«الماتى جاستارى» باعدارلاماسى 2017 جىلدان بەرى ىسكە اسىرىلىپ كەلەدى. بۇگىندە باعدارلاما بويىنشا 35 جاسقا دەيىنگى ناقتى ءبىر سالادا جۇمىس ىستەيتىن جاستارعا نەسيە بەرىلەدى. بىلتىر باعدارلاماعا ءبىلىم بەرۋ, دەنساۋلىق ساقتاۋ, باق, قۇقىق قورعاۋ ورگاندارى, مادەنيەت, سپورت, جوو مەن عزي, الەۋمەتتىك سالا ماماندارى قاتىسسا, بيىل قىزمەت سالالارىنا وزگەرىستەر ەنگىزىلەدى دەپ جوسپارلانعان.
– 2017 جىلدان باستاپ قالامىزدا «الماتى جاستارى» جەڭىلدەتىلگەن باعدارلاماسى جۇزەگە اسىپ جاتىر. ول بارلىق وڭىردە ايماقتىق باعدارلامالاردىڭ ىسكە قوسىلۋىنا نەگىز بولدى. «ەلوردا جاستارى», «الاتاۋ جاستارى» باعدارلامالارى بار. مۇندا ءار ايماقتا نەسيە بەرۋ شارتتارى ءارتۇرلى. باعدارلاماعا قاتىساتىن بىلتىرعى سالا قىزمەتكەرلەرى بيىل تىزىمگە كىرەدى دەپ ويلايمىز. بيىل ءبىلىم بەرۋ مەن دەنساۋلىق ساقتاۋ سالالارى بويىنشا ليميت ۇلعايعان سوڭ نەسيە بەرىلەتىن ادام سانى دا ارتتى. باعدارلاما شارتتارىنا كەلسەك, باستاپقى جارنا – 10 پايىز, مولشەرلەمە – 5 پايىز, نەسيەلەۋ سوماسى بىلتىرعىداي 18 ميلليون تەڭگە بولۋى مۇمكىن, – دەدى د.ءتۇسىپوۆا.
ونىڭ ايتۋىنشا, تۇرعىن ءۇي باعدارلاماسى بويىنشا ءبىر نەسيەنىڭ شەكتى مولشەرى وزگەرمەيدى. ياعني 18 ميلليون تەڭگە بولىپ قالۋى مۇمكىن.
– قالا اكىمدىگى مەن وتباسى بانكىنەن 20 ميلليارد تەڭگە ءبولىنىپ وتىر. وسى سومانىڭ اياسىندا 1100 جاس مامانعا جەڭىلدەتىلگەن نەسيە بەرىلەدى. باعدارلامانىڭ باستالۋى مەن شارتتارى تۋرالى اقپاراتتى قوسىمشا حابارلايمىز. قازىر كەلىسىمشارت جاسالىنىپ, ءوتىنىم قابىلدايتىن سايت ازىرلەنىپ جاتىر, – دەدى «وتباسى بانك» اق الماتى فيليالىنىڭ ديرەكتورى.
ايتا كەتەيىك, بىلتىر تۇرعىن ءۇي باعدارلاماسى اياسىندا مىڭ ادامعا يپوتەكالىق نەسيە بەرۋ ءۇشىن 18 ملرد تەڭگە بولىنگەن بولاتىن. بۇل جوبامەن باسپانالى بولۋ ءۇشىن قالادا تۇراقتى تىركەلۋ مىندەتتى ەمەس.
