باتۋميدە ناۋرىز مەرەكەسى تويلاندى

قازاقستاننىڭ گرۋزياداعى ەلشىسى مالىك مىرزالين ءوزىنىڭ قۇتتىقتاۋ سوزىندە ناۋرىزدىڭ بەيبىتشىلىك پەن مەيىرىمدىلىكتى بەينەلەيتىنىن، قۋانىش پەن سۇيىسپەنشىلىككە تولى، تەرەڭ فيلوسوفيالىق ءمانى مەن جالپىالەمدىك مادەني ماڭىزى بار، بىرلىك پەن كەلىسىم مەرەكەسى، سونداي-اق دوستىق پەن ءوزارا سىيلاستىقتى نىعايتۋعا ىقپال ەتەتىن شىن مانىندە جالپىحالىقتىق مەيرام ەكەنىن اتاپ ءوتتى. 

ادجاريا جوعارعى كەڭەسىنىڭ ۆيتسە-سپيكەرى تيتە اروشيدزە دە قۇتتىقتاۋ ءسوز سويلەپ، حالىقتار اراسىندا تىعىز دوستىق قارىم-قاتىناس ورناتۋدا حالىقارالىق ناۋرىز مەرەكەسىنىڭ ماڭىزدىلىعى مەن وزەكتىلىگىن اتاپ ءوتتى. ادجاريا استاناسىندا ناۋرىز مەرەكەسىن وتكىزگەنى ءۇشىن قازاقستان ەلشىلىگىنە العىسىن ءبىلدىرىپ، اتالعان ءىس-شارا قازاقستان مەن گرۋزيا اراسىنداعى مادەني-گۋمانيتارلىق ىنتىماقتاستىققا تاعى ءبىر جاڭا ۇلەس بولاتىنىنا سەنىم ءبىلدىردى. 

ءىس-شارا اياسىندا قازاق مادەني مۇراسىنىڭ اسەمدىگى مەن بايلىعىن كورسەتەتىن باتا بەرۋ مەن شاشۋ قازاقتىڭ سالت-داستۇرلەرى كورسەتىلدى. قوناقتار اسىق اتۋ، ارقان تارتۋ جانە باسقا دا ۇلتتىق سپورت تۇرلەرى بويىنشا جارىستارعا قاتىستى. 

مادەني باعدارلاما بارىسىندا ماڭعىستاۋ وبلىسىنان ارنايى كەلگەن «اق شاعىل» ەتنو-فولكلورلىق توبى مەن «جورعا» بي ءانسامبلى ءوز ونەرلەرىن كورسەتتى. قازاق شىعارمالارىنىڭ كونە ۇلتتىق مۋزىكالىق اسپاپتاردا ۆيرتۋوزدىق ورىندالۋى جانە داستۇرلەرىمىزدى كورسەتەتىن حالىق بيلەرى كورەرمەندەردىڭ قوشەمەتىنە بولەندى. 

مەرەكە قوناقتارى، باتۋمي تۇرعىندارى مەن تۋريستەرى ارنايى تىگىلگەن قازاق كيىز ۇيىندە ورنالاسقان ا. كەكىلباەۆ اتىنداعى ماڭعىستاۋ وبلىستىق تاريحي-ولكەتانۋ مۇراجايىنىڭ زەرگەرلىك بۇيىمدارىمەن، ۇلتتىق كيىمدەرىمەن قۋانا تانىستى.

ءداستۇرلى قازاق تاعامدارىنىڭ باي ءمازىرى جانە كوكتەمنىڭ باستى تاعامى – ناۋرىز كوجەمەن مەرەكەلىك داستارحان جايىلدى. ناۋرىزدى مەرەكەلەۋدىڭ شارىقتاۋ شەگى تۇساۋكەسەر ءداستۇرلى ءراسىمىن وتكىزۋ بولدى.