ۇلىبريتانيا مەن قازاقستان اراسىنداعى تاۋار اينالىمى 1،8 ملرد دوللاردان استى

وتكەن جىلى ەلدەر اراسىنداعى تاۋار اينالىمى شامامەن 60%-عا ءوسىپ،  1،8 ملرد دوللاردان استى.

سونداي-اق بىرىككەن كورولدىك قازاقستاننىڭ توپ-10 ينۆەستورىنىڭ قاتارىنا كىرەدى: 2005 جىلدان باستاپ رەسپۋبليكاعا شامامەن $16،5 ملرد تىكەلەي ينۆەستيتسيا سالىندى. وڭ ءوسۋ ءۇردىسى سوڭعى جىلدارى دا جالعاسىپ جاتىر.

«قازاقستان ۇكىمەتى ۇلىبريتانيامەن بارلىق باعىتتار بويىنشا ءوزارا ءىس-قيمىلدى ودان ءارى تەرەڭدەتۋگە نيەتتى. بۇل تۇرعىدا ستراتەگيالىق سەرىكتەستىك پەن ىنتىماقتاستىق تۋرالى قازاقستان-بريتان كەلىسىمىن قابىلداۋ ماڭىزدى قادام بولماق»، دەدى ءاليحان سمايىلوۆ.

ول ءوزارا ساۋدانى كەڭەيتۋ اياسىندا قازاقستان ۇلىبريتانياعا 100-دەن استام تاۋار پوزيتسياسى بويىنشا $800 ملن-عا جۋىق سوماعا ءونىم ەكسپورتىن ۇلعايتۋعا دايىن ەكەنىن ايتتى. بۇل رەتتە ەنەرگەتيكا بويىنشا «جاسىل» سۋتەگى ءوندىرۋ جونىندەگى بىرلەسكەن جوبالاردى ىسكە اسىرۋ، ال لوگيستيكالىق سالادا – ترانسكاسپي حالىقارالىق كولىك باعىتىن ودان ءارى دامىتۋ قىزىعۋشىلىق تۋدىرادى.

ءوز كەزەگىندە دجەيمس كلەۆەرلي قازاقستان ۇلىبريتانيانىڭ ورتالىق ازياداعى ماڭىزدى ساۋدا سەرىكتەستەرىنىڭ ءبىرى ءارى بىرىككەن كورولدىك ەلىمىزبەن بارلىق ءوزارا ءتيىمدى باعىت بويىنشا ىنتىماقتاستىقتى نىعايتۋعا دايىن ەكەنىن اتاپ ءوتتى.

« ۇلىبريتانيا مەن قازاقستان ورنىقتى ءارى بەرىك قارىم-قاتىناستىڭ نەگىزىن قالادى، مەنىڭ ويىمشا، ول بارىنشا دامۋ الەۋەتىنە يە. بۇل بىزگە الداعى قادامدارىمىزدى، كەلەشەكتە قانداي پەرسپەكتيۆالار اشىلاتىنىن تالقىلاۋعا مۇمكىندىك بەرەدى»، دەدى دجەيمس كلەۆەرلي.

كەزدەسۋ قورىتىندىسى بويىنشا قر پرەمەر-ءمينيسترىنىڭ قاتىسۋىمەن قازاقستان مەن ۇلىبريتانيا اراسىنداعى ەكولوگيالىق تازا سۋتەگى مەن اسا ماڭىزدى مينەرالدى شيكىزات دامىتۋ سالاسىنداعى ستراتەگيالىق ارىپتەستىك تۋرالى مەموراندۋمدارعا قول قويىلدى.

ۇلىبريتانيا – قازاقستاننىڭ ەۋروپا قۇرلىعىنداعى نەگىزگى ساۋدا جانە ينۆەستيتسيالىق سەرىكتەستەرىنىڭ ءبىرى.