ماسەلەن, 2021 جىلى ولارعا 24 اەك مولشەرىندە عانا نەمەسە 70 008 تەڭگە تولەنسە, بيىل ولار اي سايىن 345 000 نەمەسە 100 اەك مولشەرىندە ماتەريالدىق قامسىزداندىرۋ الادى.
بۇگىنگى تاڭدا وليمپيادا, پاراليمپيادا جانە سۋردليمپيادا جۇلدەگەرلەرىمەن قاتار, وليمپيادالىق سپورت تۇرلەرى بويىنشا الەم چەمپيونى اتاعىن جەڭىپ العان سپورتشىلار مەن ولاردىڭ جاتتىقتىرۋشىلارىنا دا 100اەك مولشەرىندە ءومىر بويىنا اي سايىنعى تولەم قاراستىرىلعان.
ايتا كەتۋ كەرەك, ماتەريالدىق قامسىزداندىرۋ ەل اۋماعىندا دەنە شىنىقتىرۋ جانە سپورت سالاسىندا كەمىندە جيىرما جىل ەڭبەك ءوتىلى بار, قازاقستان رەسپۋبليكاسىنىڭ ازاماتتىعىن العان سپورتشىلار مەن جاتتىقتىرۋشىلارعا ءومىر بويى تولەنەدى.
«اي سايىنعى ماتەريالدىق قامسىزداندىرۋ سپورتتا جوعارى ناتيجەگە يە بولعان سپورتشىلار مەن ولاردىڭ جاتتىقتىرۋشىلارى ءۇشىن ۇلكەن قولداۋ. سونىمەن قاتار بۇل جاسوسپىرىمدەر مەن جاستاردى سپورتپەن اينالىسىپ, چەمپيون اتانۋعا ىنتالاندىرادى. دۇنيەجۇزىلىك جارىستاردا ەلىمىزدىڭ نامىسىن قورعاپ, جۇلدە العان وتانداستارىمىزدى الەۋمەتتىك تۇرعىدا قورعاپ, قولداۋ ماسەلەسى مينيسترلىكتىڭ ءجىتى نازارىندا», دەدى مادەنيەت جانە سپورت ۆيتسە-ءمينيسترى سارسەن قۇرانبەك.
