قازىر ەلىمىزدە جاستاردىڭ جاس مولشەرىنىڭ ۇلعايتىلۋىمەن, NEET ساناتىنداعى جۇرتشىلىقتىڭ ۇلەسى ارتقانى بەلگىلى. الايدا وتكەن جىلدىڭ III توقسانىنىڭ وزىندە ەڭ جوعارى كورسەتكىشى ۇلىتاۋ وبلىسىندا – 12,7, شىعىس قازاقستان وبلىسىندا – 8,5, قاراعاندى وبلىسىندا – 9,4, قىزىلوردا وبلىسىندا 8 پايىز مولشەرىندە انىقتالعان. سونداي-اق وسى ساناتتاعى ازاماتتاردىڭ ەداۋىر بولىگى ماڭعىستاۋ وبلىسىندا – 7,5, تۇركىستان وبلىسىندا – 7,3, اقمولا وبلىسىندا 5,6 پايىزدى قۇرادى. وسى رەتتە «قازاقستاننىڭ ەكولوگيالىق قورى» مەن «ازاماتتىق باستامالاردى قولداۋ ورتالىعى» جانە اقپارات جانە قوعامدىق دامۋ مينيسترلىگىنىڭ قولداۋىمەن وزەكتى ماسەلەنى جاڭا جوبا ارقىلى شەشپەك.
– جاستار الەۋمەتتىك-دەموگرافيالىق ىلگەرىلەۋدە جانە ەلدىڭ باسەكەگە قابىلەتتى ورتاسىن قالىپتاستىرۋدا ماڭىزدى ورىن الادى. ولاردىڭ اراسىندا جۇمىسپەن دە, وقۋمەن دە اينالىسپايتىن ادامدار بارشىلىق. جاستاردىڭ وسى توپتا ۇزاق ۋاقىت بولۋى ولاردىڭ جوعارى ءومىر ءسۇرۋ مۇمكىندىگى مەن تابىستىڭ تۇراقتىلىعىن كۇرت تومەندەتەدى, كوبىنەسە ولاردى كەدەيلىك پەن دەنساۋلىق پروبلەمالارى مازالايدى. NEET ساناتىنداعى جاستاردىڭ الەۋمەتتىك-ەكونوميكالىق جاعدايىنىڭ تۇراقسىزدىعى ولاردىڭ قىلمىستىق جاۋاپكەرشىلىككە تارتىلۋ, نارازىلىق, ءدىني دەسترۋكتيۆتى اعىمدارعا كىرۋ قاۋپىن دە ارتتىرادى. سوندىقتان قازىر ءبىزدىڭ كۇش-جىگەرىمىز اۋىلدارداعى جاستار اراسىنان شىققان الەۋمەتتىك كاسىپكەرلەردىڭ ىسكەرلىك بەلسەندىلىگىن جاقسارتۋعا باعىتتالۋعا ءتيىس. بۇل اۋىلدارداعى تابىستى الەۋمەتتىك تاجىريبەلەردى انىقتاۋعا جانە ولاردى رەسپۋبليكالىق دەڭگەيگە شىعارۋعا مۇمكىندىك بەرەدى, – دەدى جوبا جەتەكشىسى ايگۇل ابدۋاليەۆا.
جالپى, باعدارلاما ءۇش نەگىزگى كونتسەپتسيا بويىنشا جۇمىس ىستەيدى. ەڭ الدىمەن اۋىلداعى جاستاردىڭ كاسىپكەرلىك بەلسەندىلىگىن ارتتىرادى. كەيىن جاستاردىڭ جۇمىس تابۋدىڭ جانە بيزنەس اشۋدىڭ, گرانتتار مەن ميكروكرەديتتەرگە ءوتىنىش بەرۋدىڭ, مەملەكەت تاراپىنان ستارتاپ باستامالارىنا قاتىسۋدىڭ قاراپايىم داعدىلارىن ۇيرەتەدى. سونداي-اق وسى ساناتتاعى حالىقتىڭ كەز كەلگەن جاۋاپتىلار تاراپىنان جۇزەگە اسىرىلىپ جاتقان باستامالاردان حاباردارلىعىن ارتتىرۋداعى كەدەرگىلەردى تالداپ, زەرتتەۋ جۇرگىزۋ جانە ونى كەڭىنەن تالقىلاۋ بويىنشا ۇسىنىستار ازىرلەيدى.
– جوبا تەك كاسىپكەر بولۋدى ويلايتىن ادام ەمەس, قازىردىڭ وزىندە كاسىپكەر بولا تۇرا ءوز ىستەرىن ىلگەرىلەتۋ جولدارىن بىلگىسى كەلەتىن جاندارعا, سونىمەن قاتار الەۋمەتتىك كاسىپكەرلىكتى دامىتۋعا مۇددەلى اۋىل تۇرعىندارىن قامتيدى. ءار توپ ءۇشىن ءبىز كومەك ۇسىنامىز جانە ماقساتتى بايلانىس ورناتامىز. وسى جىلى جوسپارلانعان نەگىزگى ءىس-شارالاردىڭ ىشىنەن ەلىمىزدىڭ بارلىق وڭىرلەرىندە كاسىپكەرلىككە باعىتتالعان مەملەكەت تاراپىنان جۇرگىزىلىپ جاتقان باعدارلامالار بويىنشا تۇسىندىرمە ماتەريالدارى بار بۇرىشتاردى ىسكە قوسقالى وتىرمىز. سونداي-اق اۋدان ورتالىقتارىندا اۋىل جاستارى ءۇشىن كوشپەلى دارىستەر مەن سەمينارلار وتكىزۋدى جوسپارلاپ وتىرمىز, وندا ەڭبەك نارىعىنداعى ترەندتەر مەن ونلاين-رەجىمدە ورىنداۋعا بولاتىن پەرسپەكتيۆالى ماماندىقتار تۋرالى قۇلاعدار ەتەمىز, – دەپ ءتۇسىندىردى باستاماعا جاۋاپتى ماماندار.
بۇل رەتتە وقىتۋ NEET ساناتىنداعى جاستاردى قوسا العاندا, كەمىندە 1 600 ادامدى قامتىماق. ولارعا جىل بويى 17 وڭىردە جاستاردى جۇمىسپەن قامتۋدى جانە ولاردىڭ كاسىپكەرلىك دەڭگەيىن دامىتۋدى, مەملەكەتتىك قولداۋ شارالارى تۋرالى اقپاراتتىق بۇرىشتاردى ازىرلەپ, اۋىل جاستارىن قولداۋ ءۇشىن قوعامداستىق پەن اقپاراتتىق رەسۋرس دايىنداۋ سياقتى جۇمىستار كەشەنى جوسپارلانعان.
