جانسايا جاراپ تۇر

قازاق قىزدارى اراسىندا ەڭ ۇزدىك كورسەتكىش جانسايا ابدى­ما­لىككە تيەسىلى. 23 جاستاعى ال­ماتى قا­لاسىنىڭ تۋماسى 2497 ۇپاي جي­ىپ، دۇنيەجۇزىلىك رەيتينگتە 13-ورىندى يەلەندى. بالاۋسا شا­عى­نان ورەلى ونەرىمەن كوزگە ءتۇسىپ جۇرگەن ول ۋاقىت وزا قازاقستاننىڭ عانا ەمەس، الىپ ازيانىڭ ەڭ ۇزدىك شاحماتشىسىنىڭ ءبىرى ءارى بىرەگەيىنە اينالدى. كە­زىندە جانسايا ءتۇرلى جاس ەرەك­شەلىكتەرى بويىنشا قۇرلىق چەمپيونى جانە الەم بىرىنشىلىگىنىڭ جۇل­دەگەرى اتاندى. 2017 جىل­دىڭ قاراشا ايىندا يتاليانىڭ تراۆيزيو قالاسىندا 20 جاسقا دەيىنگىلەر اراسىندا وت­كەن دۇنيەجۇزىلىك دودادا 11 مۇمكىندىكتەن 9،5 ۇپاي جيىپ، باس جۇل­­دەنى ولجالادى. ايەل­­دەر اراسىندا وت­كەن سايىستاردا دا جانسايا اب­دىمالىك قوماقتى تابىستارعا قول جەت­كىزدى. 2021 جىلدىڭ جازىندا گيبرالتاردا وتكەن فيدە-ءنىڭ گران-پري تۋرنيرىندە 11 مۇم­كىندىكتەن 8،5 ۇپاي جيعان ول التىننان القا تاقتى. ءبىر كەرەمەتى، وسى جارىستا جانسايا بىردە-ءبىر رەت جە­ڭىلىستىڭ كەرمەك ءدامىن تاتقان جوق. وسى تابىسىنىڭ ارقاسىندا ول حالىقارالىق گروسسمەيستەر اتاندى.

وسىدان ءبىر اي بۇرىن عانا 19 جاسقا تولعان ءبيبىسارا اساۋ­باەۆا دا تالاي بيىك بەلەستەردى باعىندىردى. تارازدىڭ تۋماسى ءوز قۇربىلارى اراسىندا سان مارتە قۇرلىقتىق جانە دۇنيەجۇزىلىك دودالاردا دارالاندى. 2021 جىلى ۆارشاۆادا جانە 2022 جىلى ال­ماتىدا بليتستەن وتكەن الەم چەمپيو­­ناتتارىندا قارسىلاس شاق كەل­تىرمەدى. راپيدتەن وتكەن جارىس­تا كۇمىس مەدالدى موينىنا ءىلدى. ايەل­دەر اراسىندا ازيا چەمپيونى دەگەن اتاعى تاعى بار. بۇل كۇندەرى ءبيبىسارا فيدە رەيتينگىندە 29 ورىندى ەنشىلەپ وتىر. ونىڭ قورجىنىندا 2 440 ۇپاي بار.

1996 جىلدىڭ كۇزىندە اس­تاندا دۇنيەگە كەلگەن دينارا سا­دۋاقاسوۆا دا ءتۇرلى جاس ەرەك­شەلىكتەرى بويىنشا بىرنەشە رەت الەم چەمپيونى اتاندى. اتاپ ايت­ساق، 14 جاس، 17 جاس، 18 جاس جانە 20 جاس­تاعىلار اراسىنداعى جا­رىستاردا الدىنا جان سالمادى. 2019 جىلى قىتايدىڭ سينتاي قالاسىندا جالاۋى جەلبىرگەن ايەلدەر اراسىنداعى ازيا چەمپيو­ناتىندا باس جۇلدەنى ولجالادى. كەزىندە توپ-15 شاحماتشىنىڭ قاتارىنا ەركىن ەنگەن دينارا سوڭعى كەزدەرى بايراقتى باسەكەلەرگە سيرەك قاتىسىپ ءجۇر. سونىڭ سالدارىنان الەمدىك رەيتينگتە دە ءبىراز تو­مەندەدى. قازىرگى كەزدە 2 434 ۇپاي جي­عان دينارا سادۋاقاسوۆا 32-ساتىعا جاي­عاستى.

كوش باسىنداعى جاعدايعا كەلەر بولساق، ادەتتەگىدەي قىتاي شاح­ماتشىلارى شاشالارىنا شاڭ جۇقتىراتىن ەمەس. توپ-10-دىقتىڭ قاتارىندا بۇل ەلدىڭ ءتورت وكىلى بار. كوش باسىندا – حوۋ يفان. 29 جاستاعى شەبەر ويىنشىنىڭ ءتورت دۇركىن الەم چەمپيونى دەگەن اتاعى بار. كوماندالىق سايىستا ول ءۇش مارتە توپ جاردى. قازىر يفان 2 628 ۇپايدى ولجالادى. قىتايدىڭ تسزيۋي ۆەنتسزيۋن (5-ورىن، 2 550 ۇپاي)، لەي تينتسزە (6-ورىن، 2 545 ۇپاي) جانە تان چجۋني (8-ورىن، 2 526) سىندى شەبەرلەرىنىڭ دە شا­­بىسى شيراق. سونداي-اق ۇن­دىس­تاندىق حامپي كونەرۋ (2-ورىن، 2 576 ۇپاي)، رەسەيلىك الەكساندرا گورياچكينا (3-ورىن، 2 576 ۇپاي) مەن كاتەرينا لاگنو (4-ورىن، 2 560 ۇپاي)، شۆەي­تسا­­ريالىق الەكساندرا كوس­تەنيۋك (7-ورىن، 2 536 ۇپاي)، گرۋزيالىق نانا دزاگ­نيدزە (9-ورىن،

2 525 ۇپاي) جانە ۋكراي­نالىق ماريا مۋزىچۋك (10-ورىن، 2 512 ۇپاي) ۇز­دىكتەر تى­زىمىنە ەندى.

وكىنىشكە قاراي، «وي­لىلار ويىنىن» سە­رىك ەتكەن جىگىت­تە­رىمىز قىز­دار سەكىلدى ەلەۋ­لى تا­­بىستارىمەن ماق­تانا ال­مايدى. قا­­زاقستاننىڭ ەر­لەر قۇراما كومان­­داسى مۇ­شەلەرى اراسىندا ەڭ ۇزدىك كورسەتكىش رينات جۇماباەۆقا تيەسىلى. 33 جاس­تاعى جەرلەسىمىز 2 609 ۇپايعا قول جەتكىزىپ، الەمدىك رەيتينگتەگى 162-ورىندى قاناعات تۇتۋدا. قال­عان شاحماتشىلارىمىزدىڭ نا­تيجەلەرى ودان دا تومەن. ال نور­­­ۆەگيالىق ماگنۋس كارلسەن جە­كە-دارا كوش باستاپ تۇر. سكان­دي­نا­ۆيالىق ساڭلاق 2 852 ۇپاي­دى يەمدەنۋدە. سونىمەن قاتار رەسەيلىك يان نەپومنياششي (2-ورىن، 2 795 ۇپاي)، قىتايلىق دين لي­جەن (3-ورىن، 2 788 ۇپاي)، فران­تسيالىق اليرەزا فيرۋزدجا (4-ورىن، 2 788 ۇپاي)، نيدەرلاندتىق ان­شيش گيري (5-ورىن، 2768 ۇپاي)، امە­ري­كالىق نيكارۋ ناكامۋرا (6-ورىن، 2 768 ۇپاي)، فابيانو كا­­رۋانا (7-ورىن، 2 766 ۇپاي)، ۋەسلي سو (8-ورىن، 2 761 ۇپاي)، ۆيش­­ۆاناتان اناند (9-ورىن، 2 754 ۇپاي) جانە ازەر­بايجاندىق تەي­­مۋر رادجابوۆ (10-ورىن، 2 747 ۇپاي) سىندى ساڭ­لاقتار توپ-10 ويىنشىنىڭ قاتا­رىنا قوسىلدى.