جۋرناليستەر سەنات سپيكەرىنە «وسى ۇكىمەت قۇرامى جاڭارا ما الدە جۇمىسىن جالعاستىرا ما؟ مەملەكەتتىڭ ەكىنشى لاۋازىمىنداعى ادام رەتىندە نە ايتار ەدىڭىز؟» دەگەن ساۋال قويدى.
«كونستيتۋتسيامىزعا سايكەس جاڭا سايلانعان ءماجىلىس جۇمىسىنا كىرىسكەن سوڭ ۇكىمەت وتستاۆكاعا كەتەدى. جاڭا ۇكىمەت جاساقتالادى. جاڭا پرەمەر-مينيستر مەن مينيسترلەردىڭ تاعايىندالۋى پرەزيدەنتتىڭ قۇزىرەتىندە. سوندىقتان بۇعان ارالاسقان دۇرىس بولمايدى. كىشكەنە كۇتە تۇرىڭىزدار. كەلەسى اپتادا بۇل ماسەلەلەر شەشىلەدى», دەدى ماۋلەن اشىمباەۆ.
ءوز سوزىندە سەنات توراعاسى قازاقستان ءۇشىن قيىن كەزەڭدە جۇمىس ىستەگەن ۇكىمەت مۇشەلەرىنە سەنىم ارتاتىنىن قوسا ايتتى.
«ۇكىمەتتىڭ وسىنداي قيىن كەزەڭدە جۇمىس ىستەگەنىن ەرەكشە اتاپ وتكىم كەلەدى. ينفلياتسيا ءوستى, بيۋدجەتتىڭ شىعىنىن قىسقارتۋ قاجەتتىگىن دە ايتتىق. كوپ ماسەلەنى ايتىپ جاتىرمىز. بۇل جەردە ۇكىمەت وسى ماسەلەلەردى ەسكەرىپ, كەلەسى جىلدىڭ بيۋدجەتىنە كەلگەندە وسىنىڭ بارلىعىن بيۋدجەتتە قاراستىرادى دەپ سەنەمىز. قازىر ۇلكەن سايلاۋدىڭ الدىندا تۇرمىز. سوندىقتان قازىر ۇكىمەت جۇمىسىنا باعا بەرۋ دۇرىس ەمەس. سايلاۋ وتكەننەن كەيىن, تاعايىنداۋلار بولعاننان كەيىن بارلىعى بەلگىلى بولادى. سول كەزدە وسى سۇراقتى قويساڭىزدار, ءوز باعامدى بەرەمىن», دەدى ماۋلەن اشىمباەۆ.
