قازىرگى بالالار ءسۇيىپ كورەتىن شەتەلدىك مۋلتفيلمدەردى انا تىلىمىزدە دىبىستاۋ يدەياسىن «قاينار» ورتالىعىنىڭ پەداگوگ-ۇيىمداستىرۋشىسى ەركىن قۇسان ۇسىنىپتى. قوسىمشا ءبىلىم بەرۋ مەكەمەسىندە بىلتىر «ۇلتتىق كولوريت» ۇيىرمەسى اشىلعان ەدى. مەملەكەتتىك تىلدەگى مەديانى دامىتۋدى ماقسات ەتكەن ۇيىرمە مۇشەلەرى ۇزاقتىعى جەتى مينۋت بولاتىن «بەيماكس» ءمۋلتفيلمىن دۋبلياجداپ, عالامتوردا بالالارعا ۇسىنعان.
– بۇل يدەياعا نەگىزىنەن ەلىمىزدە ىسكە قوسىلعان «ÖZINŞە» بالالار مەن جاسوسپىرىمدەرگە ارنالعان ستريمينگ سەرۆيسى تۇرتكى بولدى. مۋلتفيلمدەردى نەگە انا تىلىمىزدە سويلەتپەسكە دەگەن وي كەلدى. العاشقى ءونىمىمىز رەتىندە شەتەلدىك «بەيماكس» مۋلتحيكاياسىنىڭ ءبىرىنشى ءبولىمىن بىلتىر جازعى كانيكۋل ۋاقىتىندا اۋدارىپ, دىبىستادىق. ون شاقتى بالا قاتىسقان دۋبلياجداۋ بارىسىندا كوپتەگەن تەحنيكالىق قيىندىققا كەزىكسەك تە, بارلىعىن دۇرىس اياقتاعان سەكىلدىمىز. Youtube پلاتفورماسىندا 57 مىڭنان اسا كورەرمەن تاماشالاپ, ۇنادى دەپ لايك باسقان. بۇل تابىسىمىز ءبىزدى شابىتتاندىرىپ, اقپارات جانە قوعامدىق دامۋ مينيسترلىگى ۇيىمداستىرعان «تاۋەلسىزدىك ۇرپاقتارى» گرانتتار بايقاۋىنا قاتىسۋىمىزعا تۇرتكى بولدى. «وزگەشە بول» دۋبلياج ستۋدياسى جوباسى 33 جەڭىمپازدىڭ قاتارىنان كورىندى. ءسويتىپ, گرانت قارجىسىنا ستۋدياعا قاجەت دىبىس جازعىش جابدىقتار مەن تەحنيكالار ساتىپ الدىق. ەندى دىبىستاۋ ساپاسى جاقسارا تۇسەتىنىنە بالالار قۋانىپ وتىر. بولاشاقتا وزگە مۋلتحيكايالاردى انا تىلىمىزدە دىبىستاپ, جەرگىلىكتى كينوتەاتردا جاسوسپىرىمدەرگە كورسەتسەك دەگەن ويىمىز بار, – دەپ جوسپارلارىمەن ءبولىستى ۇيىرمە جەتەكشىسى.
«بەيماكس» مۋلتفيلمىندەگى باستى كەيىپكەر – سۋپەرقاھارمان روبوتتى دىبىستاعان ءشامىل جاقسىباەۆتىڭ ايتۋىنشا, بۇل – دىبىستاۋ ونەرىندەگى العاشقى جوبا. ون ءتورت جاستاعى ءجاسوسپىرىم ۇيىرمەدەگى ۇستازىنىڭ ارقاسىندا كوپ ەرەكشەلىكتى ۇيرەنگەن. ال وقۋشى ءدىلناز رامازانوۆا كيكو اجەيدىڭ داۋسىن سالعان. بىلتىرعى جازعى دەمالىسىن دىبىس جازۋ ستۋدياسىندا وتكىزگەنىنە ەش وكىنبەيدى.
دۋبلياج ستۋدياسىندا كاسىپقوي دىبىس جازۋ قۇرال-جابدىعىنان بولەك دىبىس جازۋعا ارنالعان ارنايى بولمە, اۋدارما جۇمىسىنا ارنالعان ورىن جانە قوسىمشا تۇسىرىلىمدەر جۇرگىزۋگە مۇمكىندىك بەرەتىن الاڭ قاراستىرىلعان. مۇنداي مۇمكىندىكتەر بالالاردىڭ قىزىعۋشىلىعىن ۇلعايتىپ, ەندى شەتەلدىك «ساتتىلىك» ءمۋلتفيلمىن دۋبلياجداۋدى ۇيعارىپ وتىر. ءبىر جارىم ساعاتقا سوزىلاتىن قىزىقتى مۋلتحيكايا اۋدارىلىپ بولعان سوڭ جەرگىلىكتى كينوتەاتردا كورسەتىلۋى مۇمكىن.
جالپى, فيلمدەر مەن مۋلتفيلمدەر – ءتىلدى تانىمال ەتۋدىڭ تاماشا ءتاسىلى. بىلتىرعى جىلدىڭ سوڭىندا جارىق كورگەن «اۆاتار: سۋ جولى» كينوكارتيناسىن Aray Media Group ستۋدياسى ادەبي ءارى زاماناۋي ستيلمەن ەرەكشە دۋبلياجداعانى ەسىمىزدە. ەكىباستۇزداعى «ۇلتتىق كولوريت» ۇيىرمەسى كاسىبي تۇرعىدان ءوسۋ ءۇشىن بولاشاقتا اتالعان ستۋديامەن بايلانىس ورناتۋدى كوزدەپ وتىر. ودان كەيىنگى ۇلكەن جوسپاردىڭ ءبىرى – انيماتسيالىق ستۋديا اشۋ. انا تىلىمىزدەگى بەينەكونتەنتتى دامىتۋدى ماقسات ەتكەن ۇيىرمە مۇشەلەرى تانىمال پلاتفورمادان ءوز ارنالارىن اشۋدى دا ويلاستىرىپ قويعان. بۇگىندە بۇل ۇيىرمەگە جەرگىلىكتى مەكتەپتەردەن 30 بالا تۇراقتى بارىپ ءجۇر.
ەكىباستۇز قالاسى
