كوك تەڭىزگە كوز تىككەن

جانى ولەڭگە، ادەبيەتكە قۇشتار اۋىل بالاسى 2-سىنىپ بىتىرگەن جىلى استانا قالاسىنا كەلگەندە اسكەري كيىم كيگەن وندىردەي ورەندەردى كورگەن ساتتەن-اق، اسكەري كيىمگە دەگەن قىزىعۋشىلىعى وياندى. وقالى كيىم كيىپ، ساپتا سىمداي تارتىلعان سولدات بولۋدى ءجيى ارماندايتىن بولدى. بالا قيالىن تەربەگەن وسى ارمان قۋانىشبەكتى 2005 جىلى ارميا گەنەرالى، حالىق قاھارمانى، تاۋەلسىز ەلى­مىزدىڭ تۇڭعىش قورعانىس ءمينيسترى ساعادات نۇرماعانبەتوۆ اتىنداعى رەسپۋبليكالىق «جاس ۇلان» مەك­تەبىنە الىپ كەلدى. اتالعان مەكتەپتە ءتورت جىل وقىپ اسكەري ءومىردىڭ الىپپەسىن ۇيرەنگەن سوڭ، 2009 جىل­دىڭ قىركۇيەك ايىنان باستاپ ءبى­لىمىن تۇركيا رەسپۋبليكاسىنىڭ ىستانبۇل قالاسىنداعى اسكەري-تە­ڭىز ليتسەيىندە جالعاستىرادى. بۇل ليتسەيگە وقۋعا ءتۇسۋ دە وڭاي بولعان جوق، قازاقستاننان نەبارى ون ورىنعا 180 بالا باق سىناپ، اراسىنان جۇزدەن جۇيرىك شىق­قاندار عانا جولداما الدى. اس­كەري ومىرگە قىزىعۋشىلىعى جو­­­عارى، ساباقتا ۇزدىك وقىعان قۋا­­­نىشبەكتىڭ باعى جاندى – ول قيىن سىناقتاردان سۇرىنبەي ءوتىپ ىرىكتەلگەن ون بوزبالانىڭ ءبىرى بولىپ تۇركياعا جول تارتتى. سۇيىك­تى اتا-اناسى 2003 جىلى قۋا­نىش­بەك توعىز جاسقا كەلگەندە جول اپاتىنان قايتىس بولعان ەدى، ەكى قامقور-تىرەگىنەن ءبىر كۇندە ايرىلعان قۋانىشبەك جالعىز ءىنىسىن ەلدە اعايىن-تۋىس اراسىنا قالدىرىپ ازامات بولۋدىڭ جولىنا ءتۇستى. بەس جىل ليتسەيدە، ءبىر جىل تۇرىك ءتىلىن ۇيرەنۋ كۋرسىندا – بارلىعى التى جىل ءبىلىم العان قۋانىشبەك ديۋسەمباەۆ 2015 جىلى اتالعان ليتسەي­دى جاقسى كورسەتكىشپەن اياق­تاعان سوڭ ىستانبۇلداعى اسكە­ري-تەڭىز اكادەمياسىنا قابىلدانادى.

اكادەميادا اسكەري ءومىردىڭ ناعىز قىزىعى مەن قيىندىعىن كورىپ جەتىلە تۇسەدى – شىڭدالادى، شيرىعادى. توعىز ارالدى تۇر­كيانىڭ ءبىر ارالىندا التى جىل مەكەن ەتكەن ول كاسپي تەڭىزىن دە وسى وقۋدا ءجۇرىپ كورەدى. الدىمەن شاعىن پارۋستارمەن، كەيىننەن ۇلكەن كەمەلەرمەن ايدىنعا شىق­قان جاس تەڭىزشى تەك كاسپي ەمەس ەۋروپا ەلدەرىن ارالاۋعا مۇم­كىندىك الادى. وقۋ بارىسىندا يس­پانيا، پورتۋگاليا،فرانتسيا، كيپر، مالتا، يتاليا ەلدەرىن ارالاپ، جەرگىلىكتى حالىقتىڭ تۇر­مىس-تىرشىلىگىمەن تانىسىپ، تابي­عاتىن تاماشالادى. ءومىر كوردى، جەر تانىپ، ەلدى قىزىقتادى، ءوزى سياقتى اسكەري ەرلەردىڭ ورتاسىنا قالىپتاستى، اسكەري قىزمەت مەك­تەبىنىڭ كاسىبي شەبەرىنە اينالدى.

2019 جىلى اكادەميانى ءبىتىرىپ لەيتەنانت شەنىمەن قازاق­ستانعا ورالعان قۋانىشبەك مۇرات­بەك ۇلى قورعانىس مينيسترلىگىنىڭ جۇم­ساۋىمەن قازاقستان رەسپۋب­لي­كاسى اسكەري-تەڭىز كۇشتەرى اق­تاۋ قالا­سىنداعى اسكەري بازاسىندا 2901 اسكەري ءبولىمى قاراماعىنداعى 21814 اسكەري ءبولىمى ارتەكتى كەمەلەر ديۆيزيونىنا «ورال» زىمى­ران ار­تيللەريالىق كەمەسىنىڭ شتۋر­ماندىق-جاۋىنگەرلىك ءبو­لىمى­نىڭ توپ كومانديرى بولىپ تاعايىن­دا­لادى.

– قىزمەتىم وزىمە ۇنايدى، اس­كەري وقۋ ماعان ەل كورۋگە، جەر كورۋگە مول مۇمكىندىك بەردى. وسى ءجۇرىس-تۇرىستار، ىزدەنىستەر ناتي­جە­سىندە شەتەل تىلدەرىن ۇيرەن­گەنىمدى وزىمە زور قۋانىش سانايمىن، قازىر قازاق، ورىس، اعىلشىن جانە تۇرىك تىلدەرىندە ەركىن سويلەي الامىن، ال نەمىس ءتىلىن وقىدىم، بىراق جاقسى بىلەمىن دەپ ايتا المايمىن. 2022 جىلى قوسىمشا ءۇن­دىستاندا التى اي IT كۋرسىن وقىپ، اقپاراتتىق تەحنولوگيا وفي­تسەرى اتاندىم. ەلىمىزدى دامىتۋ، سونداي-اق قىزمەتتىك مىندەتىمىزگە ساي كاس­پي تەڭىزىنىڭ قازاقستاندىق سەك­تورىنىڭ قاۋىپسىزدىگىن ساقتاۋ – ازا­ماتتىق جانە اسكەري پارىزىم دەپ بىلە­مىن، بارلىق كۇش-جىگەرىمدى وسى مۇددەگە جۇمسايمىن، – دەيدى ول.

وقۋشى كەزىندە كاراتەگە قا­تىسىپ، فۋتبول ويناۋعا قۇش­تار بولعان قۋانىشبەكتىڭ ولەڭ جا­زاتىن ونەرى بار ەكەن، ءتىپتى ءوزىنىڭ شاعىن كىتاپشاسى دا بولىپتى. بىراق اسكەري ءومىردىڭ تەمىر­دەي ءتارتىبى، ۋاقىتتىڭ جاپپاي جاتتىعۋلارعا ارنالۋى ولەڭجاندى جىگىت پەن سۇلۋ ولەڭ شۋماقتارىنىڭ اراسىن الىستاتىپ جىبەرسە كەرەك. وقۋشى كەزىندە «اباي وقۋلارىنا» قاتىسىپ جۇلدەلى ورىن العان ول «مانەرلەپ وقىعاندى ۇناتامىن» دەيدى. «كىتاپ وقىعاندى قالايتىن ەدىم، الايدا قازىر وعان مۇمكىندىك از. مەن اسكەري ءومىردى تاڭداعانىما وكىنبەيمىن، دەمەك، بۇل – مەنىڭ جولىم» دەيدى اعا لەيتەنانت ق.ديۋسەمباەۆ. بۇدان ەكى جىل بۇ­رىن «ورال» جاۋىنگەرلىك كەمە­سىنىڭ شتۋرماندىق-جاۋىنگەرلىك ءبو­لىمىنىڭ كومانديرى بولىپ تا­عايىندالعان قۋانىشبەك مۇرات­بەك­ ۇلىنىڭ شەنى دە جوعارىلاپ، يىعىنا اعا لەيتەنانت جۇلدىزىن تاقتى.

تۋعان ەلگە ورالعان سوڭ ءوزىن تۇركيادان ون جىل كۇتكەن سۇيىكتى قىزىمەن شاڭىراق كوتەردى. جارى ءلاززات «مەملەكەتتىك باسقارۋ ءىسى» ماماندىعى بويىنشا ۋنيۆەرسيتەت، ماگيستراتۋرا بىتىرگەن جوعارى ءبىلىمدى مامان. قازىرگى تاڭدا اقتاۋ قالاسىندا پاتەر جالداپ تۇراتىن قۋانىشبەك پەن ءلاززاتتىڭ وتباسىندا كىشكەنتاي قىز بالا ءوسىپ كەلەدى. جالعىز ءىنىسى دە وتباسىلى بولعان، استانا قالاسىندا تۇرادى ەكەن. «ورنىندا بار وڭالار» دەگەندەي، ءىنىسى ەكەۋى وقىستا قايتىس بولعان اتا-اناسىنىڭ شاڭىراعىن تىكتەپ، ۇرپاق ساباقتاستىعىن جال­عاستىرۋدا.

قۋانىشبەكتىڭ سوزىنەن شۇكىر­شىلىكتى، سابىرلىلىقتى بايقادىم. مەملەكەتتىڭ مۇددەسىن جەكە باس قا­جەتتىلىگىنەن جوعارى قويۋ، شەكا­رانىڭ تىنىشتىعىنا شۇكىر ەتۋ قۋانىشبەك ديۋسەمباەۆ سىندى جاس وفيتسەرلەردىڭ بويىنان تابىلعانى قۋانتادى.

ماڭعىستاۋ وبلىسى