ۇقك شەكارا قىزمەتى «زاستاۆا تارلاندارى» رەسپۋبليكالىق قوعامدىق بىرلەستىگىنىڭ الماتى قالالىق فيليالىنىڭ باسشىلىعى, ۇلتتىق ۇلاننىڭ اسكەر جانە لوكالدى قاقتىعىستارى ارداگەرلەرىنىڭ باسىن قوسقان ءىس-شاراعا «باسقا مەملەكەتتەر اۋماعىنداعى ۇرىس قيمىلدار ارداگەرلەرى مەن مۇگەدەكتەرىنىڭ» قوعامدىق بىرلەستىگى ۇيىتقى بولدى. مەملەكەتتىك ورتالىق مۋزەيدىڭ ءۇشىنشى قاباتىندا اشىلعان كورمە قوناقتارىن ۇلتتىق ۇلاننىڭ الماتى قالاسىنداعى اسكەري بولىمدەرىنىڭ بىرىنەن شاقىرىلعان اسكەري وركەستر اۋەزدى اۋەنمەن قارسى الدى. ءارى قاراي ەلىمىزدىڭ ءانۇرانى شىرقالىپ, شەكاراشى ارداگەرلەردىڭ «زاستاۆا تارلاندارى» رەسپۋبليكالىق قوعامدىق بىرلەستىگى الماتى قالالىق فيليالىنىڭ توراعاسى وتستاۆكاداعى گەنەرال-مايور مارات ماجيتوۆ ەرجۇرەك ۇلاندار تاعىلىمىن تەبىرەنە ەسكە الدى.
– وسىدان 28 جىل بۇرىن پامير تاۋىنداعى پشيحاۆر شاتقالىندا بەس ساعاتقا سوزىلعان قارۋلى قاقتىعىس كەزىندە ىشكى اسكەردىڭ 17 قازاق جاۋىنگەرى ەرلىكپەن قازا تاۋىپ, 33-ءى اۋىر جارالاندى. ال سونىڭ الدىندا عانا, 1994 جىلدىڭ قىركۇيەگىندە شەكاراشىلار وزدەرىنىڭ قايسار مىنەزدى قارۋلاستارى رادجان باتىرحانوۆتان ماڭگىگە ايىرىلىپ ەدى. ىشكى اسكەردىڭ ون جەتى ساربازى دا سول كۇنى رادجاننىڭ ەرلىگىن قايتالادى. ەستەلىك ەسكىرمەيتىنى سەكىلدى ەرلىك تە ەشقاشان ۇمىتىلمايدى. كەيىنگى ۇرپاقتىڭ جادىندا ماڭگى ساقتالىپ, جاستاردى پاتريوتتىق رۋحقا باۋليدى, – دەدى مارات ماجيتوۆ.
سونىمەن قاتار شەكارا قىزمەتىنىڭ ارداگەرى, وتستاۆكاداعى گەنەرال-مايور توقتاسىن بۋزۋباەۆتىڭ دا تاجىك-اۋعان شەكاراسى تۋرالى ايتار ەستەلىكتەرى از بولعان جوق. عيبراتتى ءىس-شارانى وتكىزۋگە مۇرىندىق بولعان ۇلتتىق ۇلاننىڭ ارداگەرى, زاپاستاعى پولكوۆنيك ەرلان الدانازاروۆ سول ءبىر قارالى كۇننىڭ كۋاگەرى رەتىنە وقيعانىڭ كارتيناسىن كوپشىلىكتىڭ كوز الدىنا اكەلدى.
– 7 ءساۋىر كۇنى قازا تاپقان 17 سارباز مەنىڭ روتامنىڭ جاۋىنگەرلەرى بولاتىن. بوزداقتار مەنىڭ كوز الدىمدا وققا ۇشقاندىقتان, ءالى كۇنگە دەيىن جانىما باتادى. ولاردىڭ بار كورەتىن قىزىقتارى ءالى الدا ەدى. اۋىر شايقاستان سوڭ مەن ۇرىستان امان شىققان جاۋىنگەرلەرىمە ەرلىك جاساعاندارىن ايتىپ, ريزاشىلىعىمدى ءبىلدىردىم. ەلگە قايتقىسى كەلەتىندەرگە رۇقسات بەرىلەتىنىن جەتكىزدىم. سوندا مەنىڭ روتامداعى جاۋىنگەرلەر ءبىر اۋىزدان قازا بولعان قارۋلاس جولداستارىنىڭ كەگىن قايتارماي, وزدەرىنىڭ ەلگە ورالمايتىندارىن ايتتى, – دەگەن ە.الدانازاروۆ بۇگىن ءبىزدىڭ ارامىزدا سول كۇنى بويلارىنداعى كۇشتى رۋحتىڭ ۇشقىنىن كورسەتكەن ساربازداردىڭ قاتارىندا بولعان ءۇش جاۋىنگەرىنىڭ وتىرعانىن تىلگە تيەك ەتتى.
ولار – ەلامان ۇمبەتوۆ, جۇماحان شاشۋباەۆ, جانات نەسىپوۆتەر ەكەن. كومانديرلەرىنىڭ وزدەرىنە كورسەتكەن لەبىزىنە بۇگىندە ەل اعاسىنا اينالعان ساربازدار قولدارىن كەۋدەلەرىنە قويىپ, ريزاشىلىق تانىتتى. وسىلايشا, ءوز ساربازدارىنىڭ ەرلىگىنە ەرەكشە توقتالعان ەرلان جارىلقاسىن ۇلى ءوزى باسقاراتىن «باسقا مەملەكەتتەر اۋماعىنداعى ۇرىس قيمىلدارى ارداگەرلەرى مەن مۇگەدەكتەرىنىڭ» قوعامدىق بىرلەستىگىنىڭ وسىنداي پاتريوتتىق رۋحتاعى ءىس-شارالاردى ۇزدىكسىز جالعاستىرا بەرەتىنىن جەتكىزدى.
سونىمەن قاتار تاعزىم ءىس-شاراسىن كوپشىلىككە تانىمال شەكارا قىزمەتىنىڭ ونەردەگى وكىلدەرى زامزاگۇل كەنجەباەۆا مەن باقتيار ەرماحانوۆ پاتريوتتىق رۋحتاعى اندەرىمەن ارلەدى. زامزاگۇل ءوزىنىڭ رادجان باتىرحانوۆقا ارناعان اۆتورلىق ءانىن ورىنداسا, باقتياردىڭ «گورياچيە توچكي» اتتى تۋىندىسى جينالعانداردىڭ جۇرەگىنەن ورىن الدى.
ون جەتى ساربازدى ۇلىقتاۋعا ارنالعان ءىس-شارانىڭ سوڭى قوناقتاردىڭ كورمەنى تاماشالاۋىنا ۇلاستى. مۇندا تاجىك-اۋعان شەكاراسىندا وتكەن ۇرىستىڭ جادىگەرىنە اينالعان زاتتار قويىلىپ, مۋزەي قابىرعاسىنا وتتى كۇندەردەن ماعلۇمات بەرەتىن كورنەكى قۇرالدار ىلىنگەن. اينەك استىنداعى ءاربىر زات وتكەن كۇننىڭ بەلگىسىندەي بولىپ, كوزگە وتتاي باسىلادى...
الماتى
