ەڭ ءبىرىنشى بولىپ قازاقستاندىقتار كورەيا مەن جاپونيادا داۋىس بەرۋگە مۇمكىندىك الدى. وسىلايشا, سەۋلدە №258 جانە توكيودا 261 سايلاۋ ۋچاسكەلەرى جەرگىلىكتى ۋاقىت بويىنشا ساعات 07.00-دە اشىلدى. سەۋل قالاسىندا ءبىلىم الىپ جۇرگەن كۋرسانت ەلنۇر اسانوۆ ءوز تاڭداۋىن ەڭ العاشقى بولىپ جاسادى.
«بۇل سايلاۋ ەلىمىز ءۇشىن ەكونوميكالىق دامۋدىڭ جاڭا مۇمكىندىكتەرىن اشادى دەپ كۇتەمىن. ترانسفورماتسيا ءبىزدىڭ مەملەكەتىمىز ءۇشىن قاجەت, ول ەلدىڭ دۇرىس باعىتتا دامۋىنا قۋاتتى سەرپىن بەرەدى دەپ سەنەمىن. مەن قازاقستان رەسپۋبليكاسىنىڭ ازاماتى رەتىندە ازاماتتىق بورىشىمدى ورىنداپ, ءوز ۇلەسىمدى قوسقىم كەلەدى! ەلىمىزگە نىعايىپ, وركەندەۋ تىلەيمىن», دەدى ە.اسانوۆ.
بۇدان كەيىن بەيجىڭ, شانحاي, گونكونگ, سينگاپۋر, كۋالا-لۋمپۋر, ۇلان-باتىر قالالارىندا داۋىس بەرۋ ۋچاسكەلەرى ءوز جۇمىسىن باستادى. سونداي-اق دجاكارتا, بانگكوك پەن حانوي قالالارىندا سايلاۋ ۋچاسكەلەرى اشىلدى. وسىلايشا, بىرىنەن كەيىن ءبىرى ۋاقىت بەلدەۋىنە سايكەس ءىرى قالالاردا ورنالاسقان سايلاۋ ۋچاسكەلەرى جۇمىسقا كىرىستى. ەلشىلىكتەر تاراتقان مالىمەتتەرگە سۇيەنسەك, ازاماتتارىمىز سايلاۋعا بەلسەندى قاتىسىپ جاتىر.
قىتاي ەلىندەگى سايلاۋ ۋچاسكەلەرى استانا ۋاقىتى بويىنشا ساعات 18.00-دە جابىلدى. ەستەرىڭىزگە سالا كەتەيىك, قىتاي حالىق رەسپۋبليكاسىندا وتانداستارىمىز 3 سايلاۋ ۋچاسكەسىندە داۋىس بەردى. كەلۋشىلەر ورتاشا ەسەپپەن 98 پايىزدى قۇرادى. ستۋدەنتتەر, ديپلوماتتار جانە ولاردىڭ وتباسى مۇشەلەرى, سونداي-اق وسى ەلدە جۇمىس ىستەيتىن ەل ازاماتتارى ءوز تاڭداۋلارىن جاسادى. داۋىس بەرۋشىلەر سانىنىڭ وسۋىنە قىتايداعى كوروناۆيرۋسقا بايلانىستى شەكتەۋلەر الىنىپ, شەكارانىڭ اشىلۋى ىقپال ەتتى.
ماسەلەن, ماسكەۋدەگى سايلاۋ ۋچاسكەسىندە ءبىرىنشى بولىپ رەسەي سىرتقى ىستەر مينيسترلىگى ديپلوماتيالىق اكادەمياسىنىڭ 2-كۋرس ستۋدەنتى دايانا كوشىموۆا داۋىس بەردى. «مەن ومىرىمدە ءبىرىنشى رەت داۋىس بەرىپ وتىرمىن. ەڭ الدىمەن, ءوز تاڭداۋىمدى ەلىمىزدىڭ يگىلىگى ءۇشىن جاسادىم. قازاقستاندىقتار باقىتتى ءومىر ءسۇرۋدى ۇيرەنۋى كەرەك, ويتكەنى ءبىز وعان لايىقپىز», دەپ ءوز ويىمەن ءبولىستى د.كوشىموۆا.
ال رەسەي قورعانىس مينيسترلىگىنىڭ كنياز الەكساندر نەۆسكي اتىنداعى اسكەري ۋنيۆەرسيتەتىنىڭ 2-كۋرس كۋرسانتى ەلەۋحان شادىمان سايلاۋعا العاشقىلاردىڭ ءبىرى بولىپ كەلدى. «ەلىمنەن جىراقتا جۇرسەم دە, ءوزىمنىڭ ازاماتتىق بورىشىمدى وتەۋ – مەن ءۇشىن جاۋاپتى ءىس. بۇگىنگى سايلاۋ ءبىز ءۇشىن مەرەكە, ماسكەۋدەگى قازاقتار بولىپ جينالىپ, داۋىس بەرۋگە كەلدىك», دەيدى ەلەۋحان شادىمان.
رەسەيدەگى قازاقستاننىڭ ەلشىلىگى جانىنداعى سايلاۋ ۋچاسكەسىنە ماسكەۋ وبلىسىنىڭ دۋبنا قالاسىنداعى بىرىككەن يادرولىق زەرتتەۋلەر ينستيتۋتىندا جۇمىس ىستەيتىن قازاقستاندىق عالىمدار بارعان ەكەن. ينستيتۋت ۇجىمى سايلاۋدا داۋىس بەرۋ ءۇشىن اۆتوبۋسپەن 100 شاقىرىم جول ءجۇرىپ وتكەن.
«بىرىككەن يادرولىق زەرتتەۋلەر ينستيتۋتىنداعى دياسپورادا جۇزگە جۋىق ادام بار. ولار جاس عالىمدار, ورتاشا جاسى 28-دە. پارلامەنت – بيلىكتىڭ باستى تارماقتارىنىڭ ءبىرى. ءبىزدىڭ مۇددەلەرىمىزدى قورعايتىن زاڭ شىعارۋشى ورگان. سوندىقتان ازاماتتىق ۇستانىمىمىزدى ءبىلدىرىپ, داۋىس بەرۋگە كەلدىك», دەدى بىرىككەن يادرولىق زەرتتەۋلەر ينستيتۋتىنداعى ۇلتتىق توپتىڭ جەتەكشىسى, الماتى قالاسى يادرولىق فيزيكا ينستيتۋتىنىڭ اعا عىلىمي قىزمەتكەرى ەرجان مۇحامەدجانوۆ.
مولدوۆادا تەمىرجول ينفراقۇرىلىمىن جاڭعىرتۋ جوباسىنا تارتىلعان «تەمىرجول جوندەۋ» كومپانياسىنىڭ قىزمەتكەرلەرى كيشينەۆتە داۋىس بەردى. ءتۇس قايتا سولتۇستىك امەريكادا ۆاشينگتون, نيۋ-يورك جانە وتتاۆادا سايلاۋ ۋچاسكەلەرى جۇمىس ىستەي باستادى. سان-فرانتسيسكودا شەتەلدەگى سوڭعى سايلاۋ ۋچاسكەسى اشىلدى.
بىشكەكتە №264 سايلاۋ ۋچاسكەسىندە جەرگىلىكتى ۋاقىت بويىنشا ساعات 20.00-دە داۋىس بەرۋ اياقتالدى. ۋچاسكە توراعاسى نۇرلان عىلمانوۆتىڭ ايتۋىنشا, داۋىس بەرۋشىلەردىڭ قاتىسۋى 39,6 پايىزدى قۇراعان. جالپى, قىرعىزستانداعى ەلشىلىكتە 300 ادام تىركەلگەن.
«بىشكەكتەگى №264 سايلاۋ ۋچاسكەسىنە جەرگىلىكتى ۋاقىت بويىنشا ساعات 20.00-دە تىركەلگەن سايلاۋشىلاردان 119 قازاقستاندىق داۋىس بەرۋگە كەلدى, بۇل 39,6 پايىزدى قۇرادى. داۋىستار سانالىپ, بيۋللەتەندەر رەسىمدەلىپ بولعاننان كەيىن سوڭعى قورىتىندى شىعارىلادى», دەدى ن.عىلمانوۆ.
قىرعىزستانداعى قازاقستان رەسپۋبليكاسى پارلامەنتى ءماجىلىسى دەپۋتاتتارىن كەزەكتەن تىس سايلاۋىندا تمد پارلامەنتارالىق اسسامبلەياسىنىڭ حالىقارالىق بايقاۋشىلارى مەن «بوستاندىق قاناتى» قوعامدىق قورىنىڭ تاۋەلسىز بايقاۋشىسى باقىلادى.
ءوز تاڭداۋىن جاساعاندار قاتارىندا قازاقستاندىق ديپلوماتتار مەن ولاردىڭ وتباسى مۇشەلەرى, حالىقارالىق جانە جەكە كومپانيالاردىڭ وكىلدەرى, سونىمەن قاتار اتالعان ەلدە ءبىلىم الىپ جاتقان ستۋدەنتتەر بار.
قازاقستاننىڭ تاجىكستانداعى ەلشىلىگى جانىنان اشىلعان №272 سايلاۋ ۋچاسكەسىندە اتالعان ەل اۋماعىندا ۋاقىتشا جانە تۇراقتى تۇرىپ جاتقان 100-دەن استام قازاقستان ازامات ەنگىزىلگەن. وتانىنداعى ساياسي وزگەرىسكە ءۇن قوسۋعا ۇمتىلعان قازاقستاندىقتار تاجىكستاننىڭ تۇكپىر-تۇكپىرىنەن دۋشانبەگە كەلىپ داۋىس بەردى. ەلشىلىك قىزمەتكەرلەرى سايلاۋدىڭ اشىق ءارى ءادىل وتۋىنە, ۋچاسكەنىڭ ۇزدىكسىز جۇمىس ىستەۋىنە بار كۇشىن سالىپ جاتقانىن ايتىپ وتىر.
«وتانداستارىمىز سايلاۋعا بەلسەندى قاتىسىپ جاتىر. تاڭعى ساعات 7.00-دەن سايلاۋ ۋچاسكەسىنە قازاقستاندىقتار كەلە باستادى. تىزىمگە تاجىكستان اۋماعىندا ۋاقىتشا جانە تۇراقتى تۇرىپ جاتقان قازاقستاندىقتار ەنگىزىلگەن. ونىڭ نەگىزگى بولىگى – بىرلەسكەن كاسىپورىنداردىڭ قىزمەتشىلەرى, ديپلوماتتاردىڭ وتباسى, ستۋدەنتتەر مەن تۋريستەر», دەيدى سايلاۋ ۋچاسكەسىنىڭ توراعاسى دارحان كوشەرباەۆ.
ايتا كەتەرلىگى, شەتەلدەگى بارلىق سايلاۋ ۋچاسكەلەرى قازاقستاننىڭ ديپلوماتيالىق وكىلدىكتەرىنىڭ اۋماقتارىندا ۇيىمداستىرىلعان. 12 016 ادام داۋىس بەرۋگە قۇقىلى. ورتالىق سايلاۋ كوميسسياسىنىڭ مالىمەتىنە سايكەس, استانا ۋاقىتىمەن كەشكى 19.00-دە شەتەلدەگى 11 ۋچاسكەلىك سايلاۋ كوميسسياسىنىڭ (سەۋل, توكيو, پەكين, سينگاپۋر, كۋالا-لۋمپۋر, ۇلان-باتور, گونكونگ, شانحاي, بانگكوك, دجاكارتا جانە حانوي) جۇمىسىن اياقتادى.
جالپى العاندا 5 071-گە جۋىق قازاقستان ازاماتى داۋىس بەردى, ياعني قاتىسۋ كورسەتكىشى 41,8 پايىزدى قۇرادى. ال قالعان 66 ۋچاسكە جۇمىسىن جالعاستىرىپ جاتىر.
