«قارجى پيراميدالارى بىرنەشە تۇرگە جىكتەلەدى. كلاسسيكالىق پيراميدادا ءبىر ادام كەلىپ, اقشاسىن سالىپ, ارتىنان تاعى 2-3 ادامدى الىپ كەلۋى كەرەك. ياعني كەيىن كەلگەن ادامداردىڭ ەسەبىنەن بۇرىن كەلگەن ازاماتتاردىڭ قالتاسى قالىڭدايدى. بۇل – كلاسسيكالىق ءتۇرى. سونىمەن قاتار جەلىلىك ماركەتينگ اتىن جامىلىپ وتىرعان پيراميدالار بار. ولاردا تاۋار نە مۇلدەم جوق نەمەسە باعاسىن شارىقتاتاتىن تاۋارلاردى ساتۋ ارقىلى پايدا تابۋدى كوزدەيدى. ءتۇرلى ينۆەستيتسيالىق كومپانيالاردىڭ اتىن جامىلعان قارجى پيراميدالارى دا بار. ولار كوبىنە قۇندى قاعازدار نارىعىنا اقشا سالۋدى ۇسىنىپ, تاعى دا باسقا اكتسيالار تۋرالى ايتىپ جاتادى. ادامنىڭ بۇل سالادان بەيحابار ەكەنىن اقپارات جوقتىعىن پايدالانا وتىرىپ, ءتۇرلى تەرميندەردى جاۋدىرىپ ايتادى. قارجىلىق ساۋاتتىلىعى, قارجى سالاسىنداعى ءبىلىمى وتە جوعارى بولعان ازاماتتاردىڭ وزدەرى اكتسيا نارىعىندا كوبىنەسە ۇتىلىپ جاتادى. سوندىقتان وسىعان مۇقيات بولۋ كەرەك», دەدى قارجىلىق مونيتورينگ اگەنتتىگىنىڭ رەسمي وكىلى الىبەك ءابدىلوۆ.
كەيىنگى كەزدە پايدا بولعان قارجى پيراميداسىنىڭ تاعى ءبىر ءتۇرى – كريپتوالاڭداردا پايدا تابۋدى ۇسىنۋ. سپيكەردىڭ ايتۋىنشا, مۇنىڭ ءوزى بەلگىلى ءبىر دايىندىقتى, بەلگىلى ءبىر جوعارى ساۋاتتىلىق پەن ءبىلىمدى قاجەت ەتەتىن بىردەن-ءبىر سالا.
«ەڭ بىرىنشىدەن, سىزگە اقشانى ينۆەستيتسيالاۋدى ۇسىنىپ جاتسا, ەڭ باستىسى سول كومپانيا تۋرالى تولىققاندى اقپاراتتى ءبىلىپ الۋىڭىز كەرەك. قارجى نارىعىن رەتتەۋ جانە دامىتۋ اگەنتتىگىنىڭ سايتىندا ارنايى رەەستر بار, سول ارقىلى جەكە تۇلعالاردان, ياعني ازاماتتاردان اقشا تارتۋ تۋرالى ليتسەنزياسىنىڭ بار-جوقتىعىن تەكسەرىپ الۋ كەرەك. ودان كەيىن قازىرگى اقپاراتتىڭ قولجەتىمدىلىگى زامانىندا كومپانيا تۋرالى كەز كەلگەن اقپاراتتى الۋعا بولادى», دەدى.
بىلتىردىڭ وزىندە 6,5 مىڭ سايت بۇعاتتالسا, بيىل جىل باسىنان بەرى 3 مىڭعا جۋىق سايت جۇمىسى شەكتەلگەن. سونداي-اق قارجىلىق مونيتورينگ اگەنتتىگى تەلەگرام مەسسەندجەرىندە «بايقا, پيراميدا» دەگەن بوت جاساپ شىعاردى. ەندى كەز كەلگەن ازامات قانداي دا ءبىر الەۋمەتتىك جەلىنىڭ نەمەسە سايتتىڭ سىلتەمەسىن الىپ, سول بوتقا جىبەرە الادى.
اگەنتتىك باسقارما باسشىسىنىڭ ورىنباسارى اندرەي داۆىدوۆتىڭ ايتۋىنشا, ادامدار, وكىنىشكە قاراي, تەز جانە كوپ اقشا تابۋعا ۇمىتتەنىپ, الاياقتاردىڭ تۇزاعىنا تۇسەدى. سوندىقتان جەلىدەگى تەز تابىس تۋرالى بارلىق ۇسىنىستارعا اسا ساقتىقپەن قاراۋ كەرەك.
ء«اربىر قارجى پيراميداسى ءتورت كەزەڭنەن وتەدى: باستاۋ-ءوسۋ-داعدارىس-كۇيرەۋ. ءبىزدىڭ مىندەتىمىز – جالعان قارجى كومپانيالارىن ولاردىڭ جۇمىس ىستەۋىنىڭ ەرتە ساتىسىندا انىقتاۋدى قامتاماسىز ەتۋ. ول ءۇشىن مۇددەلى مەملەكەتتىك ورگاندارمەن ءوزارا ءىس-قيمىلدىڭ ارنايى الگوريتمى ازىرلەندى», دەدى قما وكىلى.
سونداي-اق ول جاساندى زەردەنىڭ قارجى پيراميدالارىن ۇيىمداستىرۋشىلاردى ۇستاۋعا كومەكتەسەتىنىن دە اتاپ ءوتتى. سپيكەردىڭ ايتۋىنشا, IT قۇرالدارىن پايدالانا وتىرىپ, ينتەرنەت كەڭىستىگىندە (جاڭالىقتار پورتالدارى, بلوگتار, سايتتار, الەۋمەتتىك جەلىلەردىڭ اككاۋنتتارى) زاڭسىز كونتەنتتى ىزدەۋ جۇزەگە اسىرىلادى.
«وتكەن جىلدىڭ سوڭىندا قازاقستان رەسپۋبليكاسىنىڭ قارجىلىق مونيتورينگ اگەنتتىگى (قما) قارجى پيراميدالارىنا جازىلۋشىلاردىڭ نىسانالى اۋديتورياسىمەن اقپاراتتىق-ءتۇسىندىرۋ جۇمىستارىن ماقساتتى جۇرگىزۋگە مۇمكىندىك بەرەتىن تالدامالىق جۇيەنى ەنگىزدى. بيىلعى 5 ايدا 39 مىڭ ەسكەرتۋ حابارلاماسى جىبەرىلدى. كۇدىكتى اككاۋنتتاردان 38,2 مىڭ ادام باس تارتتى. قما جۇيەسىندە قارجى پيراميداسىنىڭ ارنايى ءمودۋلىن ىسكە اسىرۋ جوسپارلانۋدا. ول الەۋەتتى قاتىسۋشىلار ۇيىمدارىنىڭ قوسىلۋىن انىقتاۋعا قابىلەتتى, وڭىرلەر بولىنىسىندە قارجى پيراميدالارىنىڭ ءوزىن قاراستىرۋ كوزدەلگەن, سونداي-اق ولاردىڭ تارالۋ وشاقتارى انىقتالادى», دەيدى.
قما وكىلى اتاپ وتكەندەي, قازىرگى زامانعى قارجى پيراميدالارىنىڭ قىزمەتى بۇگىندە ۇلتتىق شەڭبەردەن شىعىپ وتىر, وسىعان بايلانىستى شەتەلدەگى الاياقتىق ەلەمەنتتەر جاندانۋدا. ماسەلەن, سوڭعى ەكى جىلدا قازاقستاندا «Q-net», «Finico», «Antares» سياقتى ترانسۇلتتىق جوبالار انىقتالدى.
«بيىل الماتىدا ەلىمىزدە «Innova Gold» قارجى پيراميداسىن ۇيىمداستىرعان ترانسۇلتتىق قىلمىستىق توپ انىقتالدى. ولار 1,3 مىڭ سالىمشىدان 1 ملرد تەڭگەدەن استام قاراجات تارتقان. كومپانيا قىزمەتى ليتسەنزيا نەگىزىندە ەۋروپادان التىن قۇيمالارىن يمپورتتاۋمەن بايلانىستى بولعان دەلىنگەن. ءىس جۇزىندە بۇعان ليتسەنزياسى بولماعان», دەدى ا.داۆىدوۆ.
قارجى پيراميدالارى سالاسىنداعى ترانسشەكارالىق قىلمىستىڭ الدىن الۋ ءۇشىن قما حالىقارالىق بايلانىستار ورناتىپ جاتىر. وسىلايشا, تمد ەلدەرىنىڭ سالىقتىق زەرتتەۋلەر ورگاندارىنىڭ ۇيلەستىرۋ كەڭەسىنىڭ الاڭىندا قازاقستان ترانسشەكارالىق قارجى پيراميدالارىنا قارسى ءىس-قيمىل جونىندەگى جۇمىس توبىن قۇرۋعا باستاماشىلىق جاساعان. بارلىق قاتىسۋشىلار بۇل ۇسىنىستى قولدادى. بيىلعا ارنالعان ءوزارا ءىس-قيمىل جانە جوسپارلاۋ تەتىگى ازىرلەنۋدە, دەرەكتەر الماسۋ ءجۇرىپ جاتىر, ءوڭىر ءۇشىن جالپى قاۋىپتەر انىقتالۋدا.
«جينالعان مالىمەتتەر ۇلتتىق دەڭگەيدە, ونىڭ ىشىندە سايتتار مەن اككاۋنتتاردى بۇعاتتاۋ جولىمەن شۇعىل شارالار قابىلداۋ ءۇشىن پايدالانىلاتىن بولادى», دەدى قما وكىلى.
