز وسى 2-3 جىل بۇرىن عانا پايدا بولدى. سەبەبى كەيىنگى جىلدارى كەسەنەنىڭ الدىندا كوگالداندىرۋ, جاساندى اباتتاندىرۋ جۇمىستارى ءجۇردى. عيماراتتىڭ ىشىندەگى ىلعالدىلىقتىڭ شەكتەن تىس ارتۋىنان كۇمبەزدىڭ بەتىنە قارا داقتار شىقتى. دىمقىلدان جارىلعان سىلاقتار كوزگە انىق كورىنەدى. قىزمەتكەرلەر تۋريستەردىڭ توبەسىنەن سىلاق ءتۇسىپ جۇرمەسىن دەپ, تايقازاننىڭ اۋماعىن قىزىل لەنتامەن قورشاپ قويۋعا ءماجبۇر. ال اباتتاندىرۋدىڭ قىزىعىنا كەنەلگەن جەرگىلىكتى اكىمدىك, مامانداردىڭ دابىلىنا قۇلاق اسار ەمەس. عالىمداردىڭ ايتۋىنشا, كەسەنەنىڭ ءاۋ باستاعى جوباسىن عىلىمي تۇرعىدا زەرتتەپ الماي, جىل سايىن رەستاۆراتسيا جۇرگىزۋ - قىرۋار اقشانى دالاعا شاشقانمەن بىردەي. ويتكەنى كەسەنەنىڭ الدىندا تۇرعان كىرپىشتەر مەن استىندا عاسىرلار بويى جاتقان قامىستى الىپ تاستاپ, ول جەرگە جالتىراعان بەتون گرانيت تاقتالار قويعان سوڭ ىلعال تارتىپ جاتقانىن ايتادى. سونىمەن قاتار كۇمبەزدەگى تەسىكتەردى بىتەپ قانا قويماي, ىشكى جاعىن قالىڭ گيپسپەن بەس ەلىدەي ەتىپ جاپقان», دەدى ماقسات تولىقباەۆ.
دەپۋتات اتاپ وتكەندەي, 2021-2022 جىلى اتالمىش كەسەنەگە زەرتتەۋ-ساراپتاۋ جۇرگىزگەن «قازقايتاجاڭعىرتۋ» رەسپۋبليكالىق مەملەكەتتىك كاسىپورنى وعان «قاناعاتتانارلىق» دەپ باعا بەرگەن.
«مىنەكەي, وسىنداي ولقىلىقتاردىڭ كەسىرىنەن قوجا احمەت ياسساۋي كەسەنەسىنە جەر استىنا كەتىپ قالۋ قاۋپى ءتونىپ تۇر. قۇرمەتتى پرەمەر-ءمينيستردىڭ ورىنباسارى, اتا-بابالارىمىز «وتكەنىن جوعالتقاننىڭ – كەلەشەگى جوق» دەگەن ءسوزدى بەكەر قالدىرماعانى انىق. ءبىز بۇگىن , VI – عاسىردان استام ۋاقىت كۇللى تۇركى-تۇران حالقىنىڭ ۇلى جادىگەرى, قازاق مەملەكەتىن سان عاسىرلىق سىناقتاردان امان الىپ وتكەن حاندار مەن بيلەردىڭ, باتىرلار مەن قايراتكەرلەردىڭ پانتەونى, قوجا احمەت ياسساۋي كەسەنەسىن ساقتاۋعا مىندەتتىمىز. ماڭعىستاۋدا ءپىر بەكەت, تۇركىستاندا قوجا احمەت دەپ ماقتاناتىن تەڭدەسى جوق قۇرىلىسىمىزدى 6 كۇندە جەر استىنا جىبەرىپ الساق 6 قۇرلىقتىڭ الدىندا جەرگە قارايتىنىمىز انىق. ءبىز كوتەرگەن ماسەلە 2023 جىلدىڭ 10-25 قىركۇيەگىندە ساۋد ارابيا مەملەكەتىنىڭ ەر-رياد قالاسىندا وتەتەتىن بۇكىلالەمدىك مۇرا كوميتەتىندە تالقىلانباق. الايدا ارقانى كەڭگە سالىپ كۇتىپ وتىراتىن ۋاقىت جوق», دەپ قوستى ماقسات تولىقباەۆ.
دەپۋتاتتار التاي كولگىنوۆتەن كەسەنەنىڭ اينالاسىنداعى ساپاسىز, ولقىلىقتارى كوپ قۇرىلىستاردى كەشىكتىرمەي رەتتەۋگە جانە كەسەنەگە تونگەن قاۋىپتىڭ الدىن الۋعا نازار اۋدارۋدى سۇرادى.
