جوعارىدا ەسىمدەرى اتالعان جىگىتتەردىڭ ەكەۋى دە وتە قارۋلى. كولبي كوۆينگتون جارتىلاي ورتا سالماقتا كۇش سىناسىپ جۇرگەن فايتەرلەردىڭ رەيتينگىندە ەكىنشى ورىندا تۇر. 35 جاستاعى كاليفورنيا شتاتىنىڭ تۋماسى بوزبالا شاعىنان بوزكىلەمدە تەر توكتى. ستۋدەنتتەر اراسىنداعى جارىستاردا سان مارتە جۇلدەلى ورىنداردى يەلەندى. 2012 جىلدان بەرى ارالاس جەكپە-جەكتەن وتەتىن ءدۇبىرلى دودالارعا قاتىسا باستادى. باستاپقى سەگىز باسەكەسىندە جەڭىسكە جەتىپ, ءوز جانكۇيەرلەرىن قۋانتتى. ول كريس ەنسلي, دەۆيد حەيز, دجەيسون دجەكسون, حوسە كاسەراس, دجەي ەلليس, انين ۆان, ۆاگنەر سيلۆا جانە مايك پايلدى ۇتتى. العاش رەت كولبي 2015 جىلدىڭ اياعىندا جەڭىلىس تاپتى. ول برازيليالىق ۆارلەي الۆەسكە ەسە جىبەردى. ودان كەيىن تاعى جەتى كەزدەسۋدى ءوز پايداسىنا شەشتى. 2016-2019 جىلدارى كوۆينگتون دجوناتان مەنە, ماكس گريففين, برايان باربەرەن, كيم دون حەن, دەميان مايا, رافاەل دۋس اندجۋس, روببي فوۋلەردى قاپى قالدىردى. سونداي-اق كامارۋ ۋسماننان ەكى رەت ۇتىلىپ, تايرون ۆۋدلي مەن حورحە ءماسۆيدالدى تىزە بۇكتىردى.
2018 جىلى ۋاقىتشا چەمپيون اتاعىن يەلەنگەن كولبي كوۆينگتوننىڭ 2019 جانە 2021 جىلدارى تولىققاندى چەمپيون اتانۋعا جاقسى مۇمكىندىگى بولدى. بىراق ەكى رەتىندە دە ول كامارۋ ۋسمانعا جول بەردى. اقش سپورتشىسى وكتاگوندا بارلىعى 20 كەزدەسۋ وتكىزىپ, ولاردىڭ 17-سىندە جەڭىسكە جەتسە, توعىزىن مەرزىمىنەن بۇرىن اياقتادى.
2022 جىلدىڭ 5 ناۋرىزىندا كوۆينگتون وتانداسى حورحە ءماسۆيدالدى جەڭگەنى جايىندا جوعارىدا ايتتىق. وسى ساتسىزدىكتەن كەيىن حورحە قارسىلاسىنان كەك الۋعا بەكىندى. ءدال سول كۇنى لاس-ۆەگاستاعى مەيرامحانالاردىڭ بىرىندە ول بەيقام تۇرعان كولبيگە ويسىراتا سوققى جاساپ, قاسقا ءتىسىن سىندىردى. ەندى باسبۇزار 15 جىلعا باس بوستاندىعىنان ايىرىلۋى مۇمكىن.
UFC-ءدىڭ رەيتينگىندە ءتورتىنشى ساتىعا جايعاسقان بەلال مۇحاممادتىڭ جاسى – 34-تە. ونىڭ اكە-شەشەسى – پالەستينانىڭ تۋمالارى. ال سپورتشىنىڭ ءوزى چيكاگودا دۇنيەگە كەلدى. بەلال دا كارەراسىن 2012 جىلى باستادى. ارادا ءتورت جىل وتكەن سوڭ Titan FC ۇيىمىنىڭ چەمپيونى اتاندى. ونىڭ الدىندا Bellator پروموۋشەنىندە ونەر كورسەتتى. 2016 جىلى UFC-گە اۋىستى. ايقاس الاڭىندا بارلىعى 26 جەكپە-جەك وتكىزىپ, سونىڭ ۇشەۋىندە عانا ۇتىلدى. 22 رەت جەڭىپ, تاعى ءبىر باسەكەنىڭ ناتيجەسى ەسەپكە الىنبادى. مۇحاممادقا ەسە جىبەرگەندەر اراسىندا كريس كەرتيس, تيم مينس, لايمان گۋد, ديەگو ليما, دەميان مايا, ستيۆەن تومپسون, ۆيسەنتە لۋكە جانە شون برەدي سەكىلدى تانىمال فايتەرلەر بار. ءبىر ايتا كەتەرلىگى, اتالعان امەريكالىق سپورتشى ءوز جەڭىستەرىنىڭ تەك التاۋىن عانا ايقىن باسىمدىقپەن اياقتادى.
2016 جىلى مۇحامماد قاتارىنان ەكى كەزدەسۋدە جەڭىلىستىڭ كەرمەك ءدامىن تاتتى. لاس-ۆەگاستا الان جۋباننان ۇپاي سانىمەن ۇتىلسا, نيۋ-يوركتە ۆيسەنتە لۋكەنىڭ اۋىر سوققىلارىنا توتەپ بەرە المادى. ال 2019 جىلى ول برۋكليندە ۇيىمداستىرىلعان جارىستا دجەفف ءنيلدىڭ وسال تۇسىن تابا المادى. ءدال وسى ساڭلاقتى جۋىردا عانا ءبىزدىڭ شاۆقات راحمونوۆ قىلقىندىرىپ تاستاعان ەدى. سودان كەيىنگى سەگىز جەكپە-جەكتىڭ بارلىعىندا بەلالدىڭ ۇستەمدىگى ەش كۇمان تۋعىزعان جوق.
