ء«سوز سوڭىندا بارشاڭىزدى عىلىم كۇنىمەن قۇتتىقتايمىن! عىلىم جولىندا جۇرگەن ازاماتتارعا شىنايى ريزاشىلىعىمدى بىلدىرەمىن.مەملەكەت عالىمداردىڭ ەڭبەگىن جوعارى باعالايدى جانە قولداۋ كورسەتە بەرەدى. ءبىز بۇگىن ءبىرىنشى وتىرىستى وتكىزدىك. الدا تاعى كوپتەگەن كەزدەسۋ بولادى.
مەنىڭ ۇسىنىسىم مىناداي: ءبىز عىلىمنىڭ دامۋىنا بايلانىستى ەڭ وزەكتى ماسەلەلەردى باسىمدىق رەتىندە وسى قۇراممەن تالقىلاپ, ءتيىستى شەشىمدەردى قابىلداۋىمىز كەرەك. ارينە, مەملەكەتتىڭ قارجىلىق مۇمكىندىگى شەكسىز ەمەس, ءبىز «كورپەگە قاراي كوسىلۋىمىز كەرەك». سوندىقتان اكادەميا باسشىلىعى مەملەكەت باسشىلىعىنا عىلىمنىڭ نەگىزگى باسىمدىقتارىن ۇسىنۋى قاجەت. بۇل – وتە ماڭىزدى جۇمىس», دەدى پرەزيدەنت عىلىم جانە تەحنولوگيالار جونىندەگى ۇلتتىق كەڭەستىڭ ءبىرىنشى وتىرىسى بارىسىندا.
سونىمەن قاتار پرەزيدەنت كۇنسۇلۋ زاكاريانى قازاقستان رەسپۋبليكاسى عىلىم اكادەمياسىنىڭ پرەزيدەنتى لاۋازىمىنا تاعايىندالعانىن اتاپ ءوتتى.
«كۇنسۇلۋ زاكاريا – كورنەكتى عالىم, بيولوگيا عىلىمدارىنىڭ دوكتورى, الەمدىك عىلىم قوعامداستىعىنا تانىمال پروفەسسور, وتاندىق «QazVac» ۆاكتسيناسىنىڭ اۆتورى, مەملەكەتتىك سىيلىقتىڭ لاۋرەاتى. پاندەميا كەزىندە قازاقستاننىڭ دەنساۋلىق ساقتاۋ جۇيەسىن كۇشەيتۋگە زور ۇلەس قوستى. ۇيىمداستىرۋ قابىلەتى جوعارى. سونىمەن قاتار عىلىم اكادەمياسىنىڭ بۇرىنعى پرەزيدەنتى, كورنەكتى عالىم مۇرات جۇرىن ۇلى جۇرىنوۆقا قاجىرلى ەڭبەگى ءۇشىن تاعى دا العىسىمدى ايتامىن. بارشاڭىزعا اماندىق تىلەيمىن! جۇمىستارىڭىز جەمىستى بولسىن!», دەپ ءسوزىن قورىتىندىلادى ەل پرەزيدەنتى.
كەڭەس وتىرىسىندا ۇلتتىق عىلىم اكادەمياسىنىڭ اكادەميگى اسقار جۇمادىلداەۆ, ۇلتتىق عىلىم اكادەمياسىنىڭ پرەزيدەنتى كۇنسۇلۋ زاكاريا, پۋردۋ (اقش) ۋنيۆەرسيتەتى يادرولىق ەنەرگەتيكا مەكتەبىنىڭ پروفەسسورى زينەتولا ەڭسەپوۆ, ۇلتتىق عىلىم اكادەمياسىنىڭ اكادەميگى جاكەن تايماعامبەتوۆ, گۋستاۆ روزي (فرانتسيا) ينستيتۋتىنىڭ ديرەكتورى ءارى دوتسەنتى مۇرات ساپارباەۆ, «ەكونوميكا ينستيتۋتىنىڭ» جاھاندانۋ جانە حالىقارالىق ىنتىماقتاستىق ءبولىمىنىڭ باس عىلىمي قىزمەتكەرى ورازالى سابدەن, اۋستريا عىلىم جانە تەحنولوگيا ينستيتۋتىنىڭ دوتسەنتى جانىبەك الپەيىشەۆ جانە لوس-الاموس ۇلتتىق زەرتحاناسىنىڭ (اقش) عىلىمي قىزمەتكەرى, تەحنيكا عىلىمدارىنىڭ كانديداتى ديار تالباەۆ ءسوز سويلەدى.
