مينيسترلىكتىڭ مالىمەتىنشە, تاياۋ شىعىستاعى احۋالدىڭ ءالى دە شيەلەنىستى بولىپ قالۋىنا, سونداي-اق ءوڭىردىڭ بىرقاتار مەملەكەتتەرىندە اۋە كەڭىستىگىنىڭ مەزگىل-مەزگىل جابىلۋىنا بايلانىستى قازاقستان رەسپۋبليكاسىنىڭ سىرتقى ىستەر مينيسترلىگى كەلەسى ەلدەرگە جاعدايدىڭ تولىق تۇراقتانۋىنا دەيىن ساپارلاردان باس تارتۋ جونىندەگى ۇسىنىمدارىن ساقتايدى: باحرەين, بىرىككەن اراب امىرلىكتەرى, يزرايل, يەمەن, يوردانيا, يراك, يران, قاتار, ساۋد ارابياسى كورولدىگى, كۋۆەيت, ليۆان, ومان جانە سيريا.
«وڭىردە جۇرگەن قازاقستان رەسپۋبليكاسىنىڭ ازاماتتارىنا جەكە قاۋىپسىزدىك شارالارىن كۇشەيتۋ, ىقتيمال قاۋىپتى ايماقتارعا بارۋدان باس تارتۋ, جەرگىلىكتى بيلىك ورگاندارىنىڭ نۇسقاۋلارىن قاتاڭ ساقتاۋ, سونىڭ ىشىندە زىمىراندىق قاۋىپ تۋىنداعان جاعدايدا دەرەۋ باسپانالارعا (قورعانىس ورىندارىنا) بارۋ كەرەك ەكەنىن ەسكە سالامىز», دەلىنگەن حابارلامادا.
سونداي-اق قازاقستان رەسپۋبليكاسىنىڭ شەتەلدەگى مەكەمەلەرىمەن, تۋروپەراتورلارمەن جانە اۋە تاسىمالداۋشىلارىمەن تۇراقتى بايلانىستا بولۋ قاجەتتىگى تاعى ايتىلدى.
ەسكە سالا كەتەيىك, يزرايل 28 اقپاندا تاڭەرتەڭ يرانعا سوققى جاسادى. دۋباي, ابۋ-دابي جانە راس-ەل-حايمادا جۇرگەن قازاقستان ازاماتتارى رەيستەردىڭ توقتاتىلۋىنا بايلانىستى ەلگە قايتا الماي قالعان. ال «قازپوشتا» تاياۋ شىعىستاعى جاعدايدىڭ شيەلەنىسۋىنە بايلانىستى حالىقارالىق پوشتا جونەلتىلىمدەرىنە ۋاقىتشا شەكتەۋلەر قويىلعانىن مالىمدەدى.
بۇعان دەيىن تاياۋ شىعىستاعى قاقتىعىس سالدارىنان 13 رەيس توقتاتىلعانىن جازعان بولاتىنبىز. سونداي-اق تاياۋ شىعىستاعى احۋالدىڭ ۋشىعۋىنا بايلانىستى قازاقستاننىڭ شەت ەلدەردەگى مەكەمەلەرىنىڭ جەدەل بايلانىس جانە «جەدەل جەلى» نومىرلەرىنىڭ ىسكە قوسىلعانى حابارلانعان ەدى.
