ەندى كارتالاردىڭ جانە ۇيىمدار انىقتامالىعىنىڭ دەرەكتەرى قازاق تىلىنە اۋدارىلادى. مۇنىڭ ارقاسىندا 2GIS-تە دۇكەندەردى, ءدارىحانالاردى, قوعامدىق تاماقتانۋ ورىندارىن, مادەنيەت مەكەمەلەرىن, كورىكتى جەرلەردى جانە باسقا دا ورىنداردى قازاقستاننىڭ مەملەكەتتىك تىلىندە دە ىزدەپ تابۋعا بولادى. اقتاۋ, اقتوبە, الماتى, استانا, اتىراۋ, قاراعاندى, كوكشەتاۋ, قوستاناي, قىزىلوردا, پاۆلودار, پەتروپاۆل, سەمەي, تاراز, تۇركىستان, ورال, وسكەمەن, شىمكەنت جانە ت.ب. سياقتى رەسپۋبليكانىڭ 41 قالاسى مەن 1245 ەلدى مەكەنىنىڭ انىقتامالىق دەرەكتەرى مەن كارتالارى اۋدارىلدى.
«جۇمىس بارىسىندا انىقتامالىق قۇرىلىمىن اۋدارۋعا قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ ماماندارى كومەكتەستى, كەيىن دەرەكتەردى ەگجەي-تەگجەيلى پىسىقتاۋعا ءبىز كومپانيادان تىس باسقا كاسىبي اۋدارماشىلاردى قوستىق», دەيدى 2GIS-ءتىڭ انىقتامالىق-كارتوگرافيالىق ءوندىرىس جونىندەگى ديرەكتورى ەلەنا تولكاچەۆا.
قوسىمشا الداعى ۋاقىتتا تەستىلەۋدەن وتەتىن بولادى.
«ەلىمىزدىڭ ءىرى قالالارى مەن اگلومەراتسيالارىنىڭ انىقتامالىعى مەن كارتالارى اۋدارىلدى. ەندى ءبىز جاڭارتىلعان سەرۆيستى اشىق تەستىلەۋگە كىرىسەمىز. ءبىز پايدالانۋشىلاردىڭ كەرى بايلانىسىن قۋانا قابىلدايتىن بولامىز. ونى قاتە تۋرالى حابارلار ارقىلى قوسىمشانىڭ وزىندە نەمەسە 2gis.kz سايتىندا قالدىرۋعا بولادى. مۇنداي حابارلار قازاق تىلىندە ىزدەۋ مەن سەرۆيستىڭ باسقا دا فۋنكتسيالارىنىڭ جۇمىسىن جەتىلدىرىپ, بولاشاقتا اۋدارمانى تولىقتىرۋعا كومەكتەسەتىن بولادى», دەدى ول.
