كوپتىڭ كومەگى
ەكەۋى دە «قازاقستان حالقىنا» قوعامدىق قورىنىڭ «قامقورلىق قورى» جانە «Samruk-Kazyna Trust» قورلارىمەن بىرلەسىپ ىسكە اسىرىلاتىن قايىرىمدىلىق جوبالارىنىڭ اياسىندا اشىلىپ, جاراقتاندىرىلدى.
شىمكەنت قالاسىنىڭ اكىمى مۇرات ايتەنوۆ, دەنساۋلىق ساقتاۋ مينيسترلىگىنىڭ انا مەن بالا دەنساۋلىعىن قورعاۋ دەپارتامەنتىنىڭ ديرەكتورى, «قامقورلىق قورى» قامقورشىلىق كەڭەسىنىڭ مۇشەسى ماعريپا ەمبەرگەنوۆا, «قازاقستان حالقىنا» قوعامدىق قورىنىڭ باسقارما توراعاسى بولات جامىشەۆ, «سامۇرىق-قازىنا» اق قوعاممەن بايلانىس, الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ, «قامقورلىق قورى» قق ديرەكتورى ارايلىم ەركىنوۆا ەرتە ارالاسۋ ورتالىعىنىڭ لەنتاسىن قيدى.
بۇل – مەگاپوليستەگى №2 وڭالتۋ ورتالىعىنىڭ بازاسىنداعى 3 ايدان 3 جاسقا دەيىنگى بالالارعا ارنالعان «قامقورلىق» بولىمشەسى بولىپ سانالادى.
ءوزىنىڭ قۇتتىقتاۋ سوزىندە قالا باسشىسى م.ايتەنوۆ وڭالتۋ مەكەمەسىنىڭ كۇردەلى جوندەۋدەن وتكەنىن جانە زاماناۋي ەمدىك قۇرالدارمەن جابدىقتالعانىن جەتكىزدى. سونداي-اق مەملەكەت باسشىسىنىڭ تاپسىرماسىنا سايكەس قۇرىلعان «قازاقستان حالقىنا» قورى مەن «سامۇرىق-قازىنا» اق-نىڭ وسى جۇمىستارعا ۇلكەن قولداۋ كورسەتىپ, ءتيىستى جاعداي جاساعانى ءۇشىن ءوزىنىڭ جانە اتا-انالاردىڭ اتىنان العىسىن جەتكىزدى.
«قازاقستان حالقىنا» قق باسقارما توراعاسى بولات جامىشەۆ قۇتتىقتاۋ تىلەگىن ارناپ, اتالعان ورتالىق شىمكەنتتە رەسپۋبليكا بويىنشا ءبىرىنشى اشىلعانىن, جىل سوڭىنا دەيىن باسقا وڭىرلەردە دە پايدا بولاتىنىن اتاپ ءوتتى.
«بالالاردى وڭالتۋعا ارنالعان جاڭا ورتالىققا شىن جۇرەكتەن قۋانىپ وتىرمىز. «قازاقستان حالقىنا» قورىنىڭ جالعىز ءوزى مۇنى ىسكە اسىرا الماس ەدى. قالا اكىمدىگى كوپ كومەگىن تيگىزدى. عيماراتتى كۇردەلى جوندەۋدەن وتىكىزىپ, قۇرىلىسىن وڭىرلەر ىشىندە ءبىرىنشى اياقتادى. «قامقورلىق قورى» دا – ءبىزدىڭ سەرىكتەسىمىز. ولاردىڭ جاردەمى بولماسا, بۇل باستامانىڭ جۇزەگە اسۋى ەكىتالاي ەدى. ويتكەنى قور شىنىمەن دە بار جاۋاپكەرشىلىكتى ءوز موينىنا الىپ, وتە كوپ جۇمىس اتقاردى. «Samruk-Kazyna Trust» قورى دا ءبىر كىسىدەي اتسالىستى. ولار ءوز قاراجاتىنا بۇكىل كەرەكتى قۇرال-جابدىقتى ساتىپ اپەردى. ۇكىمەت تە ءوز تاراپىنان قولداۋىن ايامادى. دەنساۋلىق ساقتاۋ مينيسترلىگىنە سول ءۇشىن دە راحمەت ايتامىز. مۇنداي وڭالتۋ مەكەمەسى دەنساۋلىعىندا كىناراتى بار بالالار ءۇشىن البەتتە قاجەت. ەندىگى ماقساتىمىز – ولاردىڭ سانىن كوبەيتە بەرۋ. 13 ورتالىقتان بولەك جوسپارىمىزدا تاعى التاۋى بار. ولاردى قالاي ۇيىمداستىرۋدى «قامقورلىق قورىمەن» بىرگە ويلاسا جاتىرمىز. قوسىمشا التاۋىن بيىل بولماسا دا, كەلەسى جىلى ىسكە قوسىپ قالاتىن شىعارمىز. قايىرىمدىلىق ىستەردىڭ بارلىعى سابيلەر مەن ولاردىڭ اتا-انالارى ءۇشىن اتقارىلىپ جاتىر», دەدى ب.جامىشەۆ.
قۇتتىقتاۋ ءسوز العان ماعريپا ەمبەرگەنوۆا دەنساۋلىق ساقتاۋ مينيسترلىگى مەن انا مەن بالا دەنساۋلىعىن قورعاۋ دەپارتامەنتىنىڭ اتىنان ورتالىقتىڭ اشىلۋىنا باستاماشىلىق تانىتقان قورلارعا العىسىن ءبىلدىردى. مينيسترلىك وكىلى ءوز سوزىندە ەلىمىز بويىنشا ءجۇز مىڭنان اسا مۇگەدەك بالا بار ەكەنىن مالىمدەدى. ولارعا وڭالتۋ شارالارى وتە قاجەت دەدى. ەگەر بالالار ەرتە جاستان ەمدەلەتىن بولسا, 60-70 پايىزىنىڭ دەنساۋلىعى جاقسارا تۇسەدى دەگەن حالىقارالىق ساراپشىلاردىڭ پىكىرىن كەلتىردى. مۇگەدەكتىگى بار بالالاردى كوپشىلىككە قوسۋ ۇلتتىق دەنساۋلىق ساقتاۋ جوباسىندا كورسەتىلگەن مىندەتتەردىڭ ءبىرى ەكەنىنە توقتالدى. سول ءۇشىن دە ءار قالادا, اۋىلدا وڭالتۋ ورتالىقتارىنىڭ بولۋى ماڭىزدى. 2020 جىلدان باستاپ مينيسترلىك «قامقورلىق قورى», «قازاقستان حالقىنا» قورلارىمەن بىرلەسىپ جانە «سامۇرىق-قازىنا» اق قولداۋىمەن وسىنداي الەۋمەتتىك جوبانى تابىستى جۇزەگە اسىرىپ كەلەدى. ىنتىماقتاستىقتىڭ ناتيجەسىندە ەكى جىل ارالىعىندا ەلىمىزدە 15 وڭالتۋ جانە 3 جاسقا دەيىنگى ەرتە ارالاسۋ ورتالىقتارى پايدالانۋعا بەرىلىپتى. دەنساۋلىق ساقتاۋ مينيسترلىگىنىڭ قاراماعىندا 49 وڭالتۋ ورتالىعى قىزمەت كورسەتەدى. مينيسترلىك وكىلىنىڭ مالىمدەۋىنشە, 2020 جىلى رەابيليتاتسيالىق مەكەمەلەردە تاۋلىك بويى جانە كۇندىزگى ستاتسيوناردا 80 مىڭنان اسا بالا ەم قابىلداعان. ەڭ باستىسى مۇنداي ورتالىقتاردا بالالاردىڭ دەنساۋلىعىن تۇزەۋگە بارلىق جاعداي قاراستىرىلعان. ءتيىستى مامانداردىڭ ەمدىك شارالارىنىڭ ناتيجەسىندە بالالار ورتاعا تەز بەيىمدەلىپ كەتەدى», دەپ قورىتتى ءسوزىن م.ەمبەرگەنوۆا.
«سامۇرىق-قازىنا» اق قوعاممەن بايلانىس, الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ «قامقورلىق» ەرتە ارالاسۋ ورتالىعى زاماناۋي قۇرال-جابدىقتارمەن تولىقتاي جاراقتاندىرىلعانىن جەتكىزدى. سونىمەن بىرگە وسىنداعى ماماندار دا ارنايى وقۋدان وتكەن. «Samruk-Kazyna Trust» «قامقورلىق» قورىمەن بىرلەسىپ ءۇش جىلدىڭ ىشىندە 6 بىردەي ەرتە ارالاسۋ جانە 15 وڭالتۋ ورتالىقتارىنىڭ اشىلۋىنا كومەك قولىن سوزعان. ەمدەۋ مەكەمەلەرى «سامۇرىق-قازىنا» اق-نىڭ جالعىز قورى ارقىلى عانا ەمەس, ەنشىلەس كومپانيالاردىڭ دا اتىنان ەسىكتەرىن اشىپ جاتىر. ع.اۋعانوۆ ايتقانداي, «سامۇرىق-قازىنا» اق قۇرامىنداعى «قازاتومپروم», «قازمۇنايگاز», «تاۋكەن-سامۇرىق», «قازاقتەلەكوم», «قازپوشتا», «قازاقستان تەمىرجولى» سەكىلدى ۇلتتىق كومپانيالاردىڭ دەمەۋشىلىگىمەن وسىنداي الەۋمەتتىك جوبالار ىسكە اسىرىلىپ وتىر. سونداي-اق ول شىمكەنتتەگى ەرتە ارالاسۋ ورتالىعى جىلىنا 600 بالانى قامتيتىنىن مالىمدەدى. قاسيەتتى رامازان ايىندا پايدالانۋعا بەرىلگەن مەكەمە بالالاردىڭ دەنساۋلىقتارىن جاقسارتۋعا سەپتىگىن تيگىزىپ, اتا-انالار قۋانىشىن ەسەلەي بەرسىن دەگەن تىلەگىن دە قوسا كەتتى.
قالالىق №2 وڭالتۋ ورتالىعىنىڭ باس دارىگەرى ايگۇل ساپارعاليەۆا «قامقورلىق» ەرتە ارالاسۋ ورتالىعى شالا تۋعان, تسەرەبرالدى سال اۋرۋى, داۋن سيندرومى, تۋا بىتكەن دامۋ اقاۋلارى, بوسانۋ جاراقاتتارى, ورتالىق جۇيكە جۇيەسىنىڭ زاقىمدانۋى, ۇدەمەلى بۇلشىق ەت ديستروفياسى جانە دامۋدىڭ باسقا دا ەرەكشەلىكتەرى سياقتى دياگنوزدارى بار بالالارعا رەابيليتاتسيالىق كومەك كورسەتەتىنىن ايتتى. ورتالىق جۇمىسىنىڭ نەگىزگى ماقساتى – دەنساۋلىعى ءالسىز بالالاردىڭ ءارى قاراي مۇگەدەكتىككە ءوتىپ كەتپەۋ قاۋپىن ازايتۋ. سوندىقتان بالا ءومىرىنىڭ العاشقى ايلارىنان باستاپ وڭالتۋ شاراسىن جۇرگىزۋ وتە ماڭىزدى سانايدى مامان. سونىمەن بىرگە مۇندا ەمدەلۋشىلەر دياگنوستيكالىق, اۋديولوگيالىق تەكسەرۋلەردەن جانە سوڭعى ۇلگىدەگى مي قىزمەتىن تەكسەرەتىن ەەگ اپپاراتىنان وتە الادى. كىشكەنتاي ناۋقاستاردىڭ دەنساۋلىعىمەن رەابيليتولوگ-دارىگەرلەر, نەۆرولوگتەر, ەدش نۇسقاۋشىلارى, كاسىپتىك تەراپەۆتەر, لوگوپەدتەر مەن دەفەكتولوگتەر, قىسقاسى بىلىكتى مامانداردان قۇرالعان دارىگەرلەر توبى اينالىسادى.
№2 وڭالتۋ ورتالىعىندا قىزىن ەمدەتىپ جاتقان اتا-انا شولپان اقىنوۆا مەكەمەنىڭ قىزمەتىنە ءدان ريزا. ورتالىق بازاسىنداعى تۇز شاحتاسى, ەمدىك دەنە شىنىقتىرۋ سەكىلدى وڭالتۋ شارالارىنىڭ كوپ كومەگى ءتيىپ جاتقانىن ايتتى.
«قىزىم ەركەجان رۇستەمقىزى – ەكى جارىم جاستا. وڭ قولى مەن وڭ اياعى ىستەمەيدى. وسى جەرگە كەلمەي تۇرىپ قىزىم سويلەمەيتىن. اياعىن باسىپ تا جۇرە المايتىن. ءتيىستى ەمدىك شارالاردىڭ ناتيجەسىندە ەركەجانىم جۇرە باستادى. قازىر سويلەيتىن بولدى. بىرتە-بىرتە ورتامىزعا قوسىلىپ كەلەدى. ەرگوتەراپيا ادىسىمەن ۇساق قول موتوريكالارىن دامىتۋعا ارنالعان جاتتىعۋلارعا قاتىسامىز. دارىگەرلەر سونىڭ كومەگىمەن تاماقتانۋ داعدىلارى قالىپتاساتىنىن ايتتى. سوندىقتان ءوز-وزىنە قىزمەت ەتۋگە ارنالعان دامىتۋشى ويىندارعا كوبىرەك قاتىسۋعا تىرىسامىز», دەدى ول.
«قازاقستان حالقىنا» قورىنىڭ قولداۋىمەن مەگاپوليستە «جاس جاۋىنگەر» بەيىمدەۋ-سپورت ورتالىعى ەكى جىلدان بەرى مۇگەدەكتىگى بار بالالاردى سپورتقا باۋلۋمەن اينالىسىپ كەلەدى. مۇنداي ورتالىقتار رەسپۋبليكا كولەمىندە بەس قالادا جۇمىس ىستەيدى ەكەن. ەرتە ارالاسۋ ورتالىعىنىڭ اشىلۋ سالتاناتىندا ءسوز سويلەپ, بالالارعا قامقورلىق تانىتقان يگى جاندارعا العىس سەزىمىن بىلدىرگەن 18 جاستاعى ايدوس سەيىتكاريموۆ وسى «جاس جاۋىنگەر» بەيىمدەۋ-سپورت ورتالىعىندا 16 جاسىنان باستاپ جاتتىعادى. ول ءوزىنىڭ جالعىز ەمەس ەكەنىن, قوعامنان ءاردايىم الەۋمەتتىك جانە رۋحاني قولداۋ تاۋىپ وتىراتىنىن جەتكىزدى.
جالپى, قالالىق №2 وڭالتۋ ورتالىعىندا نەۆرولوگيالىق اۋرۋلارى بار 116 بالا ەم قابىلداسا, وعان قوسىمشا 50 بالا مەكەمە جانىنداعى «قامقورلىق» ەرتە ارالاسۋ ورتالىعىنان دەرتىنە شيپا ىزدەيدى.
بالاماسى جوق ەمدەۋ مەكەمەسى
قوس قۋانىش قاتار كەلگەن وسى كۇنى مەگاپوليستە №8 بالالارعا ارنالعان «قامقورلىق» ارناۋلى الەۋمەتتىك قىزمەتتەر كورسەتۋ ورتالىعى رەسمي تۇردە جاڭا قىزمەتىنە كىرىستى. دۇنيەجۇزىلىك اۋتيزم ماسەلەسى تۋرالى اقپاراتتى تاراتۋ كۇنى قارساڭىندا تۇساۋى كەسىلگەن بۇل مەكەمەدە وسىنداي دياگنوزى بار بالالار ەمدەلەدى.
ورتالىق باسشىسى گۇلنۇر ساۋىرتاەۆانىڭ ايتۋىنشا, اتالعان مەكەمە 2021 جىلدىڭ قاراشا ايىندا قۇرىلعان. سودان بەرى «قامقورلىق» قورىنىڭ ۇسىنعان تالاپتارى بويىنشا جوندەۋ-ارلەۋ جۇمىستارىن جۇرگىزگەن. مۇنداعى بارلىق جيھاز شەتەلدەردەن اكەلىنگەن. سوندىقتان ورتالىقتا ەۋروپالىق ستاندارت بويىنشا ەم جۇرگىزىلەدى. سونىمەن بىرگە «قامقورلىق» قورى دايىنداپ بەرگەن ەرەكشە بالالارمەن جۇمىس ىستەۋ تۇجىرىمداماسىنا سايكەس مەديتسينالىق كومەك كورسەتىلەدى. مەكەمە ەكى اۋىسىمدا 110 بالانى قابىلداي الادى. الپىستاي مامان قىزمەت اتقارسا, ءدال قازىرگى تاڭدا قىرىق شاقتى بالا وڭالتۋ شارالارىنان ءوتىپ جاتىر. ورتالىقتا مۇگەدەكتىگى بويىنشا تىركەۋگە الىنعان اۋتيزم دەرتىندەگى بالالار تەگىن ەم قابىلدايدى. جالپى, قالادا اۋتيزمگە شالدىققان 280 بالا ەسەپتە تۇر.
ورتالىق پسيحونەۆرولوگيالىق اۋىتقۋى بار بالالارعا جارتىلاي ستاتسيونارلىق جاعدايدا قىزمەت كورسەتەدى. ايتا كەتەرلىگى, ەم-دوم الاتىن بالالارعا پروەكتسيالىق ينتەراكتيۆتى سەنسورلىق جانە سەنسورلىق ينتەگراتسيالىق بولمەلەر, ەدش زالى, لەگو روبوتتەحنيكالىق كابينەتى, مۋزىكا-تەراپيا, ارت-تەراپيا مەن تىگىن, اعاش جانە قىش شەبەرحانالارى قاراستىرىلعان. ال «قامقورلىق» قورى مەن «بالاما» وقىتۋ ورتالىعىنىڭ كەلىسىمى نەگىزىندە ورتالىقتىڭ 36 مامانى بىلىكتىلىكتى ارتتىرۋ كۋرستارىنان وتكەن. بۇعان قوسا ءاۋتيزمى جانە باسقا دا اقىل-وي كەمىستىگى بار بالالاردى وڭالتۋدا وتاندىق جانە شەتەلدىك ساراپشىلاردىڭ كۋرستارى, ترەنينگتەرى, كوشپەلى سەمينارلارى نەگىزىندە ازىرلەنگەن باعدارلامامەن وقىعان ماماندار دايارلانىپ جاتىر.
مەكەمەنىڭ اشىلۋ سالتاناتىندا ءسوز سويلەگەن «قازاقستان حالقىنا» قق باسقارما توراعاسى بولات جامىشەۆ ءاۋتيزمى بار بالالار اۋرۋ ەمەس ەرەكشە جاندار قاتارىنا جاتاتىنىن مالىمدەدى. قور باسشىسى بايانداعانداي, ەلىمىزدە, وكىنىشكە قاراي, وسىنداي دياگنوزبەن انىقتالاتىن بالالار سانى كەيىنگى بەس جىلدا ەكى ەسەگە ءوسىپ, قازىرگى تاڭدا قازاقستان بويىنشا 12 مىڭعا جەتكەن. سوندىقتان ورتالىق ماماندارى ايرىقشا پاتسيەنتتەردىڭ قوعاممەن ارالاسۋىنا كومەكتەرىن ايامايتىنىنا زور سەنىممەن قارايتىنىن ايتىپ, وسىناۋ ءزاۋلىم عيماراتتى شاھاردىڭ ورتالىعىنان, كەڭ جولدىڭ بويىنان اشىپ بەرگەنى ءۇشىن قالا اكىمدىگىنە العىسىن ءبىلدىردى. سونداي-اق «قازاقستان حالقىنا» قورىمەن بىرگە ىلكىمدى جۇمىس اتقارعان «Samruk-Kazyna Trust» پەن «قامقورلىق قورى» قورلارىنا العىسىن جاۋدىردى.
ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ جاڭا ورتالىقتىڭ ەلىمىزدە بالاماسى جوق ەكەنىن باياندادى. مينيسترلىك وكىلىنىڭ ايتۋىنشا, اۋتيزمگە شالدىققان بالالارعا كومەك كورسەتەتىن مەكەمەلەرگە سۇرانىس كوبەيىپ بارا جاتىر, ال جۇمىس ىستەپ تۇرعاندارىنا قولجەتىمدىلىك از. وسىعان بايلانىستى كەشەندى الەۋمەتتىك قىزمەت كورسەتەتىن وڭالتۋ ورتالىقتارىنىڭ سانىن ارتتىرۋ باعىتىندا ۆەدومستۆو تاراپىنان ءتيىستى جۇمىستار اتقارىلادى. بارىنەن بۇرىن بالالاردىڭ دەنساۋلىعى ماڭىزدى دەگەن ۆيتسە-مينيستر سول ءۇشىن مەملەكەت قولدان كەلگەنشە كومەگىن ايامايتىنىن ايتتى.
جوبانىڭ الەۋمەتتىك ءمانى ەرەكشە ەكەنىنە توقتالعان «قامقورلىق قورىنىڭ» كورپوراتيۆتىك قور ديرەكتورى ارايلىم ەركىنوۆا ورتالىقتىڭ اشىلۋىمەن جينالعان جۇرتتى قۇتتىقتاي كەلە, قوعامدى تولعاندىرعان بالالار دەنساۋلىعى ماسەلەسىنە دە كوپشىلىك نازارىن اۋداردى.
«كوپتەگەن وتباسى ءۇشىن مامانداردىڭ بىلىكتى كومەگى قولجەتىمدى ەمەس نەمەسە تىم قىمبات. بۇل ماسەلە ءاۋتيزمى بار بالالاردى تاربيەلەپ وتىرعان انالار اراسىندا بۇگىندە وتكىر پروبلەماعا اينالعان. سوندىقتان «قامقورلىق» ورتالىقتارىنىڭ قىزمەتى ءاۋتيزمنىڭ اۋىر تۇرلەرىمەن اۋىراتىن بالالارعا ۇزاق مەرزىمدى كومەك كورسەتۋگە مۇمكىندىك بەرەدى. وسى ماڭىزدى الەۋمەتتىك جوبانى ىسكە اسىرۋدا بىزبەن سەرىكتەس بولعان «قازاقستان حالقىنا» جانە «سامۇرىق-قازىنا» قورلارى قىرۋار ءىس تىندىردى. سولاردىڭ جاردەمىنىڭ ناتيجەسىندە ورتالىقتار قارجىلاي قولداۋ تاۋىپ, زاماناۋي ۇلگىدەگى ەڭ قاجەتتى مەديتسينالىق قۇرالدارمەن جانە اۋستريا, جاپونيا, گەرمانيادان اكەلىنگەن جيھازدارمەن جابدىقتالدى. بۇيىرتسا, بيىل باسقا دا وڭىرلەردە, اتاپ ايتقاندا, اقتوبە, شىعىس قازاقستان, جەتىسۋ, جامبىل, قوستاناي, پاۆلودار وبلىستارىندا وسىنداي ورتالىقتار اشۋ جوسپاردا بار», دەدى ول.
جالپى, ءاۋتيزمى بار بالالارعا ارنالعان «قامقورلىق» ورتالىعى بالالار مەن ولاردىڭ وتباسىلارىنا كەشەندى قولداۋ كورسەتۋ ءۇشىن قۇرىلعان. ەندى وسى مەكەمەدە جىل سايىن ءبىر جارىم جاستان 18 جاسقا دەيىنگى جۇزدەن اسا بالا بىلىكتى دارىگەر مامانداردىڭ كومەگىنە تەگىن جۇگىنە الادى.
اسىرەسە جەتى جاسار بالاسىن ورتالىققا الىپ كەلگەن قالا تۇرعىنى نارگيزا اسىلحانوۆانىڭ قۋانىشىندا شەك جوق. وسىعان دەيىن ءارتۇرلى سىرقاتتى ەمدەۋ ءۇشىن بولەك-بولەك ماماندارعا قارالاتىن. ماسەلەن, ءتىل مۇكىستىگىمەن اينالىساتىن دەفەكتولوگ مامانعا ءبىر بارىپ كورىنسە, كەلەسى جولى مي قىزمەتىنىڭ بۇزىلىستارىن تەكسەرىپ ەمدەيتىن باسقا كلينيكاداعى مامانعا قارالۋعا ءماجبۇر بولاتىن. بۇل, بىرىنشىدەن, كوپ ۋاقىتتى السا, ەكىنشىدەن, جەكەمەنشىك مەديتسينالىق ۇيىمدار بولعان سوڭ ءبىراز قالتاسىنان دا قاعىلاتىن.
«حالىق ۇنىنە قۇلاق اساتىن مەملەكەت» دەگەن ۇعىمدى ەندى شىنايى سەزىنە باستادىم. جوعارى جاقتىڭ اقىل-ەسىندە اقاۋى بار بالالاردى تاربيەلەپ وتىرعان بىزدەي انالارعا كوڭىل اۋدارىپ, قوعامدى تولعاندىرعان وسى ماسەلەگە شىنداپ كىرىسكەنى مەنى ەرەكشە شاتتىققا بولەپ وتىر. اسىرەسە بۇرىنعىداي ءار جەرگە ءبىر شاپقىلاماي, بارلىق كەرەكتى ەم-دومدى ءبىر ورتالىقتان تەگىن الاتىنىمىز قانداي جاقسى بولعان. سودان كەيىن وڭالتۋ شاراسىنىڭ ۋاقىتى دا ۇزاق. بۇل بالانىڭ جاتتىعۋ بارىسىندا قالىپتاسقان داعدىلارىن ۇمىتىپ قالماۋىنا كومەكتەسەدى. ايتپەسە, مۇنىڭ الدىندا قىسقا مەرزىمدى كۋرستاردان ءوتىپ, كەلەسى مارتە بارعانىمىزشا بالامىز وقىپ-ۇيرەنگەنىن ەستەن شىعارىپ الاتىن. سوندىقتان وسىناۋ بىرەگەي مەكەمەنىڭ قۇرىلۋىنا اتسالىسقان بارشا جاناشىر ازاماتتارعا بولاشاق ۇرپاعىمىزدىڭ قامىن جەپ, جاۋاپكەرشىلىك سەزىنگەندەرى ءۇشىن انالىق اق باتامدى بەرەمىن», دەدى ن.اسىلحانوۆا.
تۇتاستاي العاندا «قازاقستان حالقىنا» قق, «قامقورلىق قورى» جانە «Samruk-Kazyna Trust» قورلارىمەن بىرلەسىپ ىسكە اسىراتىن «اۋتيزم جانە باسقا دا مەنتالدى بۇزىلۋلارى بار بالالارعا ارنالعان ورتالىقتاردى جاراقتاندىرۋ» قايىرىمدىلىق جوباسىنىڭ بيۋدجەتى 2,4 ملرد تەڭگەنى قۇرايدى.
