الماتى قالاسى سانيتارلىق-ەپيدەميولوگيا باقىلاۋ باسقارماسى باستىعىنىڭ ورىنباسارى اسەل قالىقوۆا بيىل ەپيدەميالىق ماۋسىم باستالعاننان بەرى مەديتسينا ۇيىمدارىنىڭ قىزمەتىنە كەنە شاققان 182 ادام, ونىڭ ىشىندە 15 جاسقا دەيىنگى 100 بالا جۇگىنگەنىن حابارلادى.
ول بارلىعىنا شۇعىل مەديتسينالىق كومەك كورسەتىلگەنىن, كەنەگە قارسى يممۋنوگلوبۋلين ەنگىزىلگەنىن اتاپ ءوتتى. 2022 جىلى كەنە بوررەليوزىنىڭ 9 جاعدايى تىركەلگەن. ال وسى جىلى مۇنداي دەرەك تىركەلمەگەن.
«كۇن جىلىنعان سوڭ كەنە ەنتسەفاليتى جانە كەنە بوررەليوزى سياقتى جۇقپالى اۋرۋلاردى تاسىمالدايتىن كەنەلەر پايدا بولادى. بۇل ماۋسىم ناۋرىزدان قازانعا دەيىن جالعاسادى. كەنەلەر مامىر, ماۋسىم ايلارىندا ءتىپتى كوبەيىپ كەتەدى», دەدى اسەل قالىقوۆا.
كەنە بوررەليوزىن ەمدەۋ تەك جۇقپالى اۋرۋلار اۋرۋحاناسىندا جۇرگىزىلۋى كەرەك. ەمدەلمەگەن جاعدايدا اۋرۋ اسقىنىپ جانە سوزىلمالى اۋرۋعا اينالىپ, كەيبىر جاعدايلاردا جۇيكە جۇيەسى مەن بۋىنداردىڭ زاقىمدانۋىنان مۇگەدەكتىككە اكەلەدى.
كەنە بوررەليوزىنىڭ الدىن الۋدىڭ بىردەن-ءبىر جولى - كەنە شاعۋدان قورعانۋ. سەرۋەندەۋگە, ساياجايعا نەمەسە ورماندى اۋماققا بارعاندا كەيبىر ەرەجەلەردى ساقتاۋ ماڭىزدى:
- جابىق كيىم كيۋ كەرەك. كەنەلەر كورىنەتىندەي, دەنەنى مۇمكىندىگىنشە جاۋىپ, كەنەلەردەن قورعاپ - شالباردى ەتىككە, ش ۇلىققا, كيىمنىڭ جوعارعى بولىگىن شالبارعا سالۋ كەرەك. كويلەككە, كۇرتەشەگە تىگىلگەن كۇلاپارا كيۋ نەمەسە شاشتى ورامالدىڭ, باس كيىمنىڭ استىنا بايلاعان ءجون;
- ورمان القاپتارىندا سەرۋەندەۋگە, جولدارمەن جۇرۋگە جانە بيىك شوپتەر مەن بۇتالاردان اۋلاق بولۋ كەرەك;
- كەنەلەردى ۇركىتەتىن زاتتاردى - رەپەللەنتتەردى قولدانۋ قاجەت.
- كيىمدى, دەنەنى جانە زاتتاردى ءجيى تەكسەرىپ, ۇيگە ورالعاندا دا كەنەنىڭ بار-جوعىن تەكسەرىپ الۋ كەرەك.
