ايماق تۇرعىندارى بۇل سايلاۋدا دا بەلسەندى بولعانىن ايتا كەتكەن ءجون. 102 جاستاعى كەيۋانانىڭ سايلاۋ ۋچاسكەسىنە كەلىپ داۋىس بەرۋى – سونىڭ ءبىر ايعاعى. اباي اۋدانىنىڭ قۇلايعىر اۋىلىندا №442 سايلاۋ ۋچاسكەسىندە 102 جاستاعى تىل ەڭبەككەرى ءسابيلا ورمانباەۆا داۋىس بەردى. عۇمىر بويى ساۋىنشى بوپ ەڭبەك ەتكەن اجە ءار ادام جاسىنا قاراماستان داۋىس بەرۋدەن قالماۋعا ءتيىس دەگەن پىكىردە. «سەبەبى ەل بولاشاعى ءۇشىن بۇل جاۋاپتى قادام», دەيدى اجە.
قۇداي قوسقان قوساعىنان جاستاي جەسىر قالىپ, توعىز بالاسىن جالعىز ءوزى تاربيەلەپ, ەر جەتكىزگەن قايراتتى جان وسى كۇنى 25 نەمەرە مەن 6 شوبەرە ءسۇيىپ وتىر.
– جاسىنا قاراماستان اركىم داۋىس بەرۋى كەرەك دەپ سانايمىن. ەلدىڭ بولاشاعى بىزگە بايلانىستى. ەلىمىزدە بەيبىتشىلىك پەن كەلىسىم سالتانات قۇرۋىنا تىلەكتەسپىن, – دەيدى كەيۋانا.
نەكەلەرىن قيىپ جاتقان جاس جۇبايلار دا بۇل ساياسي وقيعاعا سالعىرت قاراماي سەنىم ارتقان ۇمىتكەرلەرىنە تاڭداۋ جاسادى. جاس جۇبايلار سەرعازى راحىمجان مەن مارال ەربولاتوۆا قاراعاندىنىڭ №62 سايلاۋ ۋچاسكەسىندە داۋىس بەردى.
– بۇگىن بىزگە قوس مەرەكە قاتار كەلگەن كۇن بولدى. ازاماتتىق بورىشىمىزدى وتەۋ ءۇشىن سايلاۋ ۋچاسكەسىنە كەلدىك. ويتكەنى بۇگىنگى ساياسي وقيعا ەلىمىز, بولاشاعىمىز ءۇشىن ماڭىزدى, – دەيدى جاس جۇبايلار.
بايقاۋشىلار تاراپىنان دا سايلاۋعا شاعىم تۇسكەن جوق. ولار دا حالىقتىڭ بەلسەندىلىگىن ەرەكشە اتاپ وتىر.
– سايلاۋشىلار تاراپىنان ەش شاعىم جوق. ءبىرىنشى داۋىس بەرگەندەردىڭ اراسىندا اعا بۋىن وكىلدەرى كوپ, جاستار دا از ەمەس, – دەپ اتاپ ءوتتى قاراعاندى قالاسىنىڭ №31 سايلاۋ ۋچاسكەسىندە كەزەكشىلىك ەتەتىن قازاقستان حالىق پارتياسىنىڭ بايقاۋشىسى قايىرلى قازىكەن.
قاراعاندى وبلىسى
