قوعام • 27 ناۋرىز، 2023

مينيسترلىك شەتەلدەن اكەلىنگەن كولىكتەردى زاڭداستىرۋعا قاتىستى مالىمدەمە جاسادى

128 رەت كورسەتىلدى

قازاقستان رەسپۋبليكاسى ىشكى ىستەر مينيسترلىگى اكىمشىلىك پوليتسيا كوميتەتىنىڭ توراعاسى قايسار سۇلتانباەۆ ۆەدومستۆودا وتكەن بريفينگتە قازاقستاندىقتاردىڭ قانشا كولىكتى زاڭداستىرعانىن ايتتى، دەپ حابارلايدى Egemen.kz.

كوميتەت باسشىسىنىڭ ايتۋىنشا، 2023 جىلدىڭ 23 قاڭتارى مەن 26 ناۋرىزى ارالىعىندا 69 مىڭنان استام كولىك زاڭداستىرىلعان.

«ونىڭ 67%-ى – 46 592 اۆتوكولىك رەسەي فەدەراتسياسىنان، 19%-ى – ارمەنيادان – 13 424 اۆتوكولىك، 10%-عا جۋىعى – 6 788 اۆتوكولىك قىرعىزستاننان، 2%-عا جۋىعى – 1296 اۆتوكولىك گرۋزيادان اكەلىنگەن»، دەدى قايسار سۇلتانباەۆ.

ول ىشكى ىستەر مينيسترلىگى دە «اۆتوكونسترۋكتورلار» دەپ اتالاتىنداردى، ياعني قوسالقى بولشەكتەر اتىن جامىلىپ اكەلىنگەن كولىكتەردى زاڭداستىرۋدىڭ شارتتارىن ايقىندايتىن ۇكىمەت قاۋلىسىنىڭ جوباسىن ازىرلەگەنىن ايتتى.

«جوبا قوعامدىق تالقىلاۋدان ءوتتى، قازىر ونىڭ قورىتىندىسىن شىعارىپ جاتىرمىز، سودان كەيىن جوبانى تۇپكىلىكتى بەكىتۋگە مەملەكەتتىك ورگاندارعا جىبەرىپ، ۇكىمەتكە جىبەرەمىز»، دەدى ول.

ۆەدومستۆو وكىلى اتاپ وتكەندەي، بيىلعى جىلدىڭ 23 قاڭتارىنان باستاپ مەملەكەت باسشىسىنىڭ تاپسىرماسى بويىنشا 2022 جىلدىڭ 1 قىركۇيەگىنە دەيىن ەلىمىزگە اكەلىنگەن شەتەلدىك اۆتوكولىكتەردى زاڭداستىرۋ جۇمىستارى جۇرگىزىلىپ جاتىر.

زاڭداستىرۋعا وتىنىشتەر بارلىق حالىققا قىزمەت كورسەتۋ ورتالىقتارىندا، سونداي-اق «ەلەكتروندىق ۇكىمەت» پورتالىندا ازاماتتارعا قولجەتىمدى ەلەكتروندىق سەرۆيس جانە ەكىنشى دەڭگەيلى بانكتەردىڭ ءموبيلدى قوسىمشالارى ارقىلى قابىلدانادى.

كولىك قۇرالىنىڭ نەگىزگى زاڭداستىرۋ كريتەريلەرىنە سايكەستىگىنە سوتتىلىقتى، كەدەندىك دەرەكتەر بازاسىن جانە باسقا دا اقپاراتتىق جۇيەلەردى الدىن الا تەكسەرۋ پروتسەسى تولىعىمەن اۆتوماتتاندىرىلعان. زاڭداستىرۋ جۇمىستارى جالعاسىپ جاتىر.

ۇقساس جاڭالىقتار