ەقىۇ/دياقب جانە ەقىۇ پارلامەنتتىك اسسامبلەياسىنىڭ ميسسياسىنان 410 بايقاۋشى اككرەديتتەۋدەن ءوتتى. سونىڭ ىشىندە 350 ادام 17 وبلىستا جانە رەسپۋبليكالىق ماڭىزى بار 3 قالادا سايلاۋدى بايقادى. سايلاۋ كوميسسيالارى بايقاۋشىلاردىڭ جۇمىسى ءۇشىن بارلىق جاعدايدى جاسادى. سايلاۋ قارساڭىندا وڭىرلەرگە ساپار بارىسىندا وسك مۇشەلەرى بايقاۋشىلارمەن كوپتەگەن كەزدەسۋ وتكىزدى.
ورتسايلاۋكوم باسشىسى پارلامەنت ماجىلىسىنە كەزەكتەن تىس سايلاۋدىڭ قورىتىندىسى تۋرالى حاباردار ەتىپ, وتكەن سايلاۋ ناۋقانى باسەكەلەستىكتىڭ جوعارى دەڭگەيدەگى ەرەكشەلىگىمەن, ۇلكەن قوعامدىق قىزىعۋشىلىق تۋدىرعانىن, ۇلتتىق جانە شەتەلدىك بايقاۋشىلاردىڭ, سونداي-اق باق وكىلدەرىنىڭ تەڭدەسسىز كوپ سانىن تارتقانىن اتاپ ءوتتى. نۇرلان ءابدىروۆ ەقىۇ/دياقب-مەن ىنتىماقتاستىقتى كەڭەيتۋ قاجەتتىگىنە سەنىم ءبىلدىردى.
ءوز كەزەگىندە, وۋەن مەرفي وتكەن سايلاۋدىڭ ماڭىزدىلىعىن اتاپ ءوتىپ, وسك-نىڭ ءرولى مەن ماڭىزىنا توقتالدى. «سايلاۋدى ۇيىمداستىرۋ بويىنشا اتقارعان جۇمىستارىڭىزبەن قۇتتىقتايمىز, ءتيىمدى باسقارۋدى قاجەت ەتەتىن كوپتەگەن كۇردەلى جاڭاشىلدىق پەن وزگەرىستەر بولدى», دەدى شەتەلدىك قوناق. سونداي-اق بايقاۋشىلاردىڭ قىزمەتىن ۇيىمداستىرۋعا كومەكتەسكەنى ءۇشىن العىسىن ءبىلدىردى.
ەقىۇ/دياقب ميسسياسى كەزەكتەن تىس پرەزيدەنتتىك سايلاۋدى جانە پارلامەنتى ءماجىلىس دەپۋتاتتارىنىڭ سايلاۋىن بايقاۋ بويىنشا ەكى بولەك قورىتىندى ەسەپ دايىندايتىنىن حابارلادى. سونىمەن قاتار پارلامەنتتىك سايلاۋدى بايقاۋ جونىندەگى ەسەپ جاريالانعاننان كەيىن ورتالىق سايلاۋ كوميسسياسى مەن مۇددەلى مەملەكەتتىك ورگاندارعا ارنايى كەلىپ تانىستىراتىنىن جەتكىزدى.
ءوز كەزەگىندە نۇرلان ءابدىروۆ ۇسىنىستى قابىلداۋعا دايىن ەكەنىن ءبىلدىرىپ, ورتسايلاۋكوم بيۋرومەن, ونىڭ ىشىندە سايلاۋ ناۋقاندارى اراسىنداعى سىندارلى ديالوگتى جالعاستىرۋىنا ۇلكەن ءمان بەرىلەتىنىن اتاپ ءوتتى. ميسسيانىڭ قورىتىندى ەسەپتەرى وسك جانىنداعى ساراپتامالىق كەڭەستىڭ وتىرىستارىندا تالقىلانادى.
سونداي-اق ميسسيا باسشىسىنا سايلاۋ كوميسسيالارى قابىلداعان شارالار تۋرالى, ونىڭ ىشىندە سايلاۋ كۇنى ازاماتتاردىڭ وتىنىشتەرى مەن شاعىمدارىن جەدەل قاراۋ, جىبەرىلگەن جەكەلەگەن بۇزۋشىلىقتار فاكتىلەرى بويىنشا قابىلدانعان شارالار تۋرالى اقپارات بەردى.
كەزدەسۋ سوڭىندا نۇرلان ءابدىروۆ ەقىۇ/دياقب ميسسياسىنىڭ باسشىسى مەن مۇشەلەرىنە اتقارىلعان جۇمىسى ءۇشىن ريزاشىلىعىن ءبىلدىرىپ, قازاقستاندىق تاراپ وتكەن سايلاۋ بويىنشا قورىتىندى ەسەپتەردە ميسسيانىڭ بارلىق ۇسىنىمىن زەردەلەيتىنىن, وسك مەن دياقب ميسسياسىنىڭ وزەكتى ماسەلەلەر بويىنشا اشىقتىعى مەن سىندارلى ىنتىماقتاستىعى قاعيداتتارىندا ديالوگتى جالعاستىرۋ نيەتىن راستايتىنىن اتاپ ءوتتى.
