باعدارلاماعا شەتەل ازاماتتارى, ونىڭ ىشىندە قازاقستان رەسپۋبليكاسىنىڭ ازاماتىعى جوق قازاق ۇلتىنىڭ وكىلدەرى قاتىسا الادى. ءوتىنىش بەرۋ ونلاين فورماتتا قر عجبم جوعارى ءبىلىمدى دامىتۋدىڭ ۇلتتىق ورتالىعىنىڭ https://enic-kazakhstan.edu.kz/ ۆەب-پورتالى (ۆەب-سايتى) ارقىلى جۇزەگە اسىرىلادى.
جوعارى ءبىلىم بەرۋدى ينتەرناتسيونالداندىرۋ ماقساتىندا باكالاۆريات, ماگيستراتۋرا جانە دوكتورانتۋرانىڭ ءبىلىم بەرۋ باعدارلامالارى بويىنشا قازاقستاننىڭ جوعارى وقۋ ورىندارىندا شەتەل ازاماتتارىن وقىتۋ ءۇشىن 550 گرانت, ونىڭ ىشىندە باكالاۆرياتقا 490 گرانت, ماگيستراتۋراعا 50 گرانت, PhD دوكتورانتۋراعا 10 گرانت بولىنگەن. باعدارلاما اياسىندا تەگىن ءبىلىم بەرۋ مەن ءبىلىم الۋشىنىڭ اكادەميالىق جەتىستىكتەرىنە بايلانىستى اي سايىنعى ستيپەنديامەن قامتاماسىز ەتىلەدى.
قر عجبم جوعارى ءبىلىمدى دامىتۋدىڭ ۇلتتىق ورتالىعىنىڭ سايتىندا قۇجاتتاردى ونلاين قابىلداۋ 30 ناۋرىزدا باستالىپ, 30 ماۋسىمعا دەيىن جالعاسادى.
ۇمىتكەرلەردى ىرىكتەۋ ۇسىنىلعان قۇجاتتار, بەيىمدەلۋ الەۋەتىن انىقتاۋعا ارنالعان ونلاين-تەستىلەۋ ناتيجەلەرى جانە ونلاين اڭگىمەلەسۋ نەگىزىندە جۇرگىزىلەدى. ستيپەندياتتار ءتىزىمى بيىلعى جىلدىڭ 28 تامىزىنا دەيىن جاريالانادى.
