پرەزيدەنت قيىن كەزدەردە بىرىگىپ جۇمىس ىستەۋدىڭ ماڭىزدى ەكەنىنە توقتالىپ ءوتتى.
ء«بىرىنشى. ءبىز تابيعي اپاتتىڭ الدىن-الۋ ءۇشىن كۇش جۇمىلدىرۋىمىز كەرەك. تۇركياداعى ءزىلزالا قاۋىپ-قاتەرگە قاشاندا دايىن بولۋ قاجەتتىگىن كورسەتتى. سوندىقتان ۇيىم اياسىندا توتەنشە جاعدايلار مەكەمەلەرىنىڭ بىرلەسكەن كۇشىن جاساقتاۋدى ۇسىنامىن. ونى الماتىداعى توتەنشە جاعدايلار جانە الاپات جەر سىلكىنىستەرىنىڭ قاۋىپ-قاتەرىن ازايتۋ جونىندەگى ورتالىقتىڭ نەگىزىندە اشۋعا بولادى. بۇل ورتالىقتى 2016 جىلى قازاقستان جانە قىرعىزستان ۇكىمەتتەرى قۇرعان. بىرلەسكەن كۇشكە ۇيىمنىڭ ازاماتتىق قورعانىس حاتشىلىعى مارتەبەسىن بەرگەن ءجون دەپ سانايمىن. ول اپاتتان زارداپ شەككەن ەلدەرگە كومەك كورسەتۋ جۇمىستارىن ۇيلەستىرەتىن بولادى. وسى قۇرىلىم اياسىندا حالىقارالىق ءىس-شارالار ۇيىمداستىرىلادى», دەدى ول.
قاسىم-جومارت كەمەل ۇلى تۇركياعا كومەك كورسەتۋدى جالعاستىراتىنىن ايتىپ, قۇتقارۋشىلاردىڭ كۇشى مەن تەحنيكالىق جابدىقتاردى ازىرلەۋدى تاپسىراتىنىن مالىمدەدى.
«ەكىنشى. تۇركيادا بولعان جەر سىلكىنىسى تابيعي اپاتتىڭ الدىن الۋ جانە ونىڭ سالدارىن جويۋ ءۇشىن ءوزارا ءىس-قيمىلدى ۇيلەستىرۋ قاجەتتىگىن كورسەتتى. بۇل تۋرالى «تۇركى الەمىنىڭ كەلەشەگى – 2040» قۇجاتىندا ناقتى ايتىلعان. سوندىقتان ىزدەستىرۋ جانە قۇتقارۋ قىزمەتتەرىنىڭ دايىندىعىن كۇشەيتۋىمىز قاجەت. وسى ماقساتتا ەلدەرىمىزدەگى توتەنشە جاعداي مەكەمەلەرىنىڭ كۇشتەرى مەن تەحنيكالىق قۇرال-جابدىقتارىنىڭ ءتىزىمىن ازىرلەۋدى ۇسىنامىن. بۇل شارا قيىن-قىستاۋ ساتتە شۇعىل ارەكەت ەتىپ, اپاتتىڭ سالدارىن جويۋ ءۇشىن ءىس-قيمىلدى ۇيلەستىرۋگە مۇمكىندىك بەرمەك», دەدى پرەزيدەنت
مەملەكەت باسشىسى بۇل جاعدايدان ساباق الىپ, اپاتتىڭ الدىن الۋ شارالارىن ۇيىمداستىرۋعا مۇددەلى ەكەنىن ايتىپ, ۇيىمعا مۇشە ەلدەردى اتالعان ءىس-شاراعا قاتىسۋعا شاقىردى.
ء«ۇشىنشى. توتەنشە جاعدايدىڭ الدىن الۋ ءۇشىن اقپارات ءبولىسىپ, قۇتقارۋشىلاردىڭ تاجىريبە الماسۋى وتە ماڭىزدى. بيىل كۇزدە قازاقستاندا «قازقۇتقارۋ» حالىقارالىق وقۋ-جاتتىعۋ جيىندارى وتەدى. ۇيىمعا مۇشە ەلدەردىڭ قۇتقارۋ قىزمەتتەرىن اتالعان ءىس-شاراعا قاتىسۋعا شاقىرامىن. سول كەزدە وسى سالاعا جاۋاپتى مەكەمە باسشىلارىنىڭ العاشقى باسقوسۋىن وتكىزۋگە بولادى», دەپ قورىتىندىلادى پرەزيدەنت.
