ءاليحان سمايىلوۆ: مەملەكەتتىك ورگاندار ماسەلەنى ۋاقىتىلى شەشۋى كەرەك

ۇكىمەت باسشىسى پروبلەمالىق ماسەلەلەردى جەدەل شەشۋ ءۇشىن مينيسترلىكتەر، اكىمدىكتەر مەن ۇلتتىق كومپانيالار اراسىنداعى ۇيلەستىرۋدى كۇشەيتۋدىڭ ماڭىزىن اتاپ ءوتتى. وسى ورايدا پرەمەر-مينيستر اكىمدىكتەر جەرگىلىكتى جەرلەردەگى پروبلەمالار تۋرالى ۇكىمەتكە تولىق اقپارات بەرە بەرمەيتىنىن اتاپ ءوتتى.

«ماسەلەن، جىلىتۋ ماۋسىمىنا نەمەسە سۋ تاسقىنىنا دايىندىق كەزىندە، ينفراقۇرىلىمدى جاڭعىرتۋ جانە جوندەۋ بويىنشا مالىمەتتەر ۋاقىتىلى جانە تولىق بەرىلمەيدى. ناتيجەسىندە پروبلەمالار دۇرىس شەشىلمەيدى. بۇل توتەنشە جاعدايلارعا الىپ كەلەدى. وتكەن قىس ايى مەن كوكتەمدە وندايدىڭ ءبىرازىن كوردىك. ناقتى ءىس جۇزىندەگى ناتيجەلەر قاجەت. سوندا عانا ازاماتتار جاعدايدىڭ وزگەرگەنىن، ءومىر ءسۇرۋ ساپاسىنىڭ جاقسارعانىن سەزىنەتىن بولادى. ءاربىر مەملەكەتتىك ورگان مەن اكىمدىك، ۇلتتىق كومپانيالار جاعدايدى ءجىتى باقىلاپ، بۇقارالىق اقپارات قۇرالدارى مەن الەۋمەتتىك جەلىلەرگە مونيتورينگ جۇرگىزۋى ءتيىس»، دەدى پرەمەر-مينيستر. 

سونىمەن قاتار ۇكىمەت باسشىسى بەلسەندى تۇردە ءتۇسىندىرۋ جۇمىستارىن جۇرگىزىپ، الدىن الۋ شارالارىن قابىلداپ، ماسەلەلەردى ۋاقىتىلى شەشۋ كەرەكتىگىن ايتتى.

پرەمەر-ءمينيستردىڭ ورىنباسارى – ۇكىمەت اپپاراتىنىڭ باسشىسى عالىمجان قويشىباەۆ ءوز سوزىندە كۇن سايىن حالىقتىڭ جاريالانىمدارى، شاعىمدارى مەن وتىنىشتەرىنىڭ دايدجەستى جاسالاتىنىن، ال اسا وزەكتى ماسەلەلەر جەدەل جانە پرواكتيۆتى تۇردە شەشۋ ءۇشىن تاۋەكەلدەر كارتاسىنا ەنگىزىلەتىنىن اتاپ ءوتتى.

وعان قوسا ۇكىمەت اپپاراتى ازاماتتاردان كەلىپ تۇسكەن وتىنىشتەرگە تالداۋ جۇرگىزەدى. بۇل رەتتە وتىنىشتەردىڭ قارالۋىن باقىلاۋ كۇشەيتىلدى.

پرەمەر-مينيستر ۇيلەستىرۋ شتابىنىڭ وتىرىستارىندا وڭىرلەر مەن ورتالىق مەملەكەتتىك ورگانداردىڭ ءوزارا ءىس-قيمىلىن تالاپ ەتەتىن ماسەلەلەر ۇنەمى كوتەرىلىپ وتىراتىنىن اتاپ ءوتتى. سونىمەن قاتار پرەمەر-ءمينيستردىڭ ورىنباسارلارى كوتەرىلەتىن ماسەلەلەردى اپتا سايىن ءوز دەڭگەيىندە قارايتىن بولادى.

«ۇكىمەت اپپاراتى مەملەكەت باسشىسى مەن ۇكىمەت باسشىلىعىنىڭ تاپسىرمالارىنىڭ ورىندالۋ بارىسىن قاتاڭ باقىلاۋعا الۋى ءتيىس. بىزگە ءوزارا كەلىسىلگەن ءىس-ارەكەتتەر مەن ناقتى ناتيجە كەرەك»، دەپ تۇيىندەدى ءاليحان سمايىلوۆ.