جوسپارعا ساي ساۋىردە پقوپ 366 مىڭ توننا مۇناي وڭدەۋى قاجەت. بەنزين ءوندىرىسى 110,1 مىڭ توننا, ديزەل وتىنى – 114,8 مىڭ توننا, سۇيىتىلعان مۇناي گازى – 15,1 مىڭ توننا, اۋە وتىنى – 19,3 مىڭ توننا, مازۋت – 77,6 مىڭ توننا كولەمىندە جوسپارلانىپ وتىر.
بارلىق جوندەۋ جۇمىستارى ۋاقتىلى, ال كەيبىرى ۋاقىتىنان بۇرىن ورىندالدى. ماسەلەن, مۇنايدى باستاپقى ايداۋ قوندىرعىسى جۇمىس رەجيمىنە جوسپارلى مەرزىمىنەن ءبىر تاۋلىك بۇرىن, كاتاليتيكالىق كرەكينگ قوندىرعىسى 5 تاۋلىك بۇرىن شىعارىلدى.
مۇنايدى باستاپقى ايداۋ, كاتاليتيكالىق ريفورمينگ, ديزەل وتىنىن گيدروتازارتۋ, كەروسيندى گيدروتازارتۋ, كاتاليتيكالىق كرەكينگ قوندىرعىلارىنىڭ جەكەلەگەن بولشەكتەرىن اۋىستىرۋ, قالپىنا كەلتىرۋ جانە جابدىقتارىن باپتاۋ سياقتى ءىس-شارالار اتقارىلدى.
جوندەۋ جۇمىستارىنا 22 مەردىگەر ۇيىم مەن 1305 مامان جۇمىلدىرىلدى. جۇرگىزىلگەن جوندەۋ ماقساتى – زاۋىت جابدىقتارىنىڭ كەپىلدى جۇمىسىن قامتاماسىز ەتۋ. «ازاماتتىق قورعاۋ تۋرالى» زاڭىنىڭ تالاپتارىنا ساي جابدىقتار مەن تەحنيكالىق قۇبىرلارعا تەحنيكالىق كۋالاندىرۋ مەن ونەركاسىپتەگى قاۋىپسىزدىگىنە ساراپتاما جۇرگىزىلدى.
وتكەن جىلدىڭ قورىتىندىسى بويىنشا «پقوپ» جشس رەكوردتىق كولەمدە 6,2 ملن توننا مۇناي وڭدەگەنىن ايتا كەتۋ كەرەك.
بۇعان دەيىن مەملەكەت باسشىسى قاسىم-جومارت توقاەۆ زاۋىتتىڭ وندىرىستىك قۋاتىن ارتتىرۋ جانە مۇناي وڭدەۋ كولەمىن جىلىنا 12 ملن تونناعا دەيىن ۇلعايتۋ مىندەتىن قويعان ەدى.
