8 ساۋىردەن 6 مامىرعا دەيىن ەلوردادا «جاسىل استانا» ەكولوگيالىق ايلىعى وتەدى. ايلىق شەڭبەرىندە جالپىقالالىق ەكى سەنبىلىكتى – 22 ءساۋىر جانە 6 مامىر, ال ءۇش كوممۋنالدىق سەنبىلىكتى – 8, 15 جانە 29 ءساۋىر كۇندەرى – اۋداندىق اكىمدىكتەر مەن كوممۋنالدىق قىزمەتتەردىڭ كۇشىمەن وتكىزۋ جوسپارلانعان.
ەلوردادا العاشقى كوكتەمگى كوممۋنالدىق سەنبىلىك 8 ساۋىردە ءوتتى. ەڭبەك ۇجىمدارىنىڭ, قالا تۇرعىندارىنىڭ كومەگىمەن پوليگونعا 555,58 توننا قوقىس جينالىپ, شىعارىلدى. جالپى اۋدانى 2,5 ملن شارشى مەتردەن استام ساياباقتار مەن سكۆەرلەردى جيناۋ جۇرگىزىلدى. ءىس-شاراعا اۋداندىق اكىمدىكتەر, كوممۋنالدىق قىزمەتتەر, پيك جانە ميب ۇجىمدارى, شاعىن جانە ورتا بيزنەس سۋبەكتىلەرى بەلسەندى قاتىستى.
سونىمەن قاتار, ابىلاي حان داڭعىلى, قاجىمۇقان, پەتروۆ, بولەكپاەۆ, ا-105, بالتالى كوشەلەرىندە ءماسليحات دەپۋتاتتارى, تۇرعىندار مەن ەرىكتىلەر اعاش وتىرعىزدى.
ايتا كەتەيىك, 2022 جىلى استانادا ەكولوگيالىق سەنبىلىكتەر اياسىندا 6 مىڭ توننادان استام قوقىس جينالىپ, شىعارىلدى. سونداي-اق 2,7 ملن شارشى مەتر الاڭ جينالدى.
