كەڭەس ۇلتتىق عىلىمي جۇيەنى باسقارۋ ءىسىن جەتىلدىرۋگە, عىلىم جانە عىلىمي-تەحنيكالىق قىزمەت سالاسىنداعى مەملەكەتتىك ساياساتتى ودان ءارى دامىتۋعا ىقپال ەتەدى. ستراتەگيالىق ماڭىزدى شەشىمدەر قابىلداۋعا وڭ سەپتىگىن تيگىزەدى دەگەن سەنىمىمىز زور.
قازىرگى ءداۋىر – قوعام ءومىرىنىڭ بارلىق سالاسىن قامتيتىن وزگەرىستەر كەزەڭى. ادامزات قوعامىنىڭ ودان ءارى ءوسىپ-وركەندەۋىندە عىلىمنىڭ اتقاراتىن ورنى ەرەكشە.
عىلىم دا, ءبىلىم دە ۇلتتىڭ باعا جەتپەس قازىناسى دەسەك, قازاق عىلىمى تاۋەلسىزدىك جىلدارىندا وزگەلەرمەن تەرەزەسى تەڭ بولۋ ءۇشىن دامۋدىڭ ايقىن جولىن تاڭداپ كەلەدى.
سوندىقتان قازىر مەملەكەتىمىزدىڭ باسشىسى قاسىم-جومارت توقاەۆ وتاندىق عىلىمعا باسا نازار اۋدارىپ وتىر. اسىرەسە, ۋنيۆەرسيتەتتەردىڭ عىلىمي الەۋەتىن كۇشەيتۋگە ءمان بەرۋ قاجەت ەكەنىن تىلگە تيەك ەتىپ ءجۇر.
راسىندا, عىلىم مەن تەحنولوگيانى, يننوۆاتسيانى دامىتۋ – ەلىمىزدىڭ باسەكەگە قابىلەتىن ارتتىراتىن نەگىزگى سالانىڭ ءبىرى. ءبىز وتاندىق عىلىمنىڭ باسىمدىقتارىن حالىقارالىق تالاپتارعا جانە ۇلتتىق مۇددەمىزگە سايكەس ايقىنداۋعا ءتيىسپىز. بۇل رەتتە ۇزدىكسىز كاسىبي ءبىلىم بەرۋ جۇيەسىندە ۋنيۆەرسيتەتتەردىڭ ورنى ايرىقشا. ويتكەنى جوعارعى ءبىلىم – عىلىم مەن مادەنيەتتىڭ توعىسقان جەرى.
جالپى, ەلىمىزدىڭ ۋنيۆەرسيتەتتەرى مەن عىلىم سالاسىنىڭ الدىندا كەزەك كۇتتىرمەس اۋقىمدى مىندەتتەرى كوپ.
انىعىن ايتۋ كەرەك, ۋنيۆەرسيتەتتەر مەن كاسىپورىنداردىڭ اراسىنداعى بايلانىستى كۇشەيتۋگە ەرەكشە ىقىلاس بولە باستادىق. ويتكەنى ءوندىرىس وشاقتارى مەن ۋنيۆەرسيتەتتىڭ زەرتحانالارى بىرىگىپ جۇمىس ىستەپ, بيزنەس وكىلدەرى عىلىمعا ارقا سۇيەپ, عالىمدارىمىزدىڭ مۇمكىندىگىن پايدالانا بىلگەندە عانا ءبىزدىڭ ەلىمىز الەمدەگى ىرگەلى مەملەكەتتەرمەن, ولاردىڭ الپاۋىت كومپانيالارىمەن باسەكەگە تۇسە الادى.
الدىڭعى قاتارلى ەلدەر عىلىمسىز, وزىق ءبىلىم مەن يننوۆاتسيالىق تەحنولوگيالارسىز مەملەكەتتىڭ ەكونوميكاسى مەن ازاماتتاردىڭ الەۋمەتتىك جاعدايىن تۇزەۋ مۇمكىن ەمەستىگىن جاقسى ءتۇسىنىپ, وزدەرىندە عىلىم سالاسىنىڭ دامۋىنا باسىمدىق بەرىپ, عالىمدارىن باعالاپ, ولاردىڭ جۇمىس ىستەۋىنە قولايلى جاعداي تۋعىزىپ جاتىر.
تاياۋدا مەملەكەت باسشىسى پارلامەنتتىڭ ءبىرىنشى سەسسياسىنىڭ اشىلۋىندا وتاندىق ەكونوميكانىڭ دامۋى عىلىمنىڭ جەتىستىكتەرىنە نەگىزدەلۋى ءتيىس ەكەنىن دە قاداپ ايتتى. عىلىمي ازىرلەمەلەر وندىرىسكە كەڭىنەن ەنگىزىلىپ, ەكونوميكانىڭ وسىمىنە ىقپال ەتۋى كەرەك. بۇل تۇرعىدا زەرتتەۋ ۋنيۆەرسيتەتتەرىنە ەرەكشە ميسسيا جۇكتەلەدى دەسەك, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى زەرتتەۋ ۋنيۆەرسيتەتى مارتەبەسىن العان-دى.
قازىرگى تاڭدا ۋنيۆەرسيتەت عالىمدارى ءارتۇرلى باعىتتا 200-دەن استام عىلىمي جوبانى جۇزەگە اسىردى. بۇل رەتتە ءبىز عىلىمي-وندىرىستىك ەكوجۇيەنى دامىتۋعا, ناقتى سەكتوردىڭ ءىرى كومپانيالارىمەن وزەكتى باعىتتار بويىنشا جان-جاقتى ىنتىماقتاستىقتى كەڭەيتۋگە باسا نازار اۋدارۋدامىز.
ەرلان سىدىقوۆ,
قازاقستان پرەزيدەنتى جانىنداعى عىلىم مەن تەحنولوگيا ماسەلەلەرى جونىندەگى ۇلتتىق كەڭەس مۇشەسى, اكادەميك
