مەملەكەت باسشىسى قازاقستان حالقىن ناۋرىز مەيرامىمەن قۇتتىقتادى

«ارداقتى اعايىن!

بارشاڭىزدى ۇلىستىڭ ۇلى كۇنىمەن شىن جۇرەكتەن قۇتتىقتايمىن!

ءاز-ناۋرىز – جاڭارۋ مەن جاڭعىرۋدىڭ، بەرەكە مەن بىرلىكتىڭ باستاۋى. جىلدىڭ بۇل مەزگىلى – كۇن مەن ءتۇن تەڭەلىپ، جەر ءجۇزى قايتا تۇلەيتىن شاق. سوندىقتان اتا-بابامىز ەجەلدەن شۋاقتى كوكتەم مەرەكەسىنە ايرىقشا ءمان بەرگەن، ونى ۇلىستىڭ ۇلى كۇنى دەپ ۇلىقتاعان.

قوعامداعى تاتۋلىق پەن كەلىسىم داستۇرلەرى ۇلتىمىزدىڭ سالت-ساناسى مەن ادەت-عۇرپى تۇگەل توعىسقان وسى مەيرامنىڭ سيپاتىنا ساي كەلەدى. ناۋرىز بۇگىندە ناعىز حالىقتىق مەرەكەگە اينالدى.

بۇل كۇندەرى مەيىرىمدىلىك، جاناشىرلىق، جاسامپازدىق سياقتى قاسيەتتەر ەرەكشە دارىپتەلەدى. سونىڭ ارقاسىندا ەلىمىز بىرلىگىن بەكەمدەپ، تاتۋ-ءتاتتى ءومىر ءسۇرىپ جاتىر.

حالقىمىز ءاردايىم ناۋرىز مەيرامىن جاقسىلىقتىڭ جارشىسىنا بالاعان. قازاقستان دامۋدىڭ جاڭا داۋىرىنە قادام باستى. تۇبەگەيلى وزگەرىستەر قاستەرلى وتانىمىزدى وركەندەتۋگە تىڭ سەرپىن بەرەدى دەپ سەنەمىن. ىنتىماعى جاراسقان جۇرتىمىزدىڭ ىرىسى ارتىپ، قولعا العان يگى باستامالارىمىز وڭىنان بولسىن، اعايىن!

ءاز-ناۋرىز ءار شاڭىراققا شاتتىق پەن قۋانىش اكەلسىن!

وتباسىلارىڭىزعا اماندىق، قۇت-بەرەكە تىلەيمىن! 

ۇلىس وڭ بولسىن! 

اق مول بولسىن!»، دەلىنگەن پرەزيدەنتتىڭ قۇتتىقتاۋ سوزىندە.