نەگىزىندە, شاريعات بويىنشا تابيعي جولدار (اۋىز, مۇرىن, تىك ىشەك) ارقىلى ىشكە كىرگەن نارسە ورازانى بۇزادى. ال دەنە ارقىلى كىرسە ورازا بۇزىلمايدى. وعان: «تەرىدەگى جاسۋشالار ارقىلى ماي سەكىلدى زاتتىڭ ىشكە كىرۋى ورازانى بۇزبايدى», دەگەن ءپاتۋا دالەل.
يمام ءابۋ يۋسۋف پەن يمام مۋحامماد بۇل ۇكىمدى بىلاي تۇجىرىمداعان: «قارىنداعى جانە باستاعى تەرەڭ جارانى ەمدەۋ ورازانى بۇزبايدى».
ولاردىڭ پىكىرى بويىنشا, ورازا بۇزىلۋى ءۇشىن ءدارىنىڭ ىشكە نەگىزگى (تابيعي) جولدارمەن بارۋى شارت. سونداي-اق جارا ارقىلى ىشكە باراتىن جولدىڭ تىعىزدىلىعىنان جانە ەمدەلۋ بارىسىندا ونىڭ بىتەلىپ قالۋىنان ءدارىنىڭ ىشكە جەتۋى ەكىتالاي.
بىراق يمام ءابۋ حانيفا: «قارىنداعى نەمەسە باستاعى تەرەڭ جارانى ەمدەگەندە ءدارى ىشكە نەمەسە ميعا جەتكەنى ءۇشىن ورازا بۇزىلادى», دەگەن جانە سۇيىق ءدارىنىڭ ىشكە, ميعا جەتەتىنىن ەسكەرتكەن.
قازىرگى زامان عالىمدارى ينە ارقىلى سالىناتىن دارىلەردى سۋ سياقتى دەنەگە ازىق, قۋات بولاتىن جانە ەمدەلۋ ءۇشىن دەنەگە قۋات, ازىق بولمايتىن ەتىپ, ەكىگە ءبولىپ قاراستىرادى.
تەرى استىنا جانە بۇلشىق ەتكە ەمدەلۋ ءۇشىن دەنەگە قۋات, ازىق بولمايتىن ينە سالسا, اۋىز اشىلمايدى. بىراق كوك تامىرعا ينە سالۋ قان قۇيۋدان باسقا ماسەلەسىندە عالىمداردىڭ كوزقاراستارى بىردەي ەمەس. كوپ عالىمدار تامىرعا سالىناتىن ينە دەنەگە قۋات, ازىق بولماسا, ورازا بۇزىلمايدى دەيدى. وسىعان وراي, ەمدەلۋ جانە اۋرۋدىڭ الدىن الۋ ماقساتىندا دەنەگە (تەرى استىنا, بۇلشىق ەتكە, جامباسقا, كوك تامىرعا) ينە شانشىپ, ىشكە اس-سۋدىڭ ورنىن باسپايتىن پەنيتسيللين, ينسۋلين, ەكپە, دەنەنىڭ بەلسەندىلىگىن ارتتىراتىن, اۋىرسىنۋدى باساتىن, دەنەنى مۇزداتاتىن, دەنە قىزۋىن كەمىتەتىن دارىلەر مەن دارۋمەندەردى قولدانۋ ورازانى بۇزبايدى. دەمەك, ورازا تۇتاتىن ادام الدىمەن دارىگەردەن ينەنىڭ قانداي ءدارى ەكەنىن سۇراپ ءبىلۋى كەرەك. الايدا ورازا كەزىندە ينە سالۋ قاتتى قاجەت بولماسا, ونى اۋىز اشقاننان كەيىن نەمەسە رامازان ايىنان تىس كۇندەرگە قالدىرعان ابزال.
