«بارسەلونانىڭ» جەڭىستى جىلناماسىنا دا, قيىندىعىنا دا «كىنالى» – ونىڭ ۇزدىك سۇرمەرگەنى ليونەل مەسسي. وقىرمانعا تۇسىنىكتى بولۋ ءۇشىن اڭگىمەنى ارىدەن باستايىق. ەكىنشى مىڭجىلدىقتىڭ باسىندا بۇكىل الەم نازارى ارگەنتينالىق جاسوسپىرىمگە اۋدى. 17 جاستاعى بوزبالا الا دوپتى ۇرشىقشا ءيىرىپ, قارسىلاستى كۇتپەگەن جەردەن قاپى قالدىرىپ, جانكۇيەرلەرگە ەندى-ەندى تانىلا باستادى. كەلەشەكتە تالانتتى فۋتبولشىعا اينالاتىنىن تۇسىنگەن كلۋب باسشىلىعى بۇكىل ءباستى سوعان تىكتى. ەندى شە, بالا كەزىندە «بارسەلونا» سكاۋتتارى ونى ارگەنتينانىڭ روساريو قالاسىنان اتتاي قالاپ الدىردى. اۋرۋشاڭ بالدىرعاننىڭ بۇكىل ەم-دومىن تولەدى. اتا-اناسىن الىستاعى ارگەنتينادان جانعا جايلى بارسەلوناعا الدىرتىپ, جۇمىس تاۋىپ بەردى. قىسقاسى, مول قاراجات شىعىندادى. وسىندايدا ءۇمىتىڭدى اقتايمىن دەپ قۇلشىنىپ تۇرعان جاستىڭ قالاي بەتىنەن قاعادى؟
لەو وزىنە ارتىلعان سەنىمدى تولىعىمەن اقتادى دەسەك قاتەلەسپەيمىز. ونىڭ نەگىزگى قۇرامعا اۋىسۋىمەن «بارسەلونانىڭ» جەڭىستى جىلناماسى باستالدى. كوپ ۇزاماي-اق مەسسي قارسىلاس قاقپاشىسىنىڭ قورقىنىشتى تۇسىنە اينالدى. دوپتى اياعىنان الىستاتپايتىن مايتالمان ايىپ الاڭىنان دا, ونىڭ سىرتىنان دا گولدى قارشا بوراتتى. ءسويتىپ, 2009 جىلى مەسسي باستاعان فۋتبولشىلار الەمدە بۇرىن-سوڭدى كەزدەسپەگەن رەكورد جاسادى. ءبىر جىلدا مۇمكىن بولعان التى كۋبوكتى دا قانجىعاسىنا بايلادى.
ليونەل مۇنىمەن توقتاپ قالمادى. كومانداسىن جەڭىسكە جەتەلەۋدەن جاڭىلعان جوق. گولدى دا سالدى, ارىپتەسىنە ادەمى پاستى دا شىعارىپ بەردى. قىسقاسى, «بارسەلونانىڭ» جەڭىسىنە مول ۇلەس قوستى. ءتىپتى ءبىر جىلدا 91 گول سالىپ, ەشكىمگە بۇيىرماعان رەكورد ورناتتى. كاتالونيالىق كلۋب ساپىندا تەر توگىپ جۇرگەندە قول جەتكىزگەن تابىستارى ۇشان-تەڭىز. ون مارتە يسپانيا چەمپيونى اتاندى. ەل كۋبوگىن 7 رەت باسىنا كوتەردى. سەگىز مارتە يسپانيا سۋپەركۋبوگىنىڭ يەگەرى اتاندى. چەمپيوندار ليگاسىن ءتورت مارتە جەڭىپ, ۋەفا سۋپەركۋبوگىنە ءۇش رەت يە بولدى.
بۇدان بولەك, ونىڭ جەكە جەتىستىكتەرىنەن تاۋ تۇرعىزۋعا بولادى. جەتى مارتە «التىن دوپ» يەگەرى اتاندى. ەۋروپانىڭ بىرنەشە «التىن بۋتسىسىن» قانجىعاسىنا بايلاپ, يسپانيانىڭ ەڭ ۇزدىك سۇرمەرگەنى اتاعىن بىرنەشە رەت جەڭىپ الدى. ساناي بەرسەڭىز تاۋسىلمايدى.
بىراق, «بارسەلونانىڭ» جەڭىستى جىلناماسىنا مول ۇلەس قوسقانىمەن, ونىڭ ەكونوميكالىق تۇرعىدا السىرەۋىنە دە ءبىر ادامداي-اق اتسالىستى. كەز كەلگەن كوماندا ۇزدىك فۋتبولشىسىن ساقتاپ قالۋ ءۇشىن بارىن سالادى عوي. كلۋب باسشىلىعى لەو باسقا جاققا الاڭداماس ءۇشىن بار جاعدايدى جاسادى. بىرنەشە رەت كەلىسىمشارتتى جاڭارتىپ, مول جالاقى ۇسىندى. ءتىپتى قايبىر جىلى مەسسي الەمدەگى ەڭ كوپ جالاقى الاتىن فۋتبولشى اتانعانى ەسىمىزدە.
بۇدان قالا بەردى, كوماندالاستارىن دا ونىڭ ىڭعايىنا جىعىپ بەردى. ماسەلەن, 2009 جىلى «بارسەلونا» ساپىنا ۇزدىك شابۋىلشىنىڭ ءبىرى زلاتان يبراگيموۆيچ قوسىلعان. ەكى قوشقاردىڭ باسى ءبىر قازانعا سىيمادى. شۆەتسيالىق فۋتبولشىنىڭ تالانتتى ەكەنىنە قاراماستان, كلۋب باسشىلىعى ودان قۇتىلۋعا اسىقتى. ويتكەنى ونىڭ الاڭدا ءجۇرۋى مەسسيگە كەدەرگى كەلتىرەتىن.
بۇل از دەسەڭىز, كومانداعا جاڭادان قوسىلعان فۋتبولشىلار ءبىر-ءبىرىنىڭ اۋزىنا تۇكىرىپ قويعانداي مەسسيدى جەر-كوككە سىيعىزباي ماقتايتىن. ءتىپتى ونى بۇكىل كلۋبتان جوعارى قوياتىندار تابىلدى. اقىر سوڭىندا باپكەرلەردىڭ ءوزى ودان سەكەمدەنىپ, اياق تارتىپ سويلەيتىن. مۇنداي ماقتاۋ مەن ماراپات قويسىن با, مەسسي دە مىنەز تانىتا باستادى. الاڭنان الماستىرعاندا اشۋلاندى. قارسىلاسقا اۋىر ءسوز ايتتى. پاس بەرمەگەن ارىپتەسىن ايىپتادى. ايتقانىنا كونبەگەن جاس فۋتبولشىلارعا قىرىن قارادى. ءتىپتى بۇقارالىق اقپارات قۇرالدارىندا ليونەل الاڭعا كىمدى شىعارىپ, كىمدى قوسالقى قۇرامعا قالدىرۋ كەرەك ەكەنىن شەشەدى دەگەن قاڭقۋ اڭگىمە تارادى. قىسقاسى, «بارسەلونادا» جەكە باسقا تابىنۋ قاتتى ءورشىدى.
مول جالاقى ۇسىنىپ, بۇكىل كوماندانى ىعىنا جىعىپ بەرۋ سالدارىنان كاتالونيالىق كلۋبتىڭ ەكونوميكالىق جاعدايى دا قۇلدىرادى, كوماندانىڭ ويىن-ورنەگى دە قۇرتىلدى. اقىرى مەسسي باسقا كلۋبقا اۋىسقان سوڭ, «بلاۋگرانا» جەڭىستىڭ ءتاتتى ءدامىن ۇمىتىپ, تالاي مارتە ويسىراي ۇتىلدى دەسەك ارتىق ايتقاندىق ەمەس. قارجىلىق داعدارىسقا دا ۇرىندى. قازىرگى تاڭدا تۇرالاعان «بارسەلونا» ەندى-ەندى اياققا تۇرىپ كەلە جاتقانداي.
ارينە, كلۋبتىڭ قيىنشىلىعىنا تىكەلەي مەسسي كىنالى دەۋدەن اۋلاقپىز. بىراق كومانداداعى جەكە باسقا تابىنۋ سيندرومى «بلاۋگرانانى» باتپاققا باتىرعانى انىق. ەندەشە, ءبىر ادامدى اسىرا ماقتاپ, بۇكىل جەتىستىك سوعان عانا تەلىپ, «اق دەگەنى العىس, قارا دەگەنى قارعىسقا» اينالدىرۋدىڭ دۇرىس ەمەس ەكەنىن باسقالار دا تۇسىنسە يگى.
