كوللاجدى جاساعان قونىسباي شەجىمباي, «EQ»
جىل سايىن بيۋدجەتتەن قىرۋار قارجى بولىنگەنىمەن, بۇل تاراپتاعى جۇمىس مىسىقتابانداپ جىلجۋدا. بار شارۋانى اقىل تارازىسىنا سالساڭىز, ەلدى مەكەندەردىڭ اۋىز سۋعا جارىماي وتىرۋ سەبەبى, وسى شارۋانى اتقارماق بولىپ موينىنا العان, ياكي تەندەردى ۇتقان مەردىگەرلەردىڭ ءوز مىندەتىن دۇرىس اتقارماۋىنان دەگەن وي تۇيۋگە بولادى. بۇگىنگى تاڭدا وتىزعا جۋىق نىساننىڭ شارۋاسى – وتە وتكىر كۇيدە. ماسەلەن, كەيبىر جوبالاردى جۇزەگە اسىرۋ مەرزىمى وتسە دە, اياقتالۋى كوپ ۋاقىتقا سوزىلىپ كەتكەن. ونىڭ ىشىندە بەس جىل بويى ءتيىستى جۇمىسىن اتقارا الماي جۇرگەندەر دە بار. ماسەلەن, «مونوليت» سەرىكتەستىگى وبلىستىڭ بىرنەشە اۋدانىندا اۋىز سۋمەن جابدىقتاۋ جۇيەلەرىن سالۋ جانە جاڭعىرتۋ باعىتىندا التى جوبانى جۇزەگە اسىرۋدا. بۇل جۇمىسقا 2 ملرد تەڭگەدەن اسا بيۋدجەت قاراجاتى باعىتتالعان. وكىنىشكە قاراي, ءىس العا جىلجىر ەمەس. وسى ارادا ناقتى دەرەك كەلتىرە كەتەلىك. زەرەندى اۋدانىنا قاراستى الەكسەەۆكا اۋىلىنداعى سۋمەن جابدىقتاۋ نىسانىن تاپسىرۋ مەرزىمى كەلىسىمشارتتا 2021 جىل دەپ كورسەتىلگەن. ايتسە دە, قۇرىلىس جۇمىستارى كۇنى بۇگىنگە دەيىن اياقتالعان جوق. سىبايلاس جەمقورلىققا قارسى ءىس-قيمىل اگەنتتىگىنىڭ وبلىستىق دەپارتامەنتىنىڭ تەكسەرۋى كەزىندە سەرىكتەستىكتىڭ ماماندارى مەن تەحنيكاسىنىڭ جوق ەكەنى انىقتالعان. تەندەردەن ۇتقان «مونوليت» سەرىكتەستىگى بارلىق جۇمىستى قوسالقى مەردىگەر ۇيىمداردىڭ كۇشىمەن جۇرگىزىپ جاتىر. وزىندە ەشبىر ماتەريالدىق-تەحنيكالىق بازاسى جوق وسى سەرىكتەستىك ەلىمىزدىڭ التى وبلىسىندا 27 جوبانى جۇزەگە اسىرىپ جاتقان كورىنەدى. سوندا مەملەكەتتىك ساتىپ الۋ كونكۋرستارىنا قالاي قاتىسقان. ارينە, ماماندارى, قاجەتتى تەحنيكالارى بولماعاندىقتان, قۇرىلىس جۇمىسىنىڭ ۇزاققا سوزىلاتىنى بەلگىلى.
تاعى ءبىر مەردىگەر كومپانيا – ۇلىتاۋ وبلىسىندا تىركەلگەن «دانەكەر» جاۋاپكەرشىلىگى شەكتەۋلى سەرىكتەستىگى. بۇل سەرىكتەستىك ەرەيمەنتاۋ اۋدانىنا قاراستى سىلەتى ەلدى مەكەنىندە, بۇلاندى اۋدانىنىڭ ورتالىعى ماكينسك قالاسىندا, ءبىرجان سال اۋدانىنداعى ۇلگى اۋىلىندا سۋمەن جابدىقتاۋ جۇيەلەرىن سالۋمەن اينالىسادى. جوعارىدا اتالعان ءۇش نىساننىڭ جۇمىس كەستەسىندە دە ايتا قالارلىقتاي ارتتا قالۋشىلىق ورىن الىپ وتىر. ءبىرجان سال اۋدانىنىڭ اكىمى دوستانبەك ەسجانوۆتىڭ ايتۋىنا قاراعاندا, وتكەن جىلى كومپانيامەن شارت جاسالىپ, اۋىلدا سۋ جەلىسىن تارتۋ قۇرىلىسىن جۇرگىزۋ ءۇشىن قاراجات تولىق كولەمدە تولەنگەن. الايدا وسى ۋاقىتقا دەيىن جۇمىستىڭ 38 پايىزى عانا اياقتالىپتى. اكىمدىك امالسىزدان ءوز ىسىنە جاۋاپكەرشىلىكپەن قاراماعان مەردىگەرمەن شارتتى بۇزىپ, قىزمەت كورسەتۋشىنى جوسىقسىز دەپ تانۋ جانە تۇراقسىزدىق ايىبىن ءوندىرىپ الۋ ءۇشىن سوتقا جۇگىنگەن. اقشا ءوندىرىلىپ الار, بىراق وسى ۋاقىتقا دەيىن اۋىز سۋدىڭ ازابىن تارتىپ وتىرعان اۋىل تۇرعىندارىنا كۇردەلى جايدىڭ كۇرمەۋى نەلىكتەن شەشىلمەي وتىرعانىن قالاي تۇسىندىرۋگە بولادى؟ تاياۋدا جاڭا كونكۋرس جاريالانباق. ەندىگى مەردىگەر ءوز ىسىنە تياناقتى بولسا جارار ەدى. تسەلينوگراد اۋدانىندا دا وسى كومپانيامەن جاسالعان شارت بۇزىلعان. سوت شەشىمى بويىنشا سەرىكتەستىككە بيۋدجەتتەن تولەنگەن 40 ملن تەڭگەگە قاجەتتى قۇرال-جابدىقتى جەتكىزۋ تاپسىرىلعان. جالپى, «دانەكەر» سەرىكتەستىگى ەلىمىزدىڭ بىرقاتار وبلىسىندا تاپسىرىس بەرۋشىلەردىڭ 13 تالاپ-ارىزى بويىنشا جوسىقسىز قاتىسۋشى دەپ تانىلىپ وتىر.
بۇل تاراپتا ساقالدى قۇرىلىس از ەمەس. 2017 جىلدان باستاپ ششۋچە قالاسىنداعى سۋ جەلىلەرى مەن نىساندارىن سالۋ جانە بىرقاتار نىساندى جاڭعىرتۋ, بۋراباي كەنتى سۋ تازارتۋ قۇرىلىستارىن سالۋ جۇمىستارى جالعاسۋدا. 2018 جىلدان بەرى بۋراباي باۋرايىنداعى بالالاردى ساۋىقتىرۋ ورتالىقتارىنا قاجەتتى سۋ قۇبىرىنىڭ قۇرىلىستارى جۇرگىزىلۋدە. جۇمىس كەستەسىنىڭ ارتتا قالۋىنا بايلانىستى بۇل جوبالاردىڭ كوپشىلىگى بۇگىنگى تاڭدا تۇزەتۋدى قاجەت ەتەدى. سەبەبى قۇرىلىسقا قاجەتتى قۇرىلىس ماتەريالدارى كەيىنگى بەس جىل ىشىندە ايتارلىقتاي قىمباتتاپ كەتتى. مەردىگەر كومپانيالاردىڭ شالاعايلىعىنان سالماق بيۋدجەتكە ءتۇسىپ جاتىر. ۋاقىتىندا ورىندالماعاننان كەيىن وسىلاي بولاتىنى تۇسىنىكتى. تەك كومپانيا باسشىلارىنىڭ حالىقتىڭ قاراجاتىنا جانە امالسىز ساپاسىز سۋ ءىشىپ وتىرعانىنا كوڭىل اۋدارمايتىنى تۇسىنىكسىز.
اقمولا وبلىسى
