پرەزيدەنت ناۋرىز مەرەكەسىمەن قۇتتىقتادى

«ناۋرىز – جىل باسى، حالقىمىز ەجەلدەن تويلاعان كوكتەم مەرەكەسى. بۇل – حالىق اسىعا كۇتەتىن اسا ەرەكشە مەيرام، قىستىڭ ىزعارى قايتاتىن، كوكتەم شۋاعىن توگەتىن ءسات. تابيعات تۇلەپ، تىرشىلىك قايتا جاڭاراتىن مەزگىل.

ەلىمىز ءاز-ناۋرىزدى ءاردايىم ىرىستى ىنتىماقتىڭ باستاۋىنا بالاعان. الىستاعى اعايىن ۇلىس كۇنى تاتۋلاسىپ، قايتا قاۋىشقان. جۇرت ءبىر-بىرىنە اقجارما تىلەكتەرىن ايتقان. كوپشىلىك ورتاق داستارحاننان ءدام تاتىپ، قاريالار جاستارعا باتاسىن بەرگەن.

بابالارىمىز ناۋرىز تويىن جاسامپاز ەڭبەكتىڭ مەيرامى ساناعان. بۇلاقتىڭ كوزىن اشىپ، اعاش وتىرعىزعان. ەلگە پايداسى تيەتىن يگى ىستەر اتقارعان. ءبىر سوزبەن ايتساق، ۇلىستىڭ ۇلى كۇنى – جاڭا ءومىردىڭ جارشىسى»، دەدى پرەزيدەنت.

قاسىم-جومارت توقاەۆ ناۋرىز مەيرامىنىڭ بارشاعا ورتاق مەيرام ەكەنىن اتاپ ءوتتى.

«بۇل مەيرامدى حالقىمىز تۇتاس ەل بولىپ، ءبىر ۇلت بولىپ تۇگەل تويلايدى. ناۋرىز كەزىندە بۇكىل ەلگە ورتاق قۇندىلىقتار دارىپتەلەدى. ياعني، ءاز-ناۋرىز – ناعىز حالىقتىق مەيرام»، دەدى توقاەۆ.

ء«ار شاڭىراققا قىدىر قونىپ، باق دارىسىن! جاڭا جىل قۇت-بەرەكە اكەلسىن! ۇلىس وڭ بولسىن! اق مول بولسىن!»، دەپ تىلەگىن ءبىلدىردى پرەزيدەنت.