سكانديناۆيا تۇبەگىندە قازاق ەلىنىڭ نامىسىن مىنا دوپتى حوككەيشىلەر قورعادى: قاقپاشىلار – ۆياچەسلاۆ گورچاكوۆ پەن بەرجان احمەتجانوۆ. الاڭداعى ويىنشىلار – ەلامان الىپقاليەۆ, ەرشات امانگەلديەۆ, نۇربول بوكەشوۆ, پەتر گريبانوۆ, دەنيس ماكسيمەنكو, بولات مۇحيت, داۋرەن ورالوۆ, انتون سۆەشنيكوۆ, ەسكەندىر نۇعمانوۆ, نيكيتا ياروۆ, سامات امانشين, راۋان يساليەۆ, قۋانىش تەمىرالين, سۇلتان قادىرجانوۆ, ەۆگەني مەدۆەدەۆ جانە ماكسيم ۋتەباليەۆ.
قازاقستاننىڭ دوپتى حوككەيشىلەرى تۇساۋكەسەر كەزدەسۋىن سۋومي ەلىنىڭ وكىلدەرىمەن وتكىزدى. كەزىندە وسى كوماندامەن تەرەزەسى تەڭ ويناۋشى ەدىك. بىراق سوڭعى جىلدارى ولار قاتتى كۇشەيگەن ەكەن. ال ءبىز بولساق, كەرىسىنشە, كەرى كەتىپ بارامىز. باسەكە باستالعان بەتتە تىزگىندى مىقتاپ قولعا العان فيندەر قاقپامىزعا ءۇش دوپ سوقتى. بۇل گولداردىڭ اۆتورلارى – دجيممي حەينونەن, يااوكو حيۆونەن جانە ەميل فەدوروۆ. 37-مينۋتتا سامات ءامانشيننىڭ ادەمى پاسىنان كەيىن راۋان يساليەۆ نىسانانى ءدال كوزدەدى. سول كەزدە كەۋدەمىزدە ءۇمىت وتى مازداعان ەدى. بىراق قايتا قاھارىنا مىنگەن فينليانديا قۇراماسى تاعى بەس دوپتى قاقپامىزعا توعىتتى. ەسەپ – 8:1.
قازاقستان قۇراماسى كەلەسى كەزدەسۋىن اقش سپورتشىلارىمەن وتكىزدى. بۇل باسەكەدە جەرلەستەرىمىز ايقىن باسىمدىق تانىتتى. ءبىزدىڭ جىگىتتەر اراسىنان راۋان يساليەۆ, قۋانىش تەمىرالين جانە ماكسيم ۋتەباليەۆ دۋبلدەردىڭ اۆتورى اتانسا, تاعى ءبىر گولدى پەتر گريبانوۆ سوقتى. امەريكالىقتاردىڭ ەكى دوپپەن عانا جاۋاپ قايىرۋعا كۇشتەرى جەتتى – 7:2.
ءۇشىنشى تۋرداعى قارسىلاسىمىز نورۆەگيا بولدى. ادەتتە بۇل كوماندانى ەش قينالماي ۇتاتىن ەدىك. بىراق بۇل جولى ويسىراي جەڭىلدىك. سكانديناۆيالىق بەنديشىلەر قاقپامىزعا التى گول سوقسا, ءبىزدىڭ جىگىتتەر ءبىر رەت قانا مەرگەندىك تانىتتى – 6:1. راۋان يساليەۆ ۇيىمداستىرعان جىلدام شابۋىلدى دەنيس ماكسيمەنكو ءساتتى اياقتادى. توپتىق ءتۋرنيردىڭ سوڭعى سايىسىنداعى قارسىلاستارىمىز شۆەتسيا ەدى. جارىس قوجايىندارى قاقپامىزعا جاۋاپسىز 12 دوپ سالدى – 12:0. قازاقستان قولا مەدال ءۇشىن قايتا نورۆەگيا قۇراماسىمەن كۇش سىناسىپ, تاعى دا ۇتىلدى. ەسەپ – 1:5. وسىلايشا, اتالعان جارىس جەرلەستەرىمىز ءۇشىن ءساتسىز اياقتالدى.
وتكەنگە زەر سالساق, دوپتى حوككەيدەن الەم چەمپيوناتىنىڭ تۇساۋى 1957 جىلى كەسىلدى. اتالعان جارىستىڭ العاشقى توعىزى كسرو قۇراماسىنىڭ جەڭىسىمەن اياقتالدى. 1981, 1983, 1987 جىلدارى شۆەتسيا كومانداسى شاشاسىنا شاڭ جۇقتىرماسا, 1985, 1989 جانە 1991 جىلدارى قايتا كەڭەس وداعىنىڭ ويىنشىلارى ۇستەمدىك قۇردى. ودان كەيىن قىزىلدار يمپەرياسى كەلمەسكە كەتتى. وسى كۇنگە دەيىن 39 مارتە جالاۋى جەلبىرەگەن جارىستىڭ 14-ءى كسرو جەڭىسىمەن اياقتالسا, شۆەدتەر مەن رەسەيلىكتەر 12 مارتە الدارىنا جان سالمادى. تاعى ءبىر ءدۇبىرلى دودا فينليانديانىڭ جەڭىسىمەن اياقتالدى.
دۇنيەجۇزىلىك دوداعا قازاقستان قۇراماسى 1995 جىلدان بەرى ۇزدىكسىز قاتىسىپ كەلەدى. سول كەزدەن بەرى التى رەت قولا مەدالعا قول جەتكىزدى. العاشقى جۇلدەنى 2003 جىلى ارحانگەلسكىدە السا, 2005 جىلى قازاندا, 2012 جىلى الماتىدا, 2013 جىلى ۆەنەرسبورگتە, 2014 جىلى يركۋتسكىدە جانە 2015 جىلى حاباروۆسكىدە سول ناتيجەنى قايتالادى. 13 رەت ءتورتىنشى ورىنعا تابان تىرەسە, تاعى ەكى جارىستا بەسىنشى ساتىعا تۇراقتادى. وكىنىشكە قاراي, 2016-2019 جىلدار ارالىعىندا ۇيىمداستىرىلعان سوڭعى ءتورت چەمپيوناتتان قورجىنىمىز بوس قايتتى. ال 2020 مەن 2021 جىلدارداعى جارىس جەر-جاھاندى جايلاعان پاندەميانىڭ سالدارىنان وتپەي قالسا, 2022 جىلعى دودا رەسەي مەن ۋكراينانىڭ اراسىنداعى جاعدايعا بايلانىستى كەيىنگە شەگەرىلدى.
وزدەرىڭىز بايقاپ وتىرعانداي, باس جۇلدە ءۇشىن تارتىس نەگىزىنەن شۆەتسيا مەن رەسەي اراسىندا وتەدى. ال قولا مەدال ءۇشىن سايىستا كوبىنە-كوپ فينليانديا مەن قازاقستان قۇرامالارىنىڭ جولدارى قيىسادى. بۇل باسەكەلەردە جەرلەستەرىمىز التى رەت جەڭىسكە جەتسە, سۋومي ەلى وكىلدەرىنىڭ 11 مارتە مەرەيى ۇستەم بولدى. سونداي-اق ءبىزدىڭ بەنديشىلەردى شۆەتسيا ەكى جانە رەسەي ءبىر رەت قولا جۇلدەدەن ايىردى.
قازاقستان قۇراماسى ساپىندا ونەر كورسەتكەندەر اراسىندا مۇزايدىندا جاسىنداي جارقىلداعان ويىنشىلار دا از ەمەس. ماسەلەن, 2012 جىلى الماتىدا وتكەن جارىستىڭ قورىتىندىسى بويىنشا اندرەي رەين ەڭ ۇزدىك قاقپاشى بولىپ تانىلدى. 2014 جىلى يركۋتسكىدە الەكساندر ناسونوۆ ەڭ قۇندى حوككەيشىگە تيەسىلى ارنايى سىيلىقتى يەلەندى. 2018 جىلى حاباروۆسكىدە راۋان يساليەۆ مەرگەندەر كوشىن باستادى. ورالدىڭ دوپتى حوككەي مەكتەبىنىڭ تۇلەگى التى رەت مۇز ايدىنىنا شىعىپ, 21 رەت قارسىلاستار قاقپاسىن ءدال كوزدەدى. سول سەكىلدى ءار جىلدارى الەمنىڭ شارتتى قۇراماسىنا ەنگەن تاعى بىرنەشە جەرلەسىمىز بار.
