وبلىستىق اۋماقتىق سايلاۋ كوميسسياسىنىڭ توراعاسى ازامات ايماناكۋموۆتىڭ ايتۋىنشا, ءماسليحات قۇرامىنداعى 30 دەپۋتاتتىڭ 15-ءى بىرمانداتتىق وكرۋگتەن, 15-ءى ساياسي پارتيالاردان سايلانعان.
ونىڭ ىشىندە 17-ءسى قايتادان ماندات العان.
«وبلىستىق ءماسليحات دەپۋتاتتارىنىڭ اراسىندا 23 ەر, 7 ايەل بار. ولاردىڭ ورتاشا جاسى – 45-تە. دەپۋتاتتاردىڭ قۇرامىندا ازاماتتىق قوعامنىڭ 6, باق-تىڭ 3 وكىلى بار. سونداي-اق 9 كاسىپكەر, ءبىلىم جانە سپورت سالاسىنان 3 قىزمەتكەر, 4 فەرمەر, كاسىپورىنداردان 3, دەنساۋلىق ساقتاۋ سالاسى مەن مەملەكەتتىك ورگاننان 1 وكىل سايلاندى», دەپ حابارلادى ازامات ايماناكۋموۆ.
ونىڭ دەرەگىنە سۇيەنسەك, اmanat پارتياسىنا 10, «اقجول» پارتياسىنا 2, «اۋىل» پارتياسىنا 1, «Respublica» پارتياسىنا 1, «بايتاق» جاسىلدار پارتياسىنا 1 ماندات بەرىلگەن.
العاشقى سەسسيادا وبلىستىق ءماسليحاتتىڭ توراعاسى بولىپ مۇسا حايرۋلليەۆ سايلاندى.
ءماسليحات دەپۋتاتتارى ونىڭ كانديداتۋراسىنا قولداۋ ءبىلدىردى. ول وبلىستىق ءماسليحاتتىڭ دەپۋتاتتىعىنا ءبىرمانداتتى №5 وكرۋگتەن ءوزىن-ءوزى ۇسىنۋ جولىمەن سايلانعان.
مۇسا قاراشا ۇلى 1984 جىلى تۋعان.
وسى كەزگە دەيىن «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق اتىراۋ وبلىستىق فيليالىنىڭ ديرەكتورى بولىپ جۇمىس ىستەگەن.
اتىراۋ وبلىستىق ءماسليحاتىڭ دەپۋتاتتارى ءتورت تۇراقتى كوميسسيانىڭ قۇرامى مەن توراعالارىن سايلادى.
