كەشە بەيبىتشىلىك جانە كەلىسىم سارايىندا ساۋد ارابياسى كورولدىگىنىڭ قازاقستانداعى مادەنيەت كۇندەرىنىڭ ەلورداداعى اشىلۋ ءراسىمى ءوتىپ, ايشىقتى ساتتەر كوپ كوڭىلىنە شۋاقتى اسەر قوندىردى.
سارايعا اعىلا كوشكەن جۇرتقا قاز-قاتار تىزىلگەن يسلام مادەنيەتىنىڭ تاڭداۋلى وكىلدەرى فولكلورلىق ۇلگىدەگى مۋزىكالارىن شارىقتاتا اۋەلەتىپ, سىپايى ىزەتپەن قارسى الۋدا. يسلامي قۇندىلىقتار ورتاق بولعاندىقتان قوناقتار ۇسىنعان قاسيەتتى قۇرما جەمىسىنەن, ءزامزام سۋىنان ءدام تاتۋعا اركىم-اق ۇمتىلعان. كىرە بەرىستە ساۋد ارابياسى كورولدىگىنىڭ وتكەن, قازىرگى ءومىرى تۋرالى تۇشىمدى باياندايتىن ءتۇرلى پلاكاتتار, كىتاپشالار تەگىن تاراتىلىپ, مۇسىلمان ەلىنىڭ بەيمالىم قىرلارىن اشۋدا شەكسىز قىزمەت كورسەتىلۋدە.
مادەني شارا قاسيەتتى قۇران-كارىمنىڭ اياتىن جۇرەك تولقىر ماقاممەن وقۋمەن باستالىپ, ەكى ەلدىڭ مادەنيەت سالاسى باسشىلارىنىڭ قۇتتىقتاۋ لەبىزدەرىمەن جالعاستى. مادەنيەت ءمينيسترى مۇحتار قۇل-مۇحاممەد اراب باۋىرلاردىڭ ەلورداعا كەلۋى ۇلكەن تاريحي وقيعا بولىپ سانالاتىن سەبەبى ساۋد ارابياسى كورولدىگىنىڭ مادەنيەت كۇندەرى قازاق ەلىنىڭ استاناسىندا تۇڭعىش رەت وتكىزىلىپ وتىر دەي كەلىپ, يسلام وركەنيەتىندەگى مۇرات-مۇددەسى ءبىرەگەي ەلدەردىڭ ساياسي-ەكونوميكالىق الەۋمەتتىك-مادەني, ديپلوماتيالىق باعىتتاعى بايلانىستارى قارقىندى دامىپ كەلە جاتقانىن باياندادى. ساۋد ارابياسىن دۇنيە جۇزىندەگى ەكى ميللياردقا جۋىق ادامداردىڭ ەڭ قاسيەتتى مەكەنى بولىپ سانالاتىن يسلام دۇنيەسىنىڭ قوس كيەسىنىڭ شىراقشىسى, ۇستاۋشىسى رەتىندە بىلەتىنىن, قازاقستاننىڭ باسقا وڭىرلەرىن ايتپاعان كۇننىڭ وزىندە استاناداعى كوپتەگەن اسەم عيماراتتارعا ساۋديالىق باۋىرلاردىڭ قوسقان ۇلەسى ايرىقشا ەكەنىن, ونىڭ ىشىندە كورول ءفاحدتىڭ تىكەلەي شەشىمىمەن سەناتتىڭ عيماراتى, كارديولوگيالىق ورتالىق سياقتى اسا ۇلكەن مادەني, مەديتسينالىق كەشەندەر ساۋديالىقتاردىڭ بىزگە تەگىن كورسەتكەن كومەگىنىڭ ارقاسىندا سالىنعانىن ايتىپ, وسى ارالىقتا ەل پرەزيدەنتى نۇرسۇلتان نازارباەۆ ەكى رەت ساۋد ارابياسىنا رەسمي ساپارمەن بارىپ, ەكى ەل اراسىنداعى دوستىق قارىم-قاتىناستى بيىك دەڭگەيگە كوتەرگەنىن تىلگە تيەك ەتتى. مارتەبەلى قوناقتارعا بۇل سىزدەردىڭ دە وتاندارىڭىز, ويتكەنى يسلام وركەنيەتى ءبىرتۇتاس, مۇباراك دىنىمىزبەن جۇرەكتەر ارقىلى جاقىنداستىراتىن قاسيەتتى ءدىن بولعاندىقتان ءوز باۋىرلارىڭىزدىڭ ۇيىنە كەلدىڭىزدەر دەگەن تىلەك بىلدىرسە, ساۋد ارابياسى ءمادەنيەت جانە اقپارات ءمينيسترىنىڭ ورىنباسارى ءابۋ باكر بين احماد باكادير قاسيەتتى مەشىت ورنالاسقان جەردىڭ حالقىنىڭ سىزدەرگە زور سالەمىن جەتكىزگىم كەلەدى دەدى. وسىناۋ شارانى مەن ەكى ەل اراسىنداعى ەرەكشە سيپاتتاعى دوستىق قارىم-قاتىناستىڭ دالەلى دەپ بىلەمىن دەگەن ول ساۋد ارابياسىندا وتكەن قازاقستاننىڭ ءمادەنيەت كۇندەرىنە وتە جوعارى باعا بەردى. ءال-فارابي, سۇلتان بەيبارىس سياقتى ۇلى تۇلعالاردى دۇنيەگە اكەلگەن قازاق ەلىنە كەلۋ قۋانىشىنا يە بولعانىنا جانى مارقايدى.
كەرنەيشىلەر, ليفا-شوۋ, حابيتي-شوۋ, ساۋدي-شوۋ ونەرى اراب ەلىنىڭ ءار وڭىرلەرىندە ساقتالعان مۋزىكالىق ۇلگىلەردى ۇسىندى. كوشپەلىلەر مەكەنىنىڭ ءدۇبىرى ءدۇيىم دالاعا جايىلىپ, ساحارا سالتى ساعىنىش سازدارىمەن اسەم جەلپىدى. استانا مەن الماتىدا ارابيا مادەنيەتىن مەيلىنشە جايىپ كورسەتۋگە دايىن مەيماندار قولتاڭباسى تەك ساحنالىق كورىنىستەرمەن, مۋزىكالىق ارناۋلارمەن اياقتالماسى بەلگىلى. بۇگىن ول باسقا سارىندا جالعاسادى. تامەر بەن حەمدان ءال-حاربي, ميحرەز بەن سالەح ناسير, حاسان بەن ءالي كاليم شەبەرلەردىڭ قوس مەشىتكە ارناعان كورمەسى يماندى جۇرتتى يبالى ويعا جەتەلەيدى دەگەن سەنىمدەمىز. “پالما مەن قۇرما” كورمەسى ارابتاردىڭ ءومىرى تۋرالى تىڭ ماعلۇماتپەن قانىقتىراتىنى سەزىلەدى. ەلۋ ءبىر قىلقالام شەبەرىنىڭ كارتينالارى مەن ساندىق ونەردىڭ ون ەكى شەبەرى ازىرلەگەن بۇيىمدار كوڭىل ايناسىن شۋاقتاندىرىپ جىبەرەتىندەي. ەمال ونەرى مەن اراب جازۋىنىڭ مۇلتىكسىز شەبەرلەرى ۇسىنعان قۇندىلىقتار يسلام مادەنيەتىنىڭ زاماناۋي ۇندەرىن زاڭعار كوككە كوتەرۋدى اڭساعان مۇراتتار سىندى قابىلدانباق. وسى ءىس-شارا شەڭبەرىندە كەڭەس وداعىنىڭ ساۋد ارابياسى كورولدىگىندەگى ءبىرىنشى ەلشىسى ءنازىر تورەقۇلوۆقا ارنالعان ارابتىڭ كونە كىتاپتارى, سونداي-اق قولدانبالى, اسپازدىق ونەرلەر بويىنشا كورمەلەر ۇيىمداستىرىلماق. مادەنيەت مينيسترلىگى مەن “قازاقستان حالقىنىڭ رۋحاني دامۋ قورى” اكتسيونەرلىك قوعامىنىڭ ۇيىتقى بولۋىمەن وتەتىن ءار شارادان جان-دۇنيەنى نۇرلى تاڭمەن سەرگىتەر ەرەكشە ساز ەسەدى.
قاراشاش توقسانباي.
