«قىسقاسى, دەپۋتاتتارعا ءبىر عانا ماڭىزدى مىندەت جۇكتەلەدى. ياعني, ءاردايىم وزگەرىستەردىڭ بەل ورتاسىندا بولۋ كەرەك. سىزدەر شەشىم قابىلدايسىزدار جانە سول ءۇشىن جۇرت الدىندا جاۋاپ بەرەسىزدەر. حالىقتىڭ مۇددەسىن ءتيىمدى قورعاۋ جانە ەلىمىزدەگى وزەكتى ماسەلەلەردى شەشۋگە اتسالىسۋ ءۇشىن ازاماتتارمەن تىعىز قارىم-قاتىناس ورناتۋ قاجەت.
ەلىمىزدىڭ نەگىزگى باسىمدىقتارىن بارشاڭىز جاقسى بىلەسىزدەر. بۇل – تۇرعىنداردىڭ ءال-اۋقاتىن ارتتىرۋ جانە ۇلتتىڭ جاڭا ساپاسىن قالىپتاستىرۋ. سول ارقىلى تامىرى تەرەڭدە جاتقان مەملەكەتتىلىك ءداستۇرىمىزدى نىعايتا ءتۇسۋ. وسى ورايدا, مەن پارلامەنتتىڭ الداعى جۇمىسى تۋرالى ويىمدى ورتاعا سالعىم كەلەدى», دەدى مەملەكەت باسشىسى.
پرەزيدەنتتىڭ ايتۋىنشا, بىرىنشىدەن ىسكەرلىك بەلسەندىلىكتى ىنتالاندىرۋ قاجەت. ول ءۇشىن, ەڭ الدىمەن, ءادىل, تۇراقتى ءارى اشىق سالىق جۇيەسىن قالىپتاستىرۋ كەرەك.
سالىق ساياساتىنىڭ جاڭا مودەلى ۇلتتىق بايلىقتى ءتيىمدى ءبولۋدى, ەكونوميكالىق بەلسەندىلىكتىڭ جوعارى دەڭگەيى مەن ەكونوميكانىڭ باسىم باعىتتارىن ناقتى قولداۋدى قامتاماسىز ەتۋگە ءتيىس. سالىق كودەكسى جانە تۇتاس سالىق ساياساتى تۇسىنىكتى, تۇراقتى بولۋى قاجەت.
فيسكالدىق ورگانداردىڭ بيزنەسپەن قارىم-قاتىناسىنا قاتىستى بۇكىل پروتسەستى تولىق تسيفرلاندىرۋ كەرەك. بۇل كاسىپكەرلەردىڭ تىرشىلىگىن ايتارلىقتاي دارەجەدە جەڭىلدەتۋگە جانە بيۋدجەت كىرىسىن جۇيەلى تۇردە ۇلعايتۋعا سەپتىگىن تيگىزەدى.
سونىمەن قاتار پارلامەنتتە مەملەكەتتىك بيۋدجەتكە مول كىرىس اكەلەتىن كورپوراتيۆتىك تابىس سالىعى مەن قوسىمشا قۇن سالىعىنا قاتىستى مولشەرلەمەلەردى ءارتاراپتاندىرۋ مۇمكىندىگى تالقىعا سالىنادى.
ء«ىرى كاسىپورىندار جانە شيكىزات ەكسپورتىمەن اينالىساتىن كومپانيالار قازىناعا كوبىرەك تولەم تۇسىرسە, ادىلدىك بولار ەدى. بۇل الەمدە بار وزىق تاجىريبە. قازىر ەلدەگى جاعداي تۇبەگەيلى وزگەردى. ادىلەتتى قازاقستان دەگەنىمىز – جالاڭ ۇران ەمەس, بۇل – انىق اقيقات. الدا اتقاراتىن جۇمىس كوپ. ءبىز بۇعان ءبىر ەل بولىپ تۇگەل اتسالىسۋىمىز كەرەك», دەدى ق.توقاەۆ.
