استانادا سايلاۋ كۇنى قوعامدىق كولىكپەن ءجۇرۋ تەگىن بولادى

19 ناۋرىزدا اۆتوبۋستار تاڭعى 06:00-دەن تۇنگى 23:00-گە دەيىن شتاتتىق رەجيمدە جۇرەدى. جولاۋشىلار ءۇشىن جول ءجۇرۋ تەگىن بولادى. ال 20 ناۋرىزدان باستاپ، دۇيسەنبىدە قوعامدىق كولىك قولما-قول اقشاسىز تولەممەن شتاتتىق رەجيمدە جۇمىس ىستەيدى.

ەستەرىڭىزگە سالا كەتەيىك، قالا تۇرعىندارى ەلورداداعى سايلاۋ ۋچاسكەسىن بىرنەشە تاسىلمەن ونلاين بىلە الادى:

1. ۆەب-قىزمەت: https://sailau.astana.kz/

2. Telegram-داعى چ-بوت: https://t.me/sailau_astana_bot

3. Smart Astana ءموبيلدى قوسىمشاسى;

4. IKomek بىرىڭعاي بايلانىس ورتالىعى 109 تەلەفونى بويىنشا.

ايتا كەتۋ كەرەك، 2004 جىلدان بەرى العاش رەت داۋىس بەرۋ جاڭا ەرەجەلەر بويىنشا وتەدى – دەپۋتاتتار ارالاس جۇيە بويىنشا سايلانادى.

ءسىز تەك پارتيا ءۇشىن عانا ەمەس، تاۋەلسىز كانديداتتار ءۇشىن دە داۋىس بەرە الاسىز. ءماجىلىس پەن ءماسليحات سايلاۋىندا ەلوردا تۇرعىندارى ءتۇرلى ءتۇستى بيۋللەتەندەردىڭ ءتورت ءتۇرىن الادى. بلانكىلەر ءار ءتۇرلى ءتۇستى بولادى.

ءماجىلىس دەپۋتاتتارىن پارتيالىق تىزىمدەر بويىنشا تاڭداۋ ءۇشىن – كوك، ال ءبىر مانداتتى وكرۋگتەر بويىنشا – جاسىل. قالالىق ماسليحاتقا داۋىس بەرۋ ءۇشىن كۇلگىن جانە قىزعىلت سارى ءتۇستى بيۋللەتەندەر بولادى. ءار بيۋللەتەندە «بارلىعىنا قارسى» دەگەن باعان بولادى.