جازيرا دالانى مىڭسان بوياۋعا شومىلدىرعان اسەم گۇلدەر, دۇنيەگە جان بىتىرگەن شۇعىلالى كوكتەم, سىلدىراپ اققان تاۋ وزەنى, بۋىرقانعان اساۋ تەڭىز ۇلكەن ارمانعا قول سوزعان كىشكەنتاي سۋرەتشىلەردىڭ كەنەبىندە تىپتەن قۇلپىرا تۇسكەن. «شىعارماشىل الاڭ» دەپ اتالعان كورمەگە قاتىسقان ءار جەتكىنشەكتىڭ ءومىردى ءوز ىشكى الەمىندەي تازا قالپىندا قابىلداۋى, ارمانى, ونەرگە قۇشتارلىعى بويعا شابىت بەرەدى. كورمەگە الماتى قالاسىنىڭ 100-دەن استام بالالار شىعارماشىلىعىن دامىتۋ جانە بەينەلەۋ ونەر ورتالىعىنىڭ وقۋشىلارى قاتىسىپ, بەينەلەۋ جانە ساندىك-قولدانبالى ونەر جانرىنداعى ءارتۇرلى جۇمىستارىن ۇسىندى.
مەملەكەتتىك ورتالىق مۋزەي ديرەكتورى راشيدا حاريپوۆا بالالار شىعارماشىلىعىن قولداۋ مۋزەي جۇمىسىنىڭ ماڭىزدى باعىتتارىنىڭ ءبىرى ەكەنىن ايتادى. ويتكەنى كەلەشەك ۇرپاقتى ونەرگە باۋلۋ, رۋحاني قۋاتى مىقتى كوشكە اينالدىرۋ – جاۋاپتى مىندەت. اتالعان ءىس-شارا مادەنيەت وشاعىنىڭ بۇل باعىتتاعى جاڭاشىل باستامالارىنىڭ ءبىرى. بالعىن ونەرپازداردى ىنتالاندىرۋعا ارنالعان جوبالار ءداستۇرلى تۇردە جالعاسىن تاپپاق.
«بالالاردىڭ كورمەگە قاتىسۋى ولارعا ەلىمىزدىڭ تاريحى, ونەرى, مادەنيەتىمەن تانىسۋعا, تۋعان جەرىنىڭ ۇلتتىق قۇندىلىقتارى, داستۇرلەرى مەن سۇلۋلىعى تۋرالى تۇسىنىكتەرىن كەڭەيتۋگە مۇمكىندىك بەرەدى. بۇل وتانعا, ءوز حالقىنا دەگەن سۇيىسپەنشىلىكتەرىن وياتادى. سوندىقتان جاس سۋرەتشىلەر ءوز جۇمىستارىندا قورشاعان الەمگە, ەلدىڭ وتكەنى, بۇگىنى مەن بولاشاعى تۋرالى ءوز كوزقاراستارىن بىلدىرۋگە تىرىستى. بالالار قازاقستاننىڭ تاريحى, مادەنيەتى, تابيعاتىمەن بايلانىستى ءتۇرلى اسپەكتى مەن سيۋجەتتى بەينەلەيدى. بۇل كوركەم پەيزاجدار, ادامداردىڭ پورترەتتەرى جانە ناتيۋرمورتتار, قالانىڭ كوشەلەرى مەن كورىكتى جەرلەرى, تاۋەلسىز مەملەكەتىمىزدىڭ رامىزدەرى بالالاردىڭ ارماندارىن قاناتتاندىرا تۇسكەن», دەيدى مۋزەي ديرەكتورىنىڭ ورىنباسارى سەرجان ساروۆ.
بالدىرعان سۋرەتشىلەردى ءبىر الاڭدا توعىستىرعان ونەر جارمەڭكەسىندە «دا ۆينچي», «ۆۋ ArT», «ارتميكس», ء«بىلىم ستۋدياسى», «كلاسس», «داريا» بالالار شىعارماشىلىعى ورتالىقتارىنىڭ شاكىرتتەرى ەرەكشە كوزگە ءتۇستى. ولاردىڭ اراسىندا رەسپۋبليكالىق, حالىقارالىق بايقاۋلاردا جۇلدە العان تالانتتى سۋرەتشىلەر بار. سونىمەن بىرگە كورمەنىڭ اشىلۋىندا ونەر كورسەتكەن «سەم چۋدەس سۆەتا» بالالار تەاترى, «اي-كەربەز» بي توبى مەن «فيەستا» بي ءانسامبلى كوپشىلىكتىڭ ىقىلاسىنا بولەندى.
جاس سۋرەتشىلەردىڭ يدەيالارى مەن شىعارماشىلىق نيەتتەرىن كورسەتەتىن كوركەمونەر مەكتەپتەرى مەن بەينەلەۋ ستۋديالارى وقۋشىلارىنىڭ اۆتورلىق جۇمىستارىنا ەلىمىزدىڭ باياندى بولاشاعىن, جارقىن تابىستارىن تانىتاتىن تاقىرىپتار ارقاۋ بولعان. ونەرتانۋشى ەلەنا يساكوۆا: «بالالاردىڭ جۇمىستارى وتە كوركەم, اشىق, ەرەكشەلىگى مەن ءار الۋان بولعاندىعى سونداي, ولاردىڭ قورشاعان الەمگە دەگەن قۋانىشتى كوزقاراسى مەن قيال كوكجيەگى تاڭعالدىردى», دەپ وي ءبولىستى.
الماتى
