بۇلاي دەيتىنىمىز, جاقىندا اتى الەمگە تانىلعان ەكى شاحماتشى قىزىمىز Instagram جەلىسىندە جاعا جىرتىسىپ, جازبا جاريالادى. الەۋمەتتىك جەلىلەردىڭ اراسىندا Instagram 1,4 ميلليارد قولدانۋشىمەن كوشباسشىلاردىڭ بەستىگىنە ەنەتىنىن ەسكەرسەك, مۇنداي جازبالاردى لەزدە ميلليونداعان ادام قاراپ ۇلگەرەدى.
بليتس بويىنشا ەكى دۇركىن الەم چەمپيونى ءبيبىسارا اساۋباەۆا حالىقارالىق گروسسمەيستەر جانسايا ابدىمالىكتى وزىمشىلدىك پەن كاسىپقويلىعىنا قاتىستى ايىپتادى. ونىڭ ايتۋىنشا, جانسايا ابدىمالىك «ەڭ الدىمەن شاحماتشى ەكەنىن ۇمىتقان».
«سۇراقتاردىڭ كوبى جانساياعا قاتىستى. ونىڭ سپورتقا ساي ەمەس مىنەز-قۇلقىنا, ورىنسىز ەموتسياسىنا قاتىستى. ارىپتەستەرىنە, جالپى ومىرگە دەگەن كوزقاراسى, اتاپ ايتقاندا كاسىپقويلىعىنا قاتىستى. سپورتشىلار كەز كەلگەن فورس-ماجور جاعداي مەن سىناقتارعا دايىن بولۋى كەرەك. ەگەر بىردەڭە بولىپ قالسا, جىلاپ, بەرىلە سالۋ ەمەس. ەگەر جانسايا سياقتى ءاربىر ۇساق-تۇيەككە ءمان بەرسە, سپورتتى تاستاپ, تۇرمىسقا شىعىپ, بورشش ءپىسىرىپ وتىرعان دۇرىس», دەپ جازىپ, جەلىدەگى ۇرىسقا سەبەپشى بولدى.
جانسايا ابدىمالىك تە ارىپتەسىنە ءدال وسىنداي «باعىتتا» جاۋاپ قاتتى. ول ءبيبىسارا اساۋباەۆانىڭ وزىنە قارسى ايتقاندارىنا ءمان بەرمەۋگە تىرىسقانىمەن, «تويتارىس بەرەتىن كەز جەتكەنىن» ءوز پاراقشاسىندا جازدى. ءسوزىنىڭ سوڭىندا جانسايا ابدىمالىك ءوز ەلىنىڭ اتىن ارقاشان ماقتانىشپەن جانە ابىرويمەن اسقاقتاتاتىنىن جەتكىزدى.
مۇنداي وقيعانى جالپاق جۇرتقا جاريالاۋدىڭ نە ءمانى بار؟ اسىرەسە شەتتە ءجۇرىپ ەكى قازاقتىڭ ءبىر-بىرىمەن بەت جىرتىسقانى ۇلتىمىزعا ۇيات ەمەس پە؟
قاراپ وتىرساق, ءبيبىسارا اساۋباەۆانىڭ Instagram پاراقشاسىنا 58,1 مىڭ, ال جانسايا ابدىمالىكتىڭ پاراقشاسىنا 42,1 مىڭ ادام تىركەلگەن ەكەن. نەگىزى الەۋمەتتىك جەلىدەگى بەلگىلى ءبىر ادامنىڭ پاراقشاسىنا جازىلعان ادام ونى ارينە الدىمەن قۇرمەت تۇتادى, ونىڭ ومىرىنەن حاباردار بولعىسى كەلەدى. ءتىپتى اراسىندا ەلىكتەيتىندەرى دە بارشىلىق.
ال مۇنداي جانجال تۋدىراتىن, ادامنىڭ اتىنا كىر كەلتىرەتىن جازبالار سول تۇلعا تۋرالى وي-پىكىردىڭ وزگەرۋىنە, ءتىپتى قۇرمەتتىڭ السىرەۋىنە اكەپ سوعاتىنى راس. وكىنىشكە قاراي, مۇنداي وقيعالار جەلىدە جەتىپ-ارتىلادى. بەلگىلى تۇلعالاردىڭ ءبىر-بىرىمەن بەتپە-بەت ەمەس, الەۋمەتتىك جەلىدە «ايتىساتىن», ءسوز تالاستىراتىن كەزدەرىن بۇعان دەيىن دە كورىپ ءجۇرمىز. ءبيبىسارا مەن جانسايانىڭ وقيعاسى العاشقى جاعداي ەمەس. الايدا ادەپ تۇرعىسىنان دا, ينتەرنەت, الەۋمەتتىك جەلىلەردى پايدالانۋ مادەنيەتى مەن ەرەجەسىنە دە مۇنداي «ايتىستار» ساي كەلمەيتىنىن ەستەن شىعارماۋ قاجەت-اۋ.
ۇلىبريتانيا جانە ەۋروپانىڭ كوپتەگەن ەلىندە ادامنىڭ تۇلعاسىن الەۋمەتتىك جەلى ارقىلى تانيدى. سوندىقتان ماسەلەن جۇمىسقا تۇراردا تۇيىندەمەدە مىندەتتى تۇردە الەۋمەتتىك جەلىدەگى اككاۋنتىن كورسەتۋ قاجەت. جۇمىس بەرۋشى ءسىز تۋرالى العاشقى اسەرى مەن پىكىرىن پاراقشاڭىزدى قاراپ وتىرىپ قالىپتاستىرادى. ال ءبيبىسارا مەن جانسايا سەكىلدى الەۋمەتتىك جەلىنى «ۇرىس» الاڭىنا اينالدىرساڭىز, قالاعان قىزمەتىڭىزگە ەسىك جابىق دەي بەرىڭىز. ويتكەنى پاراقشاڭىزدى جۇرگىزۋ مادەنيەتىڭىز, جازعان جازبا مەن قالدىرعان پىكىرىڭىز دە ءوزىڭىزدىڭ بولمىسىڭىزدان حابار بەرەدى.
ءسوز ورايى كەلگەندە, الەۋمەتتىك جەلىنىڭ قولدانىس اياسىنا توقتالىپ وتسەك, وتكەن جىلدىڭ سوڭىنداعى «Datareportal.com» مالىمەتى بويىنشا الەۋجەلىنىڭ تۇراقتى پايدالانۋشىلارى 4,74 ملرد ادامعا جەتكەن. 16 جاستان 64 جاسقا دەيىنگى ءار ادام الەۋمەتتىك جەلىدە كۇنىنە ورتا ەسەپپەن 2 ساعات 28 مينۋت ۋاقىتىن وتكىزەدى. جەلى قولدانۋشىلارىنىڭ باسىم بولىگى ەر ادامداردىڭ ۇلەسىندە (54%), ايەلدەر سايكەسىنشە 46 پايىز. حالىقتىڭ 47 پايىزى الەۋمەتتىك جەلىنى تۋىستارى, دوستارىمەن سويلەسۋ ءۇشىن پايدالانادى. ال 35,4% ادام بوس ۋاقىتىن وتكىزۋ ءۇشىن قولدانسا, 34,6% وزىنە كەرەك ءبىلىم الىپ, جاڭالىق وقيدى. جالپى, ادامداردىڭ 28,7%-ى الەۋمەتتىك جەلى ارقىلى الەمدە نە بولىپ جاتقانىن بىلۋگە ۇمتىلادى.
P.S. الەۋمەتتىك جەلىدە اككاۋنت اشىپ, اتىمىزبەن اتاپ, جەكە پاراقشا رەتىندە قولدانا العانىمىزبەن, ول اۆتورلىق جوبا, يەسى بار, باقىلانىپ وتىرادى. سوندىقتان ونىڭ حالىقارالىق ستاندارتتارعا ساي ەرەجەسىنە باعىنۋ قاجەت ەكەنىن ەستە ۇستاعان ءجون.
