تۇماندى البيون ەلىندەگى تولاعاي تابىسىنان كەيىن ەلەنا رىباكينا «كەزىندە مەنى قازاقستان قاتتى قولدادى. سونىڭ قايتارىمى بولۋى كەرەك. مەنىڭ ەندىگى مىندەتىم – دارىندى جاستارعا بارىنشا قولداۋ كورسەتۋ. سول ءۇشىن جاس ورەندەرگە ارناپ تۋرنير ۇيىمداستىرۋدى نەمەسە قارجىلاي كومەك كورسەتۋدى كوزدەپ وتىرمىن», دەپ تەبىرەنە سويلەگەن ەدى.
ەلەنا ايتقان سوزىندە تۇردى. تاياۋدا ول وسى سپورت ءتۇرىن سەرىك ەتكەن جاس ورەندەر اراسىنان 14 ويىنشىنى تاڭداپ الىپ, سولاردىڭ ارقايسىنا 2,5 ميللليون تەڭگەدەن تابىس ەتتى. ايگىلى تەننيسشىنىڭ شاپاعاتىن كورگەندەر اراسىندا لينارا بولەشەۆا, پولينا بارابانوۆا, ءامينا نۇرماحان, اريانا گوگۋلينا, ساتيما تورەگەن, ەۆا كورىشەۆا, ءالبينا كاكەنوۆا, ارۋجان ارىستانبەكوۆا, دانا بايداۋلەت, ىڭكار دۇيسەباي, ايا ءنۇپباي, پولينا سلەپتسوۆا, ساندۋعاش كەنجەباەۆا جانە زارا داركەن سىندى قارىمدى قىزدار بار.
23 جاستاعى ەلەنا رىباكينا ماسكەۋدە دۇنيەگە كەلگەنىمەن, ۇلكەن سپورتتاعى تولاعاي تابىستارىنىڭ بارلىعىنا قازاقستاننىڭ تۋى استىندا ونەر كورسەتكەن كەزدە قول جەتكىزدى. ول ءبىزدىڭ ەلدىڭ ازاماتتىعىن 2018 جىلدىڭ جازىندا الدى. سول ۋاقىتتان بەرى كوپتەگەن ءدۇبىرلى دودادا دارالاندى. اتاپ ايتساق, بىلتىر ۋيمبلدوندا باس جۇلدەنى ولجالاسا, بيىل اۋستراليا اشىق بىرىنشىلىگىنىڭ فينالىندا وينادى. توكيو وليمپياداسىندا ءتورتىنشى ورىنعا تابان تىرەپ, WTA تۋرنيرلەرىندە ءتورت رەت توپ جاردى. اتالعان جارىستاردا اتاعى الىسقا جايىلعان كوپتەگەن ساقا ويىنشىنى تىزە بۇكتىردى. قازىرگى كەزدە ول الەمدىك رەيتينگتە جەتىنشى ورىندا تۇر. وسى كۇنگە دەيىن قازاقستاننىڭ بىردە-ءبىر تەننيسشىسى ءدال وسىنداي دەڭگەيگە جەتكەن ەمەس.
