ەل ومىرىندەگى ۇلكەن وقيعانىڭ ءبىرى – ءماجىلىس جانە ءماسليحاتتاردىڭ سايلاۋى. سول سەبەپتەن, بۇرىنعىدان وزگەشە بولعان بۇل سايلاۋدىڭ جاۋاپكەرشىلىگى دە, ماڭىزى دا زور.
ەلىمىزدە بىلتىرعى رەفەرەندۋمنان كەيىن العاش رەت ماجوريتارلىق سايلاۋ جۇيەسى ەنگىزىلدى. دەمەك بۇل سايلاۋدى سول رەفەرەندۋمنىڭ جەمىسى, جاڭارعان, ادىلەتتى قازاقستان قۇرۋعا باستايتىن تىڭ ءارى دەموكراتيالىق قادام رەتىندە باعالاعان ءجون.
پارلامەنت ءماجىلىسى جانە ءماسليحاتتار دەپۋتاتتىعىنا ءوزىن ءوزى ۇسىنىپ, سايلاۋدا باق سىناۋعا بەل بۋعان كانديداتتار كوبەيدى. ءوزىن ءوزى ۇسىنعان كانديداتتاردىڭ كوبەيگەنىنەن ەلدەگى دەموكراتيالىق ءۇردىستىڭ جاندانا باستاعانىن بايقاۋعا بولادى. سول سەبەپتەن, ساياسي دودا دۇبىرىنە قوسىلعان ءار كانديداتتىڭ باعدارلاماسىمەن ءجىتى تانىسىپ شىقتىم. ءبارى دە سايلاۋالدى باعدارلاماسىنا كوپتىڭ كوكەيىندەگى تۇيتكىلدى ماسەلەلەردى ارقاۋ ەتتى.
سايلاۋ ۋچاسكەسىندە تەك مەن عانا ەمەس, بارشا جۇرت سەنەتىن, جاۋاپتى جۇمىستار مەن ۇلكەن ىستەردىڭ باسى-قاسىنان تابىلاتىن, قوعامدا لايىقتى ورنى بار, ءوزىنىڭ ەمەس, تۇتاس قوعامنىڭ قامىن ويلاپ, بولاشاعىنا بەيجاي قارامايتىن كانديداتقا داۋىس بەردىم. ادىلەتتى قازاقستاننىڭ كەلەشەگى جارقىن بولۋى ءۇشىن سەرپىندى ىستەردىڭ جۇزەگە اسۋىنا ۇيىتقى بولا الاتىن قايراتتى, ىسكەر, ادال دەپۋتات قاجەت. ەلدىڭ سەنىمىنە يە بولعان سونداي دەپۋتتاتتار عانا ادىلەتتى قوعامدى قۇرۋعا اتسالىسادى. وسى تۇرعىدان ايتقاندا, بۇل سايلاۋدا جىگەرلى, بىلىكتى, ءبىلىمدى كانديداتتاردىڭ عانا جۇلدىزى جاندى. سول سەبەپتەن, جاڭادان سايلانعان دەپۋتاتتار ادالدىقتى باستى تەمىرقازىق رەتىندە ۇستانۋى قاجەت. سوندا عانا جاڭارۋعا بەت بۇرعان قازاقستاننىڭ بولاشاعى ساۋلەلى, قادامى ەركىن بولادى. ەڭ باستىسى كانديداتتارعا سەنىم بىلدىرگەن ەلدىڭ ءۇمىتى اقتالادى. اعا بۋىننىڭ وكىلى رەتىندە كەلەر ۇرپاق ءۇشىن تاۋەلسىزدىكتىڭ ىرىسى مەن جەمىسى مول بولعانىن قالايمىن.
يليا جاقانوۆ,
قازاقستاننىڭ ەڭبەك ەرى
اتىراۋ وبلىسى
